Grýziiada kóz jumǵan qazaq qyzyn kúdikti kólikke aiyrbastaǵan bolýy múmkin
Sýrettegi kúlimdegen Ásel Aitpaeva eki apta buryn Grýziiaǵa jumysqa attanǵan. 26 jastaǵy boijetkendi týysy kólik tasymaldaityn kompaniianyń is-qaǵazdaryn júrgizýge shaqyrypty. Jeke úi, jalaqy men kólik beremiz degenge sengen Ásel, tez arada qujattaryn jinastyryp, shetelge attanǵan. Biraq, 5-mamyrda týystary onyń Tbiliside 8-shi qabattan qulap, mert bolǵanyn estipti.
Aina Aitpaeva, marqumnyń ápkesi:
Sońǵy ret ol qurbysyna 4-shi mamyrda túngi 3-te "Telegram" jelisi arqyly aýdio jazba jibergen. Biraq, ol qurbysy uiyqtap jatqasyn, tek tańerteń tyńdapty. "Telegramnan" eshqashan jazbaityn, tek "WhatsApp" kómegimen habarlasatyn.
Qurbysyna jibergen dybystyq jazbada Beso esimdi azamat Áselmen tildeskenin estýge bolady. Ol birese jas qyzǵa ǵashyq ekenin, birese onyń aldaǵanyn aityp, qoqan-loqy kórsetkeni de jazylǵan.
Grýziia prokýratýrasy Beso Tordýa esimdi azamattyń ustalyp, eki aiǵa qamaýǵa alynǵanyn habarlady.
Quzyrly organdaǵylar oǵan "zorlyq-zombylyq" jasady jáne "óz-ózine qol jumsaýǵa" májbúrledi degen aiyp taǵýda. Otandasymyzdyń osy 57 jastaǵy azamattyń jaldap turǵan úiinen qulaǵany da anyqtalǵan. Al, Aina Aitpaeva Áseldiń ólimine taǵy 3 adamnyń qatysy bar, deidi. Onyń arasynda jumysqa shaqyrǵan týysyn da atady.
Aina Aitpaeva, marqumnyń ápkesi:
– Biz Murattyń Qazaqstanǵa shuǵyl túrde qashqanyn estidik. Ony politsiia bólimine eki ret shaqyrtqanymen, qamamapty. Ol politseilerge kerisinshe "senderdiń aldylaryńda esep bermeimin" dep ákireńdegen. Aýdiojazbada onyń da Áseldi zorlaǵany anyq aitylǵan.
Ózge elde jumbaq jaǵdaida kóz jumǵan Áseldiń ápkesi eki oily. Ol sińilisin kúdiktiler ne jezókshelikke májbúrledi, ne qandai da qujatqa qol qoidyrmaq bolǵan deidi.
Al, qyzynan aiyrylyp, qan jutqan Áseldiń anasy Aisulý Aitpaeva Grýziiaǵa búgin jetti. Ol múrdeni taný men sot-meditsinalyq zertteýlerge qatyspaq. Azamatsha qyzyn kúdikti avtokólikke aiyrbastaýy múmkin degendi de málimdegen. Biz marqumnyń tanystaryn da sózge tarttyq.
Anargúl Ahmetova, marqumnyń qurbysy:
Ásel aiaq astynan jumysqa kelmei ketti. Maǵan bul kúdikti kórindi. Óitkeni onyń jaýapkershiligi joǵary bolatyn. Sosyn tik minezdi edi. Onyń óz-ózine qol jumsaǵanyna senbeimin.
Grýziianyń aqparat kózderi qolǵa túsken Beso Tordýanyń aiyby dáleldense, 10 jylǵa bas bostandyǵynan aiyrylatynyn jazýda. Sot otyrysy 23-mamyrda bastalmaq. Iste zorlyq-zombylyq áreketteri bolǵan soń, ol jabyq túrde ótedi degen de aqparat bar. Al, jap-jas qyzdyń jaqyndary ony jumysqa shaqyryp, keiinnen ólimine qatysy bar týysyn da jaýapqa tartýdy suraidy. Sondai-aq ol is halyqaralyq deńgeide bolǵan soń, Prezident pen eldegi quzyrly organ basshylarynan kómek surady.
https://youtu.be/qJ9JLSWhsn4
