Goldman Sachs Group Inc. ساراپشىلارى وپەك+ ەلدەرىنىڭ مۇناي ءوندىرۋ كولەمىن ارتتىرۋ تۋرالى شەشىمىنە قاراماستان، Brent ماركالى مۇناي باعاسىنا قاتىستى بۇرىنعى بولجامىن ساقتاپ قالدى. مامانداردىڭ پىكىرىنشە، 2025 جىلدىڭ IV-توقسانىندا Brent مۇنايىنىڭ ورتاشا ەسەپپەن ءبىر باررەلى 64 دوللاردى، ال 2026 جىلى 56 دوللاردى قۇرايدى، دەپ حابارلايدى Dalanews.kz.
3 تامىزدا وتكەن وتىرىستا وپەك+ ەلدەرىنىڭ سەگىز مۇشەسى (ساۋد ارابياسى، رەسەي، يراك، ءباا، كۋۆەيت، قازاقستان، الجير جانە ومان) مۇناي ءوندىرۋ كۆوتاسىن تاۋلىگىنە 547 مىڭ باررەلگە ارتتىرۋ تۋرالى شەشىم قابىلداعان ەدى. بۇل تامىز ايىنداعى كورسەتكىشپەن سالىستىرعاندا بىردەن ءتورت ايلىق جوسپارعا تەڭ ءوسىم بولىپ سانالادى. جالپى، اليانس ەلدەرى 2024 جىلعى جەلتوقساندا ماقۇلدانعان جوسپارمەن سالىستىرعاندا بيىل ساۋىردەن بەرى مۇناي ءوندىرۋدى جەدەل قارقىنمەن ارتتىرىپ كەلەدى.
"وپەك+ ساياساتى يكەمدى بولىپ قالا بەرمەك. دەگەنمەن، ءبىزدىڭ ويىمىزشا، اليانس قىركۇيەك ايىنان كەيىن ءوندىرىس كۆوتاسىن وزگەرتپەيدى. ءبىز ەىدۇ ەلدەرىندە مۇناي قورىنىڭ ءوسۋ قارقىنى جەدەلدەيدى، ال ماۋسىمدىق فاكتورلاردىڭ سۇرانىستى قولداۋ اسەرى ازايادى دەپ كۇتەمىز"، دەلىنگەن Goldman Sachs ەسەبىندە.
سونىمەن قاتار بانك ساراپشىلارى مۇناي باعاسىنا بولجام جاساۋعا اسەر ەتەتىن قوسىمشا تاۋەكەلدەردى دە اتادى.
"رەسەي مەن يران مۇنايىنا قاتىستى ۇسىنىس قىسىمىنىڭ كۇشەيۋى بولجامدى جوعارى قاراي قايتا قاراۋعا تۇرتكى بولۋى مۇمكىن. اسىرەسە، ءوندىرىستىڭ بوس قۋاتتارىنىڭ قالپىنا كەلۋى كۇتكەننەن جىلدام جۇرۋدە"، – دەيدى ساراپشىلار.
دەگەنمەن Goldman Sachs رەسەي مۇنايىنىڭ جەتكىزىلىمىندە ۇلكەن ۇزىلىستەر بولۋى ەكىتالاي دەپ سانايدى.
"رەسەي مۇنايىنىڭ يمپورتى جوعارى دەڭگەيدە ساقتالۋدا ءارى جۇڭگو مەن ءۇندىستان سياقتى نەگىزگى ساتىپ الۋشىلاردىڭ قىزىعۋشىلىعى ءالى دە كۇشتى. سونىمەن قاتار، سۇرانىستى ساقتاۋ ءۇشىن باعا بويىنشا جەڭىلدىكتەر جاساۋ مۇمكىندىگى دە بار"، – دەپ اتاپ ءوتتى ساراپشىلار.
Goldman بولجامىنا سايكەس، 2025–2026 جىلدارى الەمدىك مۇنايعا سۇرانىس تاۋلىگىنە ورتاشا ەسەپپەن 800 مىڭ باررەلگە وسەدى. الايدا اقش-تىڭ ساۋدا ساياساتى، امەريكالىق يمپورتقا سالىناتىن باج سالىقتارى، اقش-تىڭ ساۋدا سەرىكتەستەرىنىڭ جاۋاپ شارالارى جانە امەريكا ەكونوميكاسىنىڭ باياۋلاۋى سياقتى فاكتورلار بۇل بولجامعا تەرىس اسەر ەتۋى ىقتيمال ەكەنى دە ەسكەرتىلدى.
بۇعان دەيىن قازاقستان وپەك+ جاڭا كەلىسىمى اياسىندا مۇناي ءوندىرىسى كولەمىن ارتتىراتىنىن جازعانبىز.
