جەر-جاھان ىندەتتىڭ ىلمەگىنە ءىلىنىپ، ۆيرۋس شارتاراپتى كەزىپ كەتكەن شاقتا وتانىنان جىراقتا ءومىر ءسۇرىپ جاتسا دا، ەلدەگى جاعدايعا بەيجاي قاراي الماعان جاستارىمىز بارشىلىق.
بۇل ورايدا پاندەميا كەزىندە قازاقستاندىق دارىگەرلەرگە اقپاراتتىق قولداۋ جاساعان، الەمنىڭ تۇكپىر-تۇكپىرىندە زەرتتەۋمەن، عىلىممەن اينالىسىپ جۇرگەن قازاقستاننىڭ PhD-قىزدارىن بىرىكتىرگەن Kzphdgirlsunion ەرىكتىلەر جوباسىن قۇرعان ءامينا ميرساكييەۆانىڭ ەرەن ەڭبەگىن ايتپاسقا بولماس.
ول – «قازاقستاننىڭ 100 جاڭا ەسىمى» جوباسىنىڭ جەڭىمپازى، تەوريالىق فيزيك، عىلىمدى ناسيحاتتاۋشى.
Carl Zeiss نەمىس كومپانياسىندا زەرتتەۋشى-عالىم.
ايتا كەتەيىك، اتالعان نەمىس كومپانياسىندا 30 مىڭنان اسا قىزمەتكەر جۇمىس ىستەيدى. Carl Zeiss – EUV-ليتوگرافياعا ارنالعان قۇرىلعىلاردىڭ بولشەكتەرىن جاسايتىن الەمدەگى جالعىز كومپانيا.
«ءبىزدىڭ ۇيىم پاندەميا كەزىندە عالىمداردى، دارىگەرلەر مەن مەديسينالىق ستۋدەنتتەر مەن شەتەلدە جۇمىس ىستەيتىن نەمەسە وقيتىن ءبىزدىڭ ەلدىڭ ازاماتتارىن ءبىر ماقسات مۇددە بويىنشا بىرىكتىرىپ، كونتەنت قۇرىپ، قازاقستاندىق دارىگەرلەرگە ەڭ زاماناۋي اقپاراتتاردى، جەتەكشى ەۋروپالىق مەديسينالىق ورتالىقتاردىڭ ەمدەۋ حاتتامالارىن، جاڭا دارى-دارمەكتەردىڭ سيپاتتامالارىن جانە ەمدەۋ ادىس-تاسىلدەرىن ۇسىنىپ، جىبەرىپ وتىردىق.
ويتكەنى ناۋقاستاردىڭ ءومىرى ءۇشىن كۇرەسىپ جۇرگەن دارىگەرلەردىڭ بەلدى شەتەلدىك عالىمداردىڭ كوروناۆيرۋس جايلى جازعان ماقالالارىن، زەرتتەۋ جۇمىستارىن ىزدەيتىن ۋاقىتتارى بولمادى.
سوندىقتان دا ءبىز ۆيرۋسقا بايلانىستى اقپاراتتاردى سۇزگىدەن وتكىزىپ، قازاقستانداعى اق حالاتتى ابزال جاندارعا كومەك رەتىندە قامتاماسىز ەتىپ وتىردىق» دەيدى عالىم ءامينا.
قازىرگى كەزدە ول Carl Zeiss كومپانياسىندا ليتوگرافيادا قولدانىلاتىن قۇرىلعىعا ارنالعان ماتەريالدار جاساپ شىعارۋمەن اينالىسۋدا. قاراپايىم تىلمەن ايتساق تەلەفون نە كومپيۋتەر سياقتى ءارتۇرلى ەلەكترونيكاعا ارنالعان چيپتەردى باسىپ شىعاراتىن ءتاسىل.
سونىمەن قاتار الەۋمەتتىك جەلىدە «بەلكا ي سترەلكا» پودكاستىن جۇرگىزەدى، عىلىمداعى سوڭعى جاڭالىقتاردى ايتىپ، كورەرمەندەرگە جەتكىزىپ وتىرادى. Youtube جوباسىندا «باعدارلامالاۋ كىمگە كەرەك؟»، «قىزدار نەگە كۇيزەلىسكە كوپ تۇسەدى؟»، «كۇننەن قورعاۋ» جونىندەگى عىلىم»، «گەولوگ قىز مەترونى قالاي سوعادى؟»، «بالامالى وتىن»، «قانداي تاماق ءقاۋىپتى؟»، «جالعان عىلىم»، «عىلىمي مەتريا: الەمدە ەڭ اقىلدى كىم؟»، «كوسمەتيكانى قالاي جاسايدى؟»، ەلەكتروندى جانە جاي تەمەكىنىڭ قايسىسى قاۋىپتىرەك؟»، «ۇلى عىلىمي جاڭالىقتى قالاي كەزدەيسوق اشۋعا بولادى؟»، سىندى تاقىرىپتىق سۇراقتارعا ءتۇرلى ماماندارمەن بىرگە جاۋاپ ىزدەيدى.
ءبىر سوزبەن ايتقاندا، مەديا سالاسىنا اياق باسىپ، عىلىمي جاڭالىقتاردى ەلگە جەتكىزۋدە وزىندىك حابارعا اينالىپ كەلەدى.
«مەنىڭ ويىمشا، جاستار پودكاستتارعا قىزىعۋشىلىق تانىتادى.
جالپى، تىڭداۋدى جاقسى كورەتىندەردىڭ جانە وتە بەلسەندى ءومىر سۇرەتىندەردىڭ ءبارى ءبىر ساتتە پودكاستتارعا كەلەدى دەپ ەسەپتەيمىن. مۇندا جاس شەكتەۋلەرى جوق. مازمۇن ساپاسىنا شەكتەۋلەر بار شىعار.
ماسەلەن، ەگەر ادام ونەرگە نەمەسە تاريحقا قىزىعۋشىلىق تانىتسا، وندا ول ەكو تۋرالى مەنىڭ پودكاستىمدى تىڭداماۋى مۇمكىن. سوندىقتان دا كونتەنت جاساۋشىلار مەن، تىڭداۋشىلار اراگىدىك كەزدەسىپ، قانداي دۇنيە قىزىقتىراتىنى جايلى سۇحبات قۇرىپ، پىكىر الماسىپ تۇرسا، نۇر ۇستىنە نۇر بولار ەدى»، – دەيدى ءامينا حانىم.
عىلىمعا قۇشتار جان وڭتۇستىك استانامىز الماتىداعى قازاق-بريتان تەحنيكالىق ۋنيۆەرسيتەتىندە ءبىلىم الا ءجۇرىپ، زەرتتەۋگە قۇمار بولدى، 2-كۋرستان باستاپ زەرتحاناداعى عىلىمي ىزدەنىستەردە بەلسەندىلىك تانىتتى.
اتالعان جوعارى وقۋ ورنىندا حيميا ينجەنەرياسى بويىنشا باكالاۆريات پەن ماگيستراتۋرانى ءبىتىردى. Cودان سوڭ شۆەسياداعى KTH – كورولدىك تەحنولوگيا ينستيتۋتىنىڭ (Royal Institute of Technology) دوكتورانتۋراسىنا Material physics سالاسى بويىنشا وقۋعا ءتۇستى.
«مەن اقىلدى بولا باستاعان قوعامدا ءومىر سۇرگىم كەلەدى. سول ءۇشىن دە عىلىمعا بەت بۇردىم. سەبەبى تاڭعاجايىپ الەمدى تانىعىم كەلەدى. جالپى، ادامداردىڭ عىلىمعا بارۋىنىڭ جانە وندا قالۋىنىڭ جالعىز سەبەبى وسىندا شىعار. پسيحولوگيالىق تۇرعىدان جۇيكەگە سالماق تۇسىرگەنىمەن، ءاردايىم، ءتىپتى كۇن سايىن دەسەم ارتىق ايتپاعانىم بولار، جاۋابى جوق سالادا جۇمىس ىستەۋگە تۇرا كەلەدى. سول جۇمباقتى شەشكىڭ كەلەدى. عىلىمعا جاڭالىق ەنگىزۋ ءۇشىن باسىڭىزدى تاۋعا دا، تاسقا دا سوعۋىڭىز مۇمكىن. كەيبىرى قيىندىقتارعا شىداماي، كوپتەگەن عالىمدار باسقا سالاعا كەتىپ جاتادى. عىلىم وڭاي ەمەس. بۇل وتە كۇردەلى دۇنيە» دەيدى ءبىزدىڭ كەيىپكەرىمىز.
ءامينا بولاشاقتا قازاقستانعا كەلىپ، تاۋەلسىز ەلدىڭ عىلىمىنىڭ دامۋىنا ۇلەس قوسسام دەگەن ارمانىن ايتتى.
قۋانىش راحمەتوللا ۇلى
