ازاماتتىق اۆياسيا اكادەمياسىنىڭ پروفەسسورلىق-وقىتۋشىلار قۇرامىنىڭ الدىنا قويىلعان مىندەتتەرى كۇردەلى جانە سان قىرلى. مۇندا سالا ءۇشىن جوعارى بىلىكتى مامانداردى دايىنداۋعا ۇلكەن ءمان بەرىلەتىندىگىن اتاپ وتكەن ءجون، ياعني بۇل – جاۋاپكەرشىلىك اكادەميانىڭ قازاقستان رەسپۋبليكاسى مەن ورتالىق ازياداعى جالعىز وقۋ-ادىستەمەلىك جانە ءبىلىم بەرۋ ورتالىعىنا اينالۋىنا مۇمكىندىك بەرەدى.
بۇگىنگى تاڭدا، ازاماتتىق اۆياسيا اكادەمياسىندا اۆياسيالىق قاۋىپسىزدىك بويىنشا وقۋ ورتالىعى جۇمىس ىستەيدى جانە يكاو ايماقتىق رەسمي سەرتيفيكاتتاۋدان ءوتتى. سونىمەن قاتار، اكادەميادا «Airbus-320»، Boeing-737»، «ALSIM» جانە فينليانديا، يسپانيا، ليتۆا ەلدەرىمەن بىرلەسىپ ۇشقىشتار دايارلاۋ جوباسىن ىسكە قوستى. ايتا كەتەتىن ماسەلە، قازاقستاننىڭ حالىق قاھارمانى، ەلىمىزدىڭ ءۇشىنشى عارىشكەرى ا. ايىمبەتوۆ مىرزا ءبىزدىڭ اكادەميادا بولىپ، ونىڭ جەتىستىكتەرىن كورىپ، ءوزىنىڭ ريزاشىلىعىن ءبىلدىردى.
ازاماتتىق اۆياسيا اكادەمياسىندا عىلىم جانە يننوۆاسيانى دامىتۋ ماقساتىندا كوپتەگەن جۇمىستار اتقارىلۋدا. اتاپ ايتساق، 2016 جىلعا ارنالعان ستراتەگيالىق جوسپار دايارلاندى جانە اكادەميا رەكتورىمەن بەكىتىلدى.
ستراتەگيالىق جوسپار 7 بولىمنەن تۇرادى:
- يمپاكت-فاكتورمەن ماقالالار دايىنداۋ (Scopus، Thomson Retours)؛
- عىلىمي-زەرتتەۋ جۇمىستارىنىڭ باعىتتارى؛
- عىلىمي-زەرتتەۋ جۇمىستار باسىلىمىنىڭ ناتيجەسى (ونىڭ ىشىندە پاتەنتتەر، اۆتورلىق كۋالىكتەر الۋ)؛
- كونفەرەنسيالارعا، عىلىمي سەمينارلارعا، كونكۋرستارعا قاتىسۋ (حالىقارالىق، رەسپۋبليكالىق، جوعارى وقۋ ورىندارى اراسىندا)؛
- ستۋدەنتتەر مەن ماگيسترانتتاردىڭ عىلىمي-زەرتتەۋ جۇمىستارى؛
- ساراپتاۋ جوسپارىنا قوسۋعا دايارلانعان ازاماتتىق اۆياسيا اكادەمياسىنىڭ ستۋدەنتتەرىنە ارنالعان وقۋ ادەبيەتتەرىنىڭ ءتىزىمى؛
- وقۋلىقتار مەن وقۋ-ادىستەمەلىك ادەبيەتتەرگە ارنالعان باسىلىم جوسپارى.
اتالعان ستراتەگيالىق جوسپار نەگىزىندە ازاماتتىق اۆياسيا اكادەمياسىندا 7 عىلىمي جوبا بەكىتىلدى. ولار: كونتينەنتتىك كليماتتىق جاعدايلارىندا جەكە تۇتىنۋشىلاردى اۆتونومدى ەلەكترمەن جابدىقتاۋ ءۇشىن كۇن فوتوەلەكترلىك جۇيەسىن ازىرلەۋ؛ قۇراما ەنەرگوقوندىرعىلى ەلەكتروموبيلدەردىڭ پايدالانۋ سيپاتتامالارىن ارتتىرۋ؛ اۋديو جانە بەينەجازبالار پاكەتىن قازاق تىلىندە ازىرلەۋ بويىنشا باعدارلامالار؛ يننوۆاسيالىق – ءبىلىم بەرۋ كلاستەرى «قازاقستاننىڭ ازاماتتىق اۆياسياسى»؛ ءبىر سەكسيالىق كەڭىستىكتىك كوپپىشىندى سەرپىمدى ارنايى قۇرىلىمدى مانيپۋلياتور روبوتتى ازىرلەۋ؛ ازاماتتىق اۆياسيا سالاسى ءۇشىن قازاقستاندىق مامانداردى دايارلاۋ؛ يننوۆاسيالىق زەرتحانانى كومپيۋتەرلىك-گرافيكالىق قۇرال-جابدىقتارىن ۇيىمداستىرۋ.
بۇگىنگى تاڭدا 3 جوبا بويىنشا ناقتى جۇمىستار اتقارىلىپ، گرانتتىق كونكۋرستارعا دايارلانۋدا. اكادەميا وقىتۋشىلارىنىڭ، ستۋدەنتتەرىنىڭ، جاس عالىمداردىڭ عىلىمي جۇمىستارىنىڭ رەيتينگىن كوتەرۋ ماقساتىندا Springer كومپانياسىمەن سەمينار وتكىزىلدى.
سونىمەن قاتار، ازاماتتىق اۆياسيا اكادەمياسى «مەرزىمدى باسىپ شىعارۋ جانە اقپارات اگەنتتىگى ەسەبىنە قويۋ تۋرالى» كۋالىك العان بولاتىن. وسى كۋالىك نەگىزىندە جەلتوقسان ايىندا «ازاماتتىق اۆياسيا اكادەمياسىنىڭ جارشىسى» عىلىمي جۋرنالىنىڭ ءبىرىنشى سانى جارىققا شىقتى.
جۋرنالدىڭ مازمۇنى 4 بولىمنەن تۇرادى:
- يننوۆاسيالىق تەحنولوگيا جانە اۆياسيالىق تەحنيكا؛
- كولىكتىك لوگيستيكا جانە اۆياسيالىق قاۋىپسىزدىك؛
- عىلىمنىڭ، ءبىلىمنىڭ جانە بيزنەستىڭ ينتەگراسياسى؛
- ستارتاپ جوبالار جانە جاس عالىمدار مىنبەسى.
اتالمىش جۋرنال باسىلىمىندا عىلىم جانە ءبىلىم جۇيەسىن دامىتۋدىڭ باسىم باعىتتارىن تالقىلاۋ كوزدەلىپ وتىر. قازىرگى جاھاندانۋ زامانىندا قوعامدا ورىن الىپ وتىرعان يننوۆاسيالىق-تەحنولوگيالىق ۇدەرىستەر جاعدايىندا، وتاندىق جوعارعى كاسىبي ءبىلىمدى جانە عىلىمدى جاڭعىرتۋدىڭ زاماناۋي ماسەلەلەرىن زەرتتەۋ جانە تالداۋ – بۇگىنگى كۇننىڭ تالابى. سوندىقتان بۇل عىلىمي كوپشىلىك جۋرنال اكادەميا وقىتۋشىلارى مەن ماگيسترانتتارى، دوكتورانتتارى جانە جاس عالىمدارى ءۇشىن وتە قاجەت بولىپ تابىلادى. جۋرنالدىڭ ەكىنشى سانى باسىلىپ شىعۋدا. بۇل ساندا جۋرنالدىڭ مازمۇنى ءار قىرىنان اشىلعان جانە اۆياسيا سالاسىنىڭ جاڭالىقتارىمەن بولىسەدى.
ستۋدەنتتەر مەن ماگيسترانتتاردىڭ عىلىم جانە يننوۆاسيا باعىتى بويىنشا ىزدەنىس جۇمىستارىمەن اينالىسۋىنا جاعداي جاسالعان، وسى نەگىزدە اكادەميا بازاسىندا «جاس عالىمدار كەڭەسى» قۇرىلعان. كەڭەستىڭ الدىنا قويعان ناقتى ماقساتتارى مەن مىندەتتەرى، بەكىتىلگەن «ەرەجەسى»، جۇمىس جوسپارى بار. جوسپار نەگىزىندە العاشقى «عىلىمي جانە عىلىمي-تەحنيكالىق قىزمەت ناتيجەلەرىن كوممەرسيالاندىرۋ تۋرالى» تاقىرىبىندا دوڭگەلەك ۇستەل وتكىزىلدى.
عىلىم كۇنىنە وراي 2016 جىلعى 12 ساۋىردە اكادەميادا «قازاقستان رەسپۋبليكاسىنىڭ تاۋەلسىزدىگىنە 25 جىل تولۋىنا» ارنالعان ستۋدەنتتەر مەن جاس عالىمداردىڭ جوعارى وقۋ ورىندارى اراسىنداعى «ازاماتتىق اۆياسياداعى يننوۆاسيانى ىنتالاندىرۋ» ينتەگراسيا جانە كوممەرسياليزاسيا تاقىرىبىندا عىلىمي-تاجىريبەلىك كونفەرەنسيا ءوتتى. كونفەرەنسيا قورىتىندىسى بويىنشا عىلىمي جۇمىستارى جوعارى باعالانعان ستۋدەنتتەر مەن جاس عالىمدار جانە ولاردىڭ عىلىمي جەتەكشىلەرى ماقتاۋ قاعازدارىمەن، سىيلىقتارمەن ماراپاتتالدى جانە وسى كونفەرەنسيانىڭ عىلىمي جۇمىستار جيناعىن شىعارۋ جوسپارى ىسكە اسۋدا.
ازاماتتىق اۆياسيا اكادەمياسىنىڭ كىتاپحاناسى ستۋدەنتتەر، جاس عالىمدار، وقىتۋشىلار ءۇشىن قىزمەت ەتەدى. كىتاپحانا زاماناۋي ادەبيەتپەن جابدىقتالعان، ەلەكتروندىق كىتاپحانا ينتەرنەت جەلىسىمەن تولىق قامتىلعان، وقىرمان زالىندا اۆياسيا سالاسىندا ءبىلىم الۋعا قاجەتتى وقۋلىقتار جەتكىلىكتى.
س.س. ەسپايەۆ، ەكونوميكا عىلىمدارىنىڭ دوكتورى، ازاماتتىق اۆياسيا اكادەمياسىنىڭ عىلىم جانە يننوۆاسيا جونىندەگى پرورەكتورى
