گەرمانيادا بۋندەسۆەرگە شاقىرۋ جونىندەگى جاڭا ەرەجەلەرگە ىلىگۋى مۇمكىن مىڭداعان جاس ازامات قوس ازاماتتىققا يە. ولاردىڭ قاتارىندا رەسەي مەن قازاقستان ازاماتتىعى بارلار دا بار. بۇل تۋرالى 18 قاراشا، سەيسەنبى كۇنى Die Welt گازەتى گەرمانيانىڭ فەدەرالدىق ستاتيستيكا ۆەدومستۆوسىنىڭ دەرەكتەرىنە سۇيەنىپ جازدى، دەپ حابارلايدى Dalanews.kz.
جەلتوقساندا بۋندەستاگ شاقىرۋدىڭ جاڭا ءتارتىبىن بەكىتۋى ءتيىس: 2026 جىلدان باستاپ گەرمانياداعى بارلىق 18 جاستاعى ازامات ارنايى ساۋالناما تولتىرىپ، كەيىن اسكەري قىزمەتكە جارامدىلىق ساناتىن انىقتاۋ ءۇشىن مەديسينالىق تەكسەرىستەن وتەدى. ەگەر ەرىكتىلەر سانى جەتكىلىكسىز بولسا، اسكەرگە جەرەبە ارقىلى شاقىرۋ جوسپارلانىپ وتىر. الايدا بۇل ماسەلە ءالى تولىق شەشىلگەن جوق.
Die Welt مالىمەتىنشە، 2022 جىلدىڭ مامىر ايىندا گەرمانيادا 2008 جىلى تۋعان 340 859 ەر بالا تۇرعان. سولاردىڭ 56 693ء-ى گەرمانيا ازاماتتىعىمەن بىرگە تاعى ءبىر نەمەسە بىرنەشە ازاماتتىققا يە بولعان. ولاردىڭ ىشىندە 3 691-ىنىڭ – رەسەي، 1 620-سىنىڭ – قازاقستان، 14 463-ىنىڭ – تۇركيا، 4 141-ىنىڭ – پولشا، 3 857ء-سىنىڭ – يتاليا، 1 888ء-ىنىڭ – سەربيا، 1 640-ىنىڭ – ماروككو ازاماتتىعى بولعان.
گازەتتىڭ جازۋىنشا، ساۋالنامادا وزگە ازاماتتىقتاردىڭ بار-جوعىن مىندەتتى تۇردە كورسەتۋ تالاپ ەتىلەدى. گەرمانيا قورعانىس مينيسترلىگى زاڭ جوباسىن ازىرلەۋ كەزەڭىندە بۇل «سەنىمسىزدىك بەلگىسى ەمەس» ەكەنىن ايتىپ، مۇنداي اقپارات گەرمانيا الدىنداعى مىندەتتەمەلەر ءۇشىن قاجەت ەكەنىن تۇسىندىرگەن.
ۋكرايناداعى سوعىس اياسىندا رەسەي ازاماتتىعى بار بولاشاق شاقىرىلۋشىلارعا قاتىستى ادالدىق، قۇپيا اقپاراتقا قولجەتىمدىلىك سياقتى ماسەلەلەردە قيىندىقتار تۋىنداۋى مۇمكىن، دەپ جازادى Die Welt. قورعانىس مينيسترلىگى گازەتتىڭ سۇراۋىنا: ەرىكتى تۇردە قىزمەتكە بارعىسى كەلەتىندەردىڭ ءبارى «كونستيتۋسياعا ادالدىعى بويىنشا تەكسەرۋدەن ءوتۋى ءتيىس» دەپ جاۋاپ بەرگەن.
زاڭگەر فەرديناند ۆەبەر قوس ازاماتتىعى بار جاستاردى مەديسينالىق تەكسەرىستەن كەيىن اسكەري قىزمەتكە جىبەرمەۋى مۇمكىن دەگەن پىكىر ءبىلدىردى. سەبەبى ولارعا قاتىستى تاۋەكەلدەر بار. گەرمانيا ءسىم-ى گەرمانيا–رەسەي قوس ازاماتتىعىن العان ادامداردى رەسەيگە بارماۋعا بۇرىننان ەسكەرتىپ كەلەدى، ويتكەنى ولاردى رەسەي ارمياسىنا شاقىرىپ الۋى مۇمكىن.
