رەسەي پرەزيدەنتى ۆلاديمير ءپۋتيننىڭ قىرىمعا، ۋكراينانىڭ شىعىسى مەن قازاقستاننىڭ سولتۇستىگىنە اۋماقتىق تالاپتارى وسىدان 30 جىل بۇرىن-اق بەلگىلى بولعان. بۇل تۋرالى گەرمانيانىڭ سىرتقى ىستەر مينيسترلىگىنىڭ ارحيۆ قۇجاتتارىنا سۇيەنىپ، نەمىستىڭ Der Spiegel جۋرنالى جاريالادى، دەپ حابارلايدى Dalanews.kz.
2025 جىلى 21 شىلدەدە ميۋنحەندەگى زاماناۋي تاريح ينستيتۋتى گەرمانيا سىرتقى ساياساتىنا قاتىستى قۇجاتتار جيناعىنىڭ كەزەكتى تومىن شىعاردى. بۇل جيناقتىڭ ءبىر بولىگى 1994 جىلدىڭ العاشقى جارتىجىلدىعىنا ارنالعان.
جيناقپەن تانىسقان Der Spiegel تىلشىلەرىنىڭ جازۋىنشا، سول كەزدەگى سانكت-پەتەربۋرگتەگى گەرمانيانىڭ باس كونسۋلى ەبەرحارد فون پۋتتكامەردىڭ جازبالارىندا ۆلاديمير ءپۋتيننىڭ ۋكراينا مەن قازاقستانعا قاتىستى اۋماقتىق تالاپتارى اشىق ايتىلعان.
1994 جىلدىڭ 14 قاڭتارىندا نەمىس ديپلوماتى جازعان جازبادا ءپۋتيننىڭ قىرىم، ۋكراينانىڭ شىعىس بولىگى جانە قازاقستاننىڭ سولتۇستىگى جايلى پىكىرلەرى كەلتىرىلگەن:
"ءپۋتيننىڭ ايتۋىنشا، قىرىم، شىعىس ۋكراينا جانە قازاقستاننىڭ سولتۇستىگى رەسەي ءۇشىن ەشقاشان شەتەل بولىپ ەسەپتەلمەگەن، كەرىسىنشە ولار ءاردايىم رەسەي جەرىنىڭ اجىراماس بولىگى بولعان. بىردە-بىر ورىسقا وسى جەرلەردىڭ ءقازىر بولەك مەملەكەت ەكەنىن ءتۇسىندىرۋ مۇمكىن ەمەس"، – دەپ جازعان ەبەرحارد فون پۋتتكامەر.
پۋتين بۇل اۋماقتارعا دەگەن تالاپتاردىڭ استارىندا ورىستاردىڭ ۇلتتىق سەزىمى بار ەكەنىن، ال مۇنى نەمىستەردىڭ ءتۇسىنۋى قيىنعا سوعاتىنىن جەتكىزگەن.
جازبادا ءپۋتيننىڭ ۋكراينا مەن قازاقستانداعى ورىستاردىڭ الەۋمەتتىك-ەكونوميكالىق جاعدايىنا قاتىستى الاڭداۋشىلىعى دا ايتىلادى. پۋتين سول كەزدە ۋكراينا مەن قازاقستانداعى ورىس دياسپوراسىنىڭ الەۋمەتتىك جاعدايى جاقسى بولعاندا ەشقانداي ماسەلە تۋىنداماس ەدى دەپ مالىمدەگەن. ءبىراق، ونىڭ پىكىرىنشە، بۇل ەلدەردەگى جاعداي رەسەيلىك ۇلتشىل ساياساتكەرلەردىڭ، سونىڭ ىشىندە ۆلاديمير جيرينوۆسكييدىڭ قولىنا سۋ قۇيعان.
"باتىس ەلدەرى رەسەي مۇددەسىن قايتا جاندانىپ جاتقان يمپەرياليزم رەتىندە قابىلداۋى قاتە ءارى نەگىزسىز"، – دەگەن پىكىرىن بىلدىرگەن پۋتين.
اشىق دەرەككوزدەرگە سايكەس، ەبەرحارد فون پۋتتكامەر 1991–1995 جىلدارى سانكت-پەتەربۋرگتە گەرمانيانىڭ باس كونسۋلى قىزمەتىن اتقارعان، 2019 جىلى دۇنيەدەن وتكەن.
