الدىمەن، «قازاقستان عارىش ساپارى» ۇلتتىق كومپانياسى» اكسيونەرلىك قوعامى ۇسىناتىن اتالمىش جۇيەگە قىسقاشا توقتالساق. جەردى قاشىقتىقتان زوندتاۋ قوس قۇرىلىمنان تۇراتىن جانە جەر بەتىندەگى قانداي دا ءبىر وزگەرىستەردى باقىلاۋعا ارنالعان قازىرگى زامانعى جۇيە نەمەسە وزىق تەحنولوگيالاردىڭ جيىنتىعى. دالىرەك ايتقاندا، جەردىڭ سۋرەتىن تۇسىرەتىن ارنايى قۇرىلعىلارمەن، باعدارلامالارمەن جانە كەمەنىڭ قىزمەت ەتۋىنە قاجەتتى باسقا دا قۇرالدارمەن جابدىقتالعان بەلگىلى ءبىر وربيتادا ۇشىپ جۇرەتىن عارىشتىق كەمە. ونىڭ وڭىرلەردەگى پايدالانۋسىز جاتقان جەرلەردى جانە ولاردىڭ ناقتى اۋماعىن انىقتاۋ سەكىلدى جۇمىستاردى اتقارۋدا تيگىزەر پايداسى وراسان زور. قىسقاشا ايتقاندا، بۇل ءىستىڭ ەلىمىز ءۇشىن سان-سالالى ماڭىزى بار دەۋگە بولادى. ءبىر قۋانارلىعى، ءدال وسى «گەوپورتال» جۇيەسىنە رەسپۋبليكا بويىنشا ەڭ العاشقى بولىپ وبلىس ورتالىعىنان شالعاي ورنالاسقان شۋ اۋدانى قوسىلىپتى. اۋدان اكىمدىگى جەر قاتىناستارى ءبولىمىنىڭ باسشىسى دانيار ۋتەپوۆتىڭ ايتۋىنشا، عارىشتىق ناۆيگاسيالىق باقىلاۋ تەحنولوگيالارىن تەك اۋىل شارۋاشىلىعى سالاسىندا عانا ەمەس، سونىمەن بىرگە ۆەتەريناريا، قۇرىلىس جانە تاعى دا باسقا سالالاردا قولدانۋعا بولادى ەكەن.
– العاش رەت 2016 جىلى «قازاقستان عارىش ساپارى» ۇلتتىق كومپانياسى» اكسيونەرلىك قوعامىنىڭ وكىلدەرىنە ءبىزدىڭ تاراپىمىزدان ۇسىنىس ءبىلدىرىپ، بىرلەسە جۇمىس ىستەۋ جونىندە كەلىسىمشارت جاسادىق. بۇل ءۇشىن اۋدان قازىناسىنان 3 ميلليون 700 مىڭ تەڭگە قاراستىرىلعان ەدى. «گەوپورتال» جۇيەسىنىڭ ارتىقشىلىعى - عارىشتان تۇسىرىلگەن سۋرەتتەردىڭ ناقتى كولەمىن انىقتاپ، ونى ۇلكەيتىپ، بىزگە ىڭعايلى ەتىپ جاساپ بەرەدى. بۇعان دەيىن اۋداندىق جەر قاتىناستارى بولىمىندەگى ماماندار اۋدانداعى پايدالانۋسىز جاتقان جەرلەردى انىقتاۋ ءۇشىن اۋىل-اۋىلدى ارالاپ، كۇن ۇزاققا تىنىم تاپپايتىن. ونىڭ ۇستىنە كەيبىر شارۋاشىلىقتار جالعان اقپارات تا بەرىپ جاتادى. ياعني، قانشا جەردەن تىرىسقانىمىزبەن، ناقتى دەرەككە قول جەتكىزۋ قيىن بولاتىن. ال، «گەوپورتال» جۇيەسى وسى ولقىلىقتىڭ ورنىن تولتىرعانداي بولدى. نەگە دەسەڭىز، 2016 جىلعا دەيىن انىقتالعان پايدالانۋسىز جاتقان بوس جەرلەردىڭ كولەمى وسى جۇيەگە قوسىلعاننان كەيىن 30 پايىزعا دەيىن كۇرت ءوستى. ويتكەنى، عارىشتىق باقىلاۋ بارلىق اقپاراتتى دالمە-دال كورسەتەدى. وسىلايشا، 2016 جىلدىڭ وزىندە ءبىز اۋدان بويىنشا پايدالانىلماي جاتقان 10 مىڭ گەكتار جانە وتكەن جىلى 6 مىڭ گەكتار القاپتى مەملەكەت مەنشىگىنە قايتاردىق.،- دەيدى دانيار قۇتتىباي ۇلى.
سونىمەن قاتار، «قازاقستان عارىش ساپارى» ۇلتتىق كومپانياسى» اكسيونەرلىك قوعامى ءوز قىزمەتتەرىن وڭتايلاندىرىپ، جىل سايىن پايدالى مالىمەتتەر قورىن ۇسىنىپ وتىرادى ەكەن. ءبولىم باسشىسى الداعى ۋاقىتتا، وسى جۇيە ارقىلى جەر استى سۋىنىڭ مولشەرىن، ونىڭ قاي دەڭگەيدە ورنالاسقانىن جانە توپىراقتىڭ دا قۇنارلىعىن انىقتاۋعا بولاتىنىن ايتادى.
