«Geoportal» kóp iske kómegin tigizýde
Aldymen, «Qazaqstan Ǵarysh Sapary» Ulttyq kompaniiasy» aktsionerlik qoǵamy usynatyn atalmysh júiege qysqasha toqtalsaq. Jerdi qashyqtyqtan zondtaý qos qurylymnan turatyn jáne jer betindegi qandai da bir ózgeristerdi baqylaýǵa arnalǵan qazirgi zamanǵy júie nemese ozyq tehnologiialardyń jiyntyǵy. Dálirek aitqanda, jerdiń sýretin túsiretin arnaiy qurylǵylarmen, baǵdarlamalarmen jáne kemeniń qyzmet etýine qajetti basqa da quraldarmen jabdyqtalǵan belgili bir orbitada ushyp júretin ǵaryshtyq keme. Onyń óńirlerdegi paidalanýsyz jatqan jerlerdi jáne olardyń naqty aýmaǵyn anyqtaý sekildi jumystardy atqarýda tigizer paidasy orasan zor. Qysqasha aitqanda, bul istiń elimiz úshin san-salaly mańyzy bar deýge bolady. Bir qýanarlyǵy, dál osy «Geoportal» júiesine respýblika boiynsha eń alǵashqy bolyp oblys ortalyǵynan shalǵai ornalasqan Shý aýdany qosylypty. Aýdan ákimdigi jer qatynastary bóliminiń basshysy Daniiar Ýtepovtyń aitýynsha, ǵaryshtyq navigatsiialyq baqylaý tehnologiialaryn tek aýyl sharýashylyǵy salasynda ǵana emes, sonymen birge veterinariia, qurylys jáne taǵy da basqa salalarda qoldanýǵa bolady eken.
– Alǵash ret 2016 jyly «Qazaqstan Ǵarysh Sapary» Ulttyq kompaniiasy» aktsionerlik qoǵamynyń ókilderine bizdiń tarapymyzdan usynys bildirip, birlese jumys isteý jóninde kelisimshart jasadyq. Bul úshin aýdan qazynasynan 3 million 700 myń teńge qarastyrylǵan edi. «Geoportal» júiesiniń artyqshylyǵy - ǵaryshtan túsirilgen sýretterdiń naqty kólemin anyqtap, ony úlkeitip, bizge yńǵaily etip jasap beredi. Buǵan deiin aýdandyq jer qatynastary bólimindegi mamandar aýdandaǵy paidalanýsyz jatqan jerlerdi anyqtaý úshin aýyl-aýyldy aralap, kún uzaqqa tynym tappaityn. Onyń ústine keibir sharýashylyqtar jalǵan aqparat ta berip jatady. Iaǵni, qansha jerden tyrysqanymyzben, naqty derekke qol jetkizý qiyn bolatyn. Al, «Geoportal» júiesi osy olqylyqtyń ornyn toltyrǵandai boldy. Nege deseńiz, 2016 jylǵa deiin anyqtalǵan paidalanýsyz jatqan bos jerlerdiń kólemi osy júiege qosylǵannan keiin 30 paiyzǵa deiin kúrt ósti. Óitkeni, ǵaryshtyq baqylaý barlyq aqparatty dálme-dál kórsetedi. Osylaisha, 2016 jyldyń ózinde biz aýdan boiynsha paidalanylmai jatqan 10 myń gektar jáne ótken jyly 6 myń gektar alqapty memleket menshigine qaitardyq.,- deidi Daniiar Quttybaiuly.
Sonymen qatar, «Qazaqstan Ǵarysh Sapary» Ulttyq kompaniiasy» aktsionerlik qoǵamy óz qyzmetterin ońtailandyryp, jyl saiyn paidaly málimetter qoryn usynyp otyrady eken. Bólim basshysy aldaǵy ýaqytta, osy júie arqyly jer asty sýynyń mólsherin, onyń qai deńgeide ornalasqanyn jáne topyraqtyń da qunarlyǵyn anyqtaýǵa bolatynyn aitady.
