سوزاق اۋدانى تۇرعىندارىمەن كەزدەسۋگە «اتامەكەن» شارۋا قوجالىعىنا ارنايى كەلگەن وبلىس اكىمى ديقاندار مەن جەرگىلىكتى كاسىپكەرلەرمەن كەزدەسىپ، سۇراقتارى مەن ۇسىنىستارىن تىڭدادى. ءوڭىر باسشىسى سۋ ۇنەمدەۋ تەحنولوگياسىن ەنگىزۋ ماڭىزدى ەكەنىن جەتكىزدى.
– ءبىز شارۋالارعا سەمينارلار وتكىزىپ، تامشىلاتىپ سۋعارۋ جانە جاڭبىرلاتىپ سۋعارۋ تاسىلدەرىن ەنگىزىپ جاتىرمىز. سوزاق اۋدانىندا دا باقشا داقىلدارىنان ونىمدىلىكتى ارتتىرۋعا مۇمكىندىك مول. جالپى سوزاق اۋدانىنىڭ الەۋەتى وتە جوعارى. سونىڭ ىشىندە اۋىل شارۋاشىلىعى سالاسىندا مول تابىسقا جەتۋگە بولادى، – دەگەن ءومىرزاق شوكەيەۆ شارۋا قوجالىعىنىڭ باستامالارىن جوعارى باعالادى.
بۇگىندە «اتامەكەن» شارۋا قوجالىعى جاڭبىرلاتىپ سۋعارۋ تەحنولوگياسىن پايدالانىپ وتىر. 40 گەكتاپ القاپتا مال ازىعى ەگىلگەن.
ودان كەيىن وبلىس اكىمى مەملەكەتتىك باعدارلامالاردىڭ كومەگىمەن كاسىبىن باستاعان ازاماتتار مەن تاۋار وندىرۋشىلەردىڭ كورمەسىن تاماشالادى. مەملەكەتتىك گرانت يەگەرلەرى بيزنەس باستاپ، تىگىنشىلىك كاسىپتى يگەرگەن. نان جانە ءسۇت ونىمدەرىن شىعارۋعا اتسالىسىپ، بالىق، ەت ساتۋ بيزنەسىن دامىتۋدا.
ورتالىق الاڭدا حالىقپەن كەزدەسكەن ءومىرزاق شوكەيەۆكە تۇرعىندار تاراپىنان سان ءتۇرلى باعىتتا سۇراقتار قويىلدى. سوزاقتىقتار تۇركىستان مەن سوزاق اراسىنداعى جول ماسەلەسىن، بالدىسۋ ەلدى مەكەنىن سۋمەن قامتۋ، قۇمكەنت اۋىلىنا جول سالۋ، مەديسينا جانە جەدەل جاردەم سالاسىنداعى اۋرە-سارساڭ، سپورت كەشەنى تاپشىلىعى، اۋداندى گازداندىرۋ، اۋىل شارۋاشىلىعىنا نەسيە بەرۋ جانە وزگە دە تۇيتكىلدەردى قوزعادى. ءوڭىر باسشىسى الدىمەن ەلدەگى ساياسي رەفورمالارعا توقتالىپ، سۇراقتارعا جاۋاپ بەردى.
– ەل پرەزيدەنتى قاسىم-جومارت توقايەۆ بيىلعى جولداۋىندا 10 باعىتتان تۇراتىن جاڭا ساياسي رەفورمالارىن ۇسىندى. سايلاۋ جۇيەسىنە وزگەرىستەر ەنگىزدى. كۇنى كەشە «Amanat» پارتياسى ءتوراعالىعىن دا تاپسىردى. قازىرگى تاڭدا ەلىمىزدە داعدارىسقا قارسى كەشەندى شارالار قابىلدانۋدا. اكىمدەرگە، ساياسي ۇيىمدارعا، پارلامەنتكە ناقتى مىندەتتەر جۇكتەلدى. بۇگىن وسى رەفورمالارعا سايكەس وزدەرىڭىزبەن جۇزدەسىپ تۇرمىن.
بۇرىن وداق تۇسىندا سوزاقتى دەپرەسسيۆتى ايماققا جاتقىزاتىندار بولعان. مەن مۇنىمەن كەلىسپەيمىن. كەرىسىنشە، سوزاقتىڭ بولاشاعى وتە جارقىن دەپ ەسەپتەيمىن. ۋران قورى، فوسفور كەنىشى جانە اۋىل شارۋاشىلىعىن دامىتۋعا قولايلى اۋماعى بار. بۇل جاقتىڭ ماسەلەلەرىن دە بىلەمىن. سىزدەر كوتەرگەن گاز ماسەلەسى ءبىزدىڭ نازارىمىزدا تۇر. شولاققورعانعا گاز تارتۋ جۇمىسى ءجۇرىپ جاتىر. ول الداعى ۋاقىتتا شەشىلەدى. جول قۇرىلىسى دا اياقتالادى. جالپى ەكى جىلدا سوزاقتاعى قاناعاتتانارلىق دەڭگەيدەگى جولداردىڭ ۇلەسى 80-90 پايىزعا جەتەدى دەپ ويلايمىن. شولاققورعاندا مەكتەپ سالىنادى. جەدەل جاردەمگە قاتىستى ۇسىنىس تا قارالىپ، زاڭ اياسىندا شەشىم قابىلدايمىز، – دەدى ءومىرزاق شوكەيەۆ.
كەزدەسۋدەن كەيىن وبلىس اكىمى تۇرعىنداردى جەكە قابىلداپ، مۇڭ-مۇقتاجدارىن تىڭدادى. 20-عا جۋىق سوزاقتىق تۇرعىن جەكە ماسەلەسى بويىنشا ءوڭىر باسشىسىمەن جۇزدەستى.
سوزاق اۋدانىندا 2021 جىلى اۋىل شارۋاشىلىعى سالاسىنداعى جالپى ءونىم كولەمى 17، 6 ملرد تەڭگە بولىپ، 2020 جىلدىڭ وسى مەرزىمىمەن سالىستىرعاندا ارتا تۇسكەن. اۋىل شارۋاشىلىعىنىڭ نەگىزگى كاپيتالىنا 320 ملن تەڭگە ينۆەستيسيا تارتۋ مەجەلەنسە، 378،3 ملن تەڭگە تارتىلعان. اۋدان بويىنشا بىلتىر 14 مىڭ گەكتار القاپقا ەگىس ەگىلدى. سونداي-اق، ەگىس كولەمىن ارتتىرۋ ماقساتىندا Cوزاق اۋىل وكرۋگىندەگى «سۋىندىق» كانالىن كۇردەلى جوندەۋ جۇمىستارىنا وبلىستىق بيۋدجەتتەن قارجى ءبولىنىپ، 3704 لوتوك اۋىستىرىلىپ، 13 شليۋز قويىلىپ، پايدالانۋعا بەرىلگەن.
وبلىس اكىمىنىڭ تاپسىرماسىنا سايكەس، «ەڭبەك» مەملەكەتتىك باعدارلاماسىنا قاتىسۋشىلارعا مەملەكەتتىك گرانتتار بەرۋ جۇمىسى جاندانعان. وسى ارقىلى جەكە قوسالقى شارۋاشىلىقتاردا ۇيىرگەلىك جەرلەرىن دامىتۋ بويىنشا 52 ازامات 29 ملن. تەڭگە گرانت قارجىسىنا يە بولعان. سول ارقىلى تامشىلاتىپ سۋعارۋ قوندىرعىلارىن ورناتىپ، 5،2 گەكتار اۋماققا كوكونىس، باقشا داقىلدارىن ەككەن. ايتا كەتەرلىگى، «بولىس اتا» شارۋا قوجالىعى 143 توننا باقشا (قاربىز) داقىلدارىن رەسەيدىڭ ۋفا قالاسىنا ەكسپورتتادى.
اۋدانداعى ءبىرقاتار شارۋا قوجالىقتارى اعىن سۋدى ۇنەمدەۋ ماقساتىندا جاڭبىرلاتىپ سۋعارۋ قوندىرعىسىن ساتىپ العان. جايىلىمداردى سۋلاندىرۋ ماقساتىندا 73 قۇدىق قازىلعان.
