ادامزات ايعا قايتا ورالۋ داۋىرىنە قادام باستى. «ارتەميس» باعدارلاماسى اياسىندا جۇرگىزىلىپ جاتقان زەرتتەۋلەر عارىش عىلىمىنداعى جاڭا كەزەڭنىڭ باستالعانىن كورسەتەدى. بۇل تۋرالى نازاربايەۆ ۋنيۆەرسيتەتىنىڭ وقىتۋشىسى، استروفيزيك بەكداۋلەت شۇكىرعالييەۆ ايتتى، دەپ حابارلايدى Dalanews.kz
«ارتەميس» باعدارلاماسى اياسىندا ءتورت استروناۆت ايدىڭ ارعى بەتىن زەرتتەپ، سۋرەتكە ءتۇسىرۋ ءۇشىن جىبەرىلگەن بولاتىن. عالىمنىڭ ايتۋىنشا، مۇنداعى ميسسيالاردىڭ باستى ماقساتى – اي بەتىندە بولىپ جاتقان تابيعي پروسەستەردى تەرەڭىرەك ءتۇسىنۋ.
نەگىزگى عىلىمي باعىتتاردىڭ ءبىرى – اي بەتىنە تۇسەتىن سوققىلاردى زەرتتەۋ. ياعني، ءارتۇرلى اسپان دەنەلەرى ايعا قانشالىقتى ءجيى قۇلايدى جانە ولاردىڭ اسەرى قانداي – وسى سۇراقتارعا جاۋاپ ىزدەلۋدە، - دەيدى عالىم.
ونىڭ سوزىنشە، بۇل زەرتتەۋلەر تەك ايدى عانا ەمەس، جالپى كۇن جۇيەسىندەگى پروسەستەردى تۇسىنۋگە مۇمكىندىك بەرەدى. سونداي-اق عالىم ادامزاتتىڭ ايعا قايتا بەت بۇرۋىن تاريحي وقيعا دەپ باعالايدى.
بۇعان دەيىن «اپوللون» باعدارلاماسى ارقىلى امەريكالىقتار اي بەتىنە قونعان. كەيىن بۇل باعىتتاعى جۇمىستار ۇزاق ۋاقىت توقتاپ قالدى. ءقازىر بۇل زەرتتەۋلەر قايتا جاندانىپ وتىر. بۇل – عارىش سالاسىنداعى ۇلكەن سەرپىلىس، - دەيدى ول.
بەكداۋلەت شۇكىرعالييەۆ قازاقستاندا دا ايدى زەرتتەۋگە قاتىستى جوبالار بار ەكەنىن اتاپ ءوتتى.
قازىرگى تاڭدا فيزيكا-استرونوميا ينستيتۋتى مەن عىلىمي ۇيىمدار ايدى اينالىپ جۇرەتىن تەلەسكوپ جوباسىن ازىرلەۋدە. ەگەر بۇل باعدارلاما الداعى ونجىلدىقتا ىسكە اسسا، قازاقستان ءۇشىن جاڭا عىلىمي مۇمكىندىك اشىلادى، - دەيدى استروفيزيك.
ونىڭ ايتۋىنشا، مۇنداي جوبالار ەلدىڭ عىلىمي الەۋەتىن ارتتىرىپ، حالىقارالىق دەڭگەيدەگى زەرتتەۋلەرگە جول اشادى.
