ءىس-شارادا اسسامبلەيانىڭ قازاقستان تاريحىنداعى ورنى، ونىڭ ەگەمەندىكتى بەكىتە تۇسۋگە قوسقان ۇلەسى ەگجەي-تەگجەي ايتىلدى.
جيىننىڭ شىمىلدىعىن تۇرگەن قحا ءتوراعاسىنىڭ ءبىرىنشى ورىنباسارى مارات ءادىلحانوۆ ۇيىمنىڭ وسى 30 جىلدا اتقارعان ءىسىن وي ەلەگىنەن وتكىزىپ، ءوز باعاسىن بەردى.
ونىڭ ايتۋىنشا اسسامبلەيا ەلىمىزدەگى ءتىلى مەن ءدىلى بولەك ۇلت پەن ۇلىستىڭ باسىن قوسىپ، تىنىشتىق پەن تۇراقتىلىقتىڭ ۇيىتقىسى بولا ءبىلدى.
"بيىلعى جىلى ەلىمىزدىڭ ەگەمەندىك العانىنا 30 جىل تولىپ وتىر. ەلباسىنىڭ ساۋاتتى ساياساتى مەن شەبەر شەشىمدەرىنىڭ ناتيجەسىندە قازاقستان ءتۇرلى ساياسي-الەۋمەتتىك دۇمپۋلەردى اينالىپ ءوتتى. ەلىمىزدە تاتۋلىق پەن كەلىسىمنىڭ وزىندىك ۇلگىسى قالىپتاستى"، – دەدى ول.
ونىڭ اتاپ وتكەنىندەي اسسامبلەيانىڭ قۇرىلۋى اسا ماڭىزدى كەزەڭدە جاسالعان تاڭداۋ بولدى ءارى بۇل شەشىم ءوزىنىڭ وزەكتىلىگى مەن ومىرشەڭدىگىن دالەلدەدى.
تاۋەلسىزدىكتىڭ ەلەڭ-الاڭىندا نازاربايەۆ باستاماسىمەن قۇرىلعان ۇيىمنىڭ نەگىزگى ماقساتى - ەلىمىزدەگى بارشا ەتنوستاردىڭ مۇددەسىن قورعاۋ ەدى، اسسامبلەيا بۇل ميسسيانى ويداعىداي ورىنداعان.
“وسىلايشا 1995 جىلى قازاقستان حالقى اسسامبلەياسىنىڭ ىرگەتاسى قالاندى. اسسامبلەيا مۇشەلەرى مەملەكەتتىڭ وركەندەۋىنە مەن قالىپتاسۋىنا وتە ۇلكەن ۇلەس قوسىپ وتىر. مەملەكەتىمىزدىڭ قازىرگى جەتىستىكتەرىن ماقتان ەتە الامىز"، - دەدى اسسامبلەيا ءتوراعاسىنىڭ ورىنباسارى.
ال ۇيىمنىڭ عىلىمي-ساراپتامالىق كەڭەسى ۇلتتى ۇيىستىرۋعا قانداي ۇلەس قوستى؟ وسى باعىتتا قانداي عىلىمي زەرتتەۋلەر جاسالدى؟
مارات ءادىلحانوۆتىڭ ايتۋىنشا، وسىناۋ كەڭەستىڭ بارلىق مۇشەلەرى قوعامدىق-ساياسي جۇمىستا بەلسەندىلىك تانىتىپ ءجۇر. قازاقستانداعى تۇراقتىلىق پەن تاتۋلىقتىڭ نەگىزگى فاكتورلارىن قاراستىرىپ، تۇراقتى تۇردە ءتۇرلى-تۇرلى ماڭىزدى زەرتتەۋلەر جۇرگىزۋدە.
“اسسامبلەياعا قاراستى ساراپشىلار مەن مامانداردىڭ قولىنان شىققان عىلىمي زەرتتەۋلەر جوعارى سۇرانىسقا يە. اسسامبلەيا جۇمىسىن عىلىمي تۇرعىدان تالداۋدا اۋقىمدى جۇمىس اتقارىلدى. عىلىمي-ساراپتامالىق كەڭەس ەگەمەن قازاقستاننىڭ ءارى قاراي وركەندەۋىنە ءوز ۇلەسىن قوسا بەرەدى»، - دەدى ول.
