فرانسيانىڭ لازۋر جاعالاۋىنداعى قايرات ساتىبالدى مەن ونىڭ جۇبايىنا تيەسىلى بولعان ءتورت پاتەر شەتەلدىك جىلجىمايتىن مۇلىك اگەنتتىكتەرى ارقىلى ساتىلىمعا قويىلدى. ولاردىڭ جالپى قۇنى شامامەن 8،7 ملن ەۋروعا باعالانىپ وتىر، دەپ حابارلايدى Dalanews.kz.
فبرك تەلەگرام ارناسى ۇسىنعان مالىمەتكە سايكەس، پاتەرلەر انتيب مۇيىسىندەگى Parc du Cap تۇرعىن ءۇي كەشەنىندە ورنالاسقان. ءار پاتەردە ءۇش جاتىن بولمە، قوناق بولمە، ءاسۇي مەن بالكون بار، بارلىعى تولىق جيھازدالعان. تەرەزەلەرىنەن تەڭىز كورىنىسىن تاماشالاۋعا بولادى. كەشەن اۋماعىندا كۇزەت، جەراستى اۆتوتۇراعى، سپورتزال، سپا-ايماق، باسسەين جانە ساۋنا قاراستىرىلعان.
بۇعان دەيىن بۇل نىساندار ساتىبالدىنىڭ جۇبايىنا تيەسىلى بولعانى ايتىلعان. اكتيۆتەر تاركىلەنگەننەن كەيىن ولاردى مەملەكەت قايتارىلعان مۇلىكتى باسقارۋ كومپانياسى باقىلاۋىنا العان بولۋى مۇمكىن.
سونىمەن قاتار قازاقستاندا دا ساتىبالدىعا قاتىستى تاركىلەنگەن اكتيۆتەر ساتىلىمعا شىعارىلىپ جاتىر. الداعى ۋاقىتتا الماتىداعى "Kaisar Plaz" ساۋدا-وفيس ورتالىعىن، سونداي-اق DoubleTree by Hilton ءقوناقۇيى مەن "بايسات" بازارىن ساتۋ جوسپارلانعان.
ەسكە سالايىق، قايرات ساتىبالدى 2022 جىلى سوت شەشىمىمەن التى جىلعا سوتتالعان ەدى. كەيىن جازا مەرزىمى بوستاندىعىن شەكتەۋمەن الماستىرىلعان. مەملەكەتكە قايتارىلعان اكتيۆتەردىڭ جالپى قۇنى 732،8 ملرد تەڭگەگە باعالاندى.
