امەريكالىق Veeam Software جانە Object First IT-كومپانيالارىنىڭ نەگىزىن قالاۋشى اندرەي بارونوۆ پەن راتمير تيماشيەۆ رەسەي ازاماتتىعىنان باس تارتتى، دەپ حابارلايدى Dalanews.kz.
اندرەي بارونوۆ بۇل شەشىمگە رەسەيدىڭ ۋكرايناعا باسقىنشىلىق ساياساتى تۇرتكى بولعانىن جەتكىزىپ،ۇرىستى سىنعا الدى. كاسىپكەرلەر رەسەيلىك ءتولقۇجاتقا سايكەس سوڭعى ەكى جىلدا Forbes تىزىمىندە قازىرگى جانە بۇرىنعى قاتىسۋشىلاردىڭ اراسىنان سەگىزىنشى جانە توعىزىنشى ورىنعا جايعاسقان بولاتىن.
ولار 2017-2021 جىلدار ارالىعىندا بەس جىل بويى "رەسەيدەگى ەڭ باي 200 كاسىپكەر" رەيتينگىندە توبە كورسەتكەن. اندرەي بارونوۆ پەن راتمير تيماشيەۆتىڭ رەسەي فەدەراسياسىنىڭ ازاماتتىعىنان باس تارتقانى تۋرالى مالىمدەمەسىن كاسىپكەرلەردىڭ دوسى حابارلاعان. ونىڭ ايتۋىنشا، تيماشيەۆ پەن بارونوۆ رەسەيدىڭ كيپر رەسپۋبليكاسىنىڭ ەلشىلىگىنە وتكەن جانە قازىرگى تاڭدا كاسىپكەرلەر تەك كيپر ازاماتتىعىندا قالعان. ەكەۋى دە ۇزاق ۋاقىت بويى شەتەلدە تۇرادى ەكەن. بارونوۆ شۆەيساريادا، ال تيماشيەۆ اقش-تا.
اندرەي بارونوۆ رەسەي ازاماتتىعىنان باس تارتۋعا ءوتىنىش قالدىرعانىن LinkedIn الەۋمەتتىك جەلىسىندەگى (رەسەيدە بۇعاتتالعان) پاراقشاسىندا جاريالاعان بولاتىن. سايت پروفيلىندە اۆتور ءوزى تۋرالى ءبىراز اقپارات بەرگەن. مۇندا ول MIPT تۇلەگى ەكەنىن جانە قازىرگى تاڭدا شۆەيساريادا ءومىر ءسۇرىپ جاتقانىن حابارلايدى.ءوزىنىڭ سوڭعى جاريالانىمىندا بارونوۆ اقش پەن باتىس ەۋروپادا باعدارلامالىق جاساقتامانى ازىرلەۋ بويىنشا ەكى كومپانيا قۇرعانىن اتاپ وتكەن. سونىمەن قاتار كاسىپكەر "رەسەيدىڭ ۋكرايناعا جاساعان باسقىنشىلىق شابىلۋىنا قاتتى الاڭدايتىنىن" جەتكىزگەن.
"مەن جەكە اداممىن جانە ساياسات تۋرالى ەشقاشان اشىق پىكىر بىلدىرمەگەنمىن. الايدا رەسەيدىڭ ۋكرايناعا جاساعان ارنايى شابۋىلىنا قاتتى تاڭقالدىم"، - دەپ جازدى اندرەي بارونوۆ.
وسى تۇستا بارونوۆ ۋكراينا بوسقىندارىنا كومەكتەسكەن "بەدەلدى گۋمانيتارلىق ۇيىمدارعا" ميلليونداعان دوللار بەرگەنىن دە جاسىرمادى.
اندرەي بارونوۆ 2023 جىلدىڭ ساۋىرىندە رەسەي ازاماتتىعىنان شىعۋعا تالپىنعان. بۇل ماسەلە سول جىلدىڭ جەلتوقسانىندا شەشىمىن تاپقان. ال راتمير تيماشيەۆ 2024 جىلدىڭ قاڭتارىندا رەسەي ازاماتتىعىنان باس تارتقان.
بۇعان دەيىن مۇنداي شەشىمدى ميللياردەر تيمۋر تۋرلوۆ (Freedom Holding)، يۋريي ميلنەر (DST Global)، نيكولاي ستورونسكيي (ريەۆوليۋت)، يگور ماكاروۆ (ارەتي)، Coalco نەگىزىن قالاۋشى ۆاسيليي انيسيموۆ، ترويكا ديالوگىنىڭ نەگىزىن قالاۋشى رۋبەن ۆاردانيان جانە بۇرىنعى ميللياردەر Tinkoff Bank نەگىزىن قالاۋشى ولەگ تينكوۆ قابىلداعان بولاتىن.
ەسكە سالايىق، 2020 جىلى Forbes اندرەي بارونوۆتىڭ بايلىعىن 770 ميلليون دوللارعا، راتمير تيماشيەۆتىڭ بايلىعىن 680 ميلليون دوللارعا باعالادى.
تيماشيەۆ پەن بارونوۆ 2006 جىلى Veeam كومپانياسىن قۇرىپ، وعان 10 ميلليون دوللارعا جۋىق ينۆەستيسيا سالعان.
Insight Partners-پەن ترانزاكسيادان كەيىن تيماشيەۆ پەن بارونوۆ Veeam-گە كەڭەس بەرۋدى جالعاستىرۋدا. 2023 جىلدىڭ اقپانىندا سەرىكتەستەر قۇراما شتاتتاردا Object First كومپانياسىن قۇردى. بۇل Veeam كليەنتتەرى ءۇشىن تولەم باعدارلاماسىمەن قورعالعان ساقتىق كوشىرمە ساقتاۋ ءونىمىن ازىرلەيدى.
