«جاسىل» ەنەرگەتيكا مەن «جاسىل» سۋتەگىگە كوشۋ، ينفراقۇرىلىمدى دامىتۋ، ماڭىزدى شيكىزات رەسۋرستارى مەن كولىك دالىزدەرى ماسەلەلەرىنە ارنالعان شارانى ەۋروپالىق كوميسسيا پرەزيدەنتى ۋرسۋلا فون دەر ليايەن اشتى.
ساپار بارىسىندا قازاقستاندىق دەلەگاسيا سيرەك كەزدەسەتىن مەتالدار ماسەلەسىنە ارنالعان پانەلدى سەسسياعا قاتىسىپ، تاراپتارمەن ورتاق سەرىكتەستىك ماسەلەسىن تالقىلادى. سونداي-اق، يران شارحان ۇلى مەن ەرلان عالييەۆ ەۋروپالىق ۇيىمداردىڭ باسشىلارىمەن ءبىرقاتار ەكىجاقتى كەزدەسۋلەر وتكىزدى.
«اتالعان فورۋم اياسىنداعى – سيرەك كەزدەسەتىن مەتالداردى دامىتۋ تاقىرىبىنا ارنالعان سەسسيا ماڭىزدى ماسەلەلەردىڭ ءبىرى بولدى. سەسسيا بارىسىندا ەۋروپالىق ارىپتەستەرىمىزگە شيكىزات رەسۋرسىنا قاتىستى قازاقستان الەۋەتىن تانىستىردىق. كەزدەسۋلەردە قازاقستان مەن ەۋروپالىق وداق اراسىندا شيكىزات رەسۋرستارى، لوگيستيكا سالاسىنداعى ىنتىماقتاستىقتى ءارى قاراي دامىتۋ ماسەلەلەرى تالقىلاندى»،-دەدى ۆيسە-مينيستر يران شارحان ۇلى.
فورۋم بارىسىندا Global Gateway باعدارلاماسى اياسىندا ىسكە قوسىلعان العاشقى 89 فلاگماندىق جوبانى جۇزەگە اسىرۋ باستالدى. «Global Gateway» ۇيىمداستىرۋشىسى ەۋروپا وداعى.
ايتا كەتەيىك، «Global Gateway» فورۋمى ەو جانە سەرىكتەس ەلدەردەن 40-تان استام جوعارى لاۋازىمدى ۇكىمەت وكىلدەرى، قارجى ينستيتۋتتارى، سونىڭ ىشىندە ەۋروپالىق ينۆەستيسيالىق بانك جانە ەۋروپالىق قايتا قۇرۋ جانە دامۋ بانكى، جەكە سەكتوردىڭ، ازاماتتىق قوعام وكىلدەرىنىڭ باسىن قوسقان جيىن.
