قازاقستاننىڭ ەكس-پرەزيدەنتى نۇرسۇلتان نازاربايەۆتىڭ ءىنىسى، ۇلتتىق قاۋىپسىزدىك كوميتەتى (ۇقك) ءتوراعاسىنىڭ بۇرىنعى ءبىرىنشى ورىنباسارى سامات ءابىشتىڭ شارتتى تۇردە سوتتالعانى ەسكى قازاقستاننىڭ ەشقايدا كەتپەگەنىن كورسەتەدى.
بۇل ءماجىلىس دەپۋتاتى ەرمۇرات باپيدىڭ پايىمى، دەپ حابارلايدى Dalanews.kz
«ونىڭ (سامات ءابىش) 8 جىل شارتتى تۇردە باس بوستاندىعىنان ايىرىلۋى كۇلكىلى. مۇنداي ۇكىم، مۇنداي شەشىمدى بۇرىن-سوڭدى ەستىگەن ەمەسپىن. سەگىز جىل! ودان دا ءۇش جىلعا قاماۋعا العانى ءجون ەدى، تۇسىنەسىز بە؟ سوندىقتان بۇل شەشىم دە ەسكى قازاقستاننىڭ ىقپالىن جوعالتپاعانىن كورسەتەدى. قاڭتار وقيعاسىنا قاتىستى بارلىق جەدەل ىستەرمەن اينالىسقان مۇنداي ادام، شەنەۋنىك، ۇلتتىق قاۋىپسىزدىك كوميتەتىندەگى "ەكىنشى ادام" بار بولعانى شارتتى تۇردە جازالانسا، وندا ەسكى قازاقستاننىڭ ىقپالى ەلدە ءالى دە بار»، - دەدى ەرمۇرات باپي سارسەنبى كۇنى ءماجىلىس كۋلۋارىندا.
دەپۋتات بۇل "دات" گازەتىنىڭ رەداكسياسىنا تۇسكەن ينسايدەرلىك اقپارات ەكەنىن دە اتاپ ءوتتى.
«بۇل سوڭعى وتىز جىل ومىرىمدە قازاقستان تاريحىندا بولماعان وقيعا. 2005-2006 جىلدارى 6 جىل شارتتى مەرزىمگە مىرزاحمەتوۆتى سوتتاعان. 8 جىلعا شارتتى مەرزىم دەگەن بەسىكتەگى بالا كۇلەتىن جاعداي»، – دەدى سودان سوڭ ماجىلىسمەن.
جۋرناليستەر ودان «نازاربايەۆتىڭ تۋىسى بولعاننان كەيىن وسىنداي شەشىم قابىلداندى دەپ ويلايسىز با؟» دەپ سۇرادى.
ماجىلىسمەن مۇنداي شەشىم شىققانى مىندەتتى تۇردە نازاربايەۆتىڭ نەمەرە ءىنىسى بولعاسىن، ەكىنشىدەن ءبىز «ەسكى قازاقستاننان» ءالى دە الىستاپ كەتە الماعانىمىزدىڭ بەلگىسى دەپ سانايتىنىن اتاپ ءوتتى.
ايتا كەتەيىك، نازاربايەۆتىڭ نەمەرە ءىنىسى سامات ءابىش قاڭتار وقيعاسىنان كەيىن كوپ ۇزاماي ۇلتتىق قاۋىپسىزدىك كوميتەتى ءتوراعاسىنىڭ ءبىرىنشى ورىنباسارى قىزمەتىنەن ايىرىلدى.
قاڭتار وقيعاسىنا دەيىن ونىڭ ەسىمى بەيرەسمي تۇردە قازاقستان پرەزيدەنتى لاۋازىمىنا نەگىزگى ۇمىتكەرلەر قاتارىندا اتالدى. قاڭتار وقيعاسى بويىنشا سامات ءابىش جاي عانا كۋاگەر بولدى.
ال بۇگىن باس پروكۋراتۋرا جەلىدە تاراعان اقپاراتتارعا قاتىستى تۇسىنىك بەردى.
سوتتا پروكۋرور ايىپتى قولداپ، سوتتان ءابىشتى بەلگىلى ءبىر لاۋازىمداردى اتقارۋ قۇقىعىنان 10 جىلعا ايىرا وتىرىپ، 8 جىلعا باس بوستاندىعىنان ايىرۋ جازاسىن تاعايىنداۋدى سۇرادى. بۇل رەتتە قك-نىڭ 63-بابىنىڭ نەگىزىندە جازانى پروباسيالىق باقىلاۋ بەلگىلەي وتىرىپ، سول مەرزىمگە شارتتى تۇردە دەپ ساناۋدى ايقىندادى.
سوتتالۋشى كىناسىن تولىق مويىنداپ، شىن جۇرەكتەن وكىنگەن.
سوت ۇكىمىمەن سامات ءابىش ق ر قك 362-بابىنىڭ 4-بولىگىندە كوزدەلگەن قىلمىستى جاساعانى ءۇشىن كىنالى دەپ تانىلدى جانە 10 جىل مەرزىمگە بەلگىلى ءبىر لاۋازىمداردى اتقارۋ قۇقىعىنان ايىرىلا وتىرىپ، 8 جىلعا باس بوستاندىعىنان ايىرىلدى.
ق ر قك 63-بابى نەگىزىندە تاعايىندالعان جازانى شارتتى دەپ ساناۋ تۋرالى قاۋلى ەتىلدى.
سوت سوتتالۋشىنىڭ جاس بالالارىنىڭ بولۋىن جانە ونىڭ شىن جۇرەكتەن وكىنۋىن جازانى جەڭىلدەتەتىن ءمان-جايلار دەپ تانىدى. اۋىرلاتاتىن ءمان-جايلار انىقتالعان جوق.
