تۇركىستاندا ق ر پرەزيدەنتى قاسىم-جومارت توقايەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا ارناعان جولداۋىنا بايلانىستى اكتيۆ وتىرىسى ءوتتى.

وبلىس اكىمى ءومىرزاق شوكەيەۆ ق ر پرەزيدەنتىنىڭ جولداۋىندا ايقىندالعان باعىتتار ەلىمىزدىڭ ەكونوميكالىق ءوسىمىن جەدەلدەتىپ، حالىقتىڭ ءال-اۋقاتىن جاقسارتۋدا ماڭىزدى ءرول اتقاراتىنىنا توقتالدى.

ءوڭىر باسشىسىنان كەيىن ءسوز العان «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەن تاجىبايەۆ جەرگىلىكتى اتقارۋشى ورگاندارداعى پارتيا مۇشەلەرىنە ماسەلەنى جاسىرعاننان گورى جەدەل شەشكەن ءتيىمدى ەكەنىن ايتتى.

– بۇگىندە وبلىستا الەۋمەتتىك جاعدايدىڭ تومەندىگى، تۇرعىن ءۇي جانە جۇمىسقا ورنالاسۋ ماسەلەلەرى وتە وزەكتى. پارتيا فيليالى ءبىرىنشى كەزەكتە وسى باعىتتاعى پروبلەمالاردى جۇيەلى تۇردە شەشۋ ءۇشىن جەرگىلىكتى اكىمدىكتەرمەن، ءتيىستى باسقارمالارمەن جوسپار ءتۇزىپ، جۇرگىزەتىن بولادى. پرەزيدەنتتىڭ جولداۋدا ايتقان بارلىق ەلدىڭ وتىنىش-تىلەكتەرىن ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ءۇشىن ەكى باعىتتا جۇمىس جۇرگىزەمىز، – دەپ اتاپ ءوتتى.

اتاپ وتەيىك، تۇركىستان وبلىسى بويىنشا پرەزيدەنتتىڭ جولداۋدا ايتقان حالىقتىڭ وتىنىش-تىلەكتەرىن ءتيىمدى قاراستىراتىن تۇجىرىمدامانى ىسكە اسىرۋ ەكى باعىتتا جۇرگىزىلمەك. ەڭ الدىمەن، پارتيا فيليالىنىڭ قوعامدىق قابىلداۋ كەڭسەسى تۇركىستان قالاسىنداعى حالىق ەڭ ءجيى شوعىرلانعان الماتى ارباتىنداعى عيماراتتا «Open space» فورماتىنا كوشسە، ەكىنشىدەن بارلىق لاۋازىم يەلەرىنىڭ قابىلداۋلارىن الەۋمەتتىك جەلىلەردە تىكەلەي ەفير ارقىلى جۇرگىزۋ قولعا الىنباق.

سونىمەن قاتار، اكتيۆ جينالىسىندا پارتيا فيليالى جولداۋدى حالىققا ءتيىمدى ەتىپ ناسيحاتتاۋ ءۇشىن ەسكى فورماتتاعى كوپتەگەن جينالىستاردى توقتاتىپ، ەلدەگى شەشىمىن تاپپاعان ماسەلەلەرگە جاۋاپتى وكىلدەردى الىپ، ەلدىڭ ورتاسىنا شىعۋدى ۇسىندى. اتاپ ايتقاندا، كاسىپورىن اۋلاسىندا، بازارلاردا، الاڭداردا، ساياباقتاردا، ەگىستىك القاپتارىندا، فەرمالاردا اشىق اسپان اياسىندا گالستۋكسىز كەزدەسۋلەر وتكىزۋ قاجەت. ال تۇرعىندار سالا ماماندارىنا تىكەلەي ساۋال قويىپ، جاۋابىن الۋ كەرەك.

جالپى، جىل باسىنان بەرى «Nur Otan» پارتياسى تۇركىستان وبلىستىق فيليالىنىڭ قوعامدىق قابىلداۋ بولمەسىنە 5204 ارىز-شاعىم تۇسكەن. ونىڭ 2747ء-سى وڭتايلى شەشىلىپ، 2289 وتىنىشكە زاڭ اياسىندا كەڭەستەر بەرىلگەن. 168 ءوتىنىش بۇگىندە قارالۋ ۇستىندە.

حالىقتان تۇسكەن 5204 ارىز-شاعىمدى تالداي كەلە، وبلىس تۇرعىندارىن تومەندەگىدەي ماسەلەلەردىڭ 2148 – الەۋمەتتىك كومەككە مۇقتاجدىق بويىنشا؛ 1629– تۇرعىن ۇيگە جانە جەرگە مۇقتاجدىق بويىنشا؛ 454– جۇمىسقا ورنالاسۋ، زاڭسىز جۇمىستان شىعارۋ، ەڭبەك اقى ءوندىرۋ ماسەلەسى. شاعىمداردى ايماقتارعا بولگەندە كەلەس، ورداباسى، جەتىساي اۋداندارى كوش باستاپ تۇر.