قازىرگى كارانتيندىك شەكتەۋلەرگە بايلانىستى الاتاۋ اۋدانى اكىمدىگىنىڭ عيماراتىنا كىرۋ شەكتەۋلى جانە Ashyq ارقىلى. جۋرناليست ا.تاڭىربەرگەن مەن وپەراتور ستاتۋستارىن سكانەرلەمەگەن جانە تۋرنيكەتتىڭ استىنان وتپەي كىرگەن، ونى دالەلدەيتىن بەينەجازبا بار. ب ا ق وكىلدەرى كۇزەت قىزمەتكەرلەرىنىڭ ەسكەرتۋلەرىن تىڭداماي، ونىڭ اقىرى وسىنداي جاعدايعا اكەلدى، دەپ حابارلادى اكىمدىكتىڭ باسپا ءسوز قىزمەتى.
اكىمدىك كۇزەت قىزمەتكەرىنىڭ بۇل تىرلىگىن قۇپتامايمىز دەگەن سىڭاي تانىتىپ وتىر. كۇزەتشىگە قاتىستى قىزمەتتىك تەكسەرۋ باستالعانىن مالىمدەدى. تەكسەرۋ ناتيجەسى بويىنشا ونى جاۋاپكەرشىلىككە تارتۋ جاعى قاراستىرىلادى.
بۇل وقيعاعا بايلانىستى ق ر اقپارات جانە قوعامدىق دامۋ ءمينيسترى ايدا بالايەۆا دا ءوز ويىن ءبىلدىردى:
"وزدەرىڭىزگە ءمالىم، الماتى قالاسى، الاتاۋ اۋدانى اكىمدىگى قىزمەتكەرىنىڭ جۋرناليست اقبوپە تاڭىربەرگەنگە كۇش قولدانعان تەرىس ارەكەتى ينتەرنەت جەلىسىندە قىزۋ تالقىلانىپ جاتىر.
اۋداندىق اكىمدىكتىڭ جاۋاپتى تۇلعالارىنىڭ بۇعان قاتىستى ەش شارا قولدانباۋى ماسەلەنى ءتىپتى دە ۋشىقتىرىپ وتىر. بۇل ارينە وتە وكىنىشتى جانە ءبىزدىڭ بۇگىنگى “ەستيتىن مەملەكەت”، “اشىق اكىمدىك” قاعيدالارىنا قايشى كەلەتىن جاعداي.
جۋرناليستەردىڭ قۇقىعىن بۇزۋعا، ولاردىڭ رەسمي جۇمىسىنا كەدەرگى كەلتىرىپ، كۇش كورسەتۋگە ەشقاشان جول بەرىلمەۋى كەرەك. ولار وزدەرىن قاي جەردە دە ەركىن سەزىنۋى ءتيىس.
ب ا ق وكىلدەرى ەلىمىزدىڭ ءتيىستى زاڭنامالارى مەن ءنورماتيۆتى-قۇقىقتىق اكتىلەرىنە سايكەس قاجەتتى تولىققاندى اقپارات الۋعا قاي كەزدە دە قۇقىلى. بۇل جاعدايعا قاتىستى، الماتى قالاسى اكىمدىگىنىڭ باسشىلىعى قىزمەتتىك تەكسەرۋ جۇرگىزىپ، ءتيىستى شارالار قابىلداۋى قاجەت دەپ سانايمىن. كىنالى تۇلعالار جاۋاپقا تارتىلۋى ءتيىس. الداعى ۋاقىتتا قاي جەردە بولماسىن، ب ا ق وكىلدەرىنە قاتىستى بۇنداي كەلەڭسىز جاعدايلارعا جول بەرىلمەۋى قاجەت، دەلىنگەن ءمينيستردىڭ جازباسىندا.
"حابار 24" تەلەارناسىنداعى "اكىمدەر" باعدارلاماسىن جۇرگىزەتىن جۋرناليست اقبوپە تاڭىربەرگەن اكىمدىككە بەلگىلەنگەن ۋاقىتتا كەلگەن ەكەن. ءبىراق اكىمدىكتىڭ ىشىندەگىلەر ونى قابىلداۋعا قۇلىقسىز بولعانعا ۇقسايدى. كۇزەتشى جۋرناليست قىزدى دورەكى تۇردە كوتەرىپ الىپ، ەسىكتىڭ سىرتىنا شىعارىپ تاستاعان.
https://youtu.be/DdtbXt2mcYE
