2024 جىلعى 27 جەلتوقساندا ق ر پرەزيدەنتى قاسىم-جومارت توقايەۆ ەسىرتكى ءوندىرۋ جانە ونى تاراتۋدى ۇيىمداستىرعانى ءۇشىن قولدانىلاتىن جازانى قاتاڭداتۋدى، سونداي-اق ەسىرتكى جاسىرۋمەن العاش ۇستالعان قىلمىسكەرلەردىڭ جازاسىن جەڭىلدەتۋدى قاراستىراتىن زاڭعا قول قويدى. بۇل زاڭ 2025 جىلدىڭ 3 ناۋرىزىنان باستاپ كۇشىنە ەنەدى.
قابىلدانعان زاڭعا سايكەس ەسىرتكى جاسىرۋشىلارعا قاتىستى جازا جەڭىلدەتىلسە، ەسىرتكى ءوندىرۋ مەن تاراتۋدى ۇيىمداستىرۋشىلارعا جازا قاتاڭداتىلدى.
وسى رەتتە، "امانات" پارتياسىنىڭ اتىراۋ وبلىستىق فيليالىندا اتىراۋ وبلىسى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەن قالالىق جانە وبلىستىق جاستار ءماسليحات دەپۋتاتتارى، قوعام بەلسەندىلەرى جانە «جاستار رۋحى» قوعامدىق قورىنىڭ ەرىكتىلەرىمەن بىرلەسكەن دوڭگەلەك ۇستەل وتكىزىلدى. جيىن بارىسىندا زاڭعا ەنگىزىلگەن باستى وزگەرىستەر مەن جاستار اراسىندا قۇقىقتىق ساۋاتتىلىقتى ارتتىرۋ شارالارى ءتۇسىندىرىلدى.
- بۇل زاڭ قازاقستاندا قىلمىستىق جاۋاپكەرشىلىك جۇيەسىن جەتىلدىرۋ ارقىلى ەسىرتكى ءوندىرىسىن، ونى تاراتۋدى ۇيىمداستىرۋدى جانە ەسىرتكى قىلمىسىنا قاتىسۋشىلاردى جاۋاپكەرشىلىككە تارتۋدى كۇشەيتەدى. ەسىرتكىنى ءوندىرىپ، وڭدەپ نەمەسە دايىنداعاندار قاماۋعا 15 جىلدان 20 جىلعا دەيىنگى مەرزىمگە الىنىپ نەمەسە مۇلكى تاركىلەنە وتىرىپ، ءومىر بويىنا باس بوستاندىعىنان ايىرىلادى. ال ەسىرتكىنى جاسىرىپ، العاش رەت قىلمىس جاساعانداردىڭ مۇلكى تاركىلەنىپ، باس بوستاندىعىنان ايىرۋ جازاسى 5 جىلدان 8 جىلعا دەيىنگى ارالىققا تومەندەتىلدى،- دەدى ەسىرتكى قىلمىسىنا قارسى ءىس-قيمىل باسقارماسى باستىعىنىڭ ورىنباسارى پوليسيا پولكوۆنيگى رومان ەرمۇحانوۆ.
