جول جيەگىندە ورنالاسقان دۇكەندەردىڭ كوپشىلىگى شابۋىلعا ۇشىراپ، اينەكتەرى شاعىلعان. ولاردىڭ ءبىرسىپىراسى جۇمىستارىن جالعاستىرا باستادى. توناۋشىلاردىڭ سۋىق قولدارىنان ساقتانعاندار مەكەمەلەرىن قورعاۋ ءۇشىن، ەسىكتەرىنىڭ الدىنا بارريكادالار ورناتىپ، ءوز بەتتەرىنشە قورعانعان. وسى كورىنىستەن-اق وتكەن تۇندەردىڭ قانشالىقتى قيىن بولعانىن اڭعارۋعا بولاتىنداي.
وسىنىڭ سالدارىنان ەلىمىزدە 225 ادام قازا بولدى. ءتورت جارىم مىڭعا جۋىق ادام جاراقات الدى. بۇل ءالى الدىن الا جاريالانعان دەرەكتەر. مالىمەتتەر ءالى دە ناقتىلانىپ، وزگەرۋى مۇمكىن. ازاماتتاردىڭ ءبىرازى سودىرلاردىڭ قولىنان قازا تاپسا، ءبىرسىپىراسى قاڭعىعان وقتان قايتىس بولعان. وسى كۇنى بىرەۋلەر اسكەر مەن پوليسيانى كىنالاي باستادى. بۇل شىندىققا جاناسپايدى. قۇقىق قورعاۋشىلار بۇل كۇندەرى تەك زاڭدىلىقتى عانا قاداعالادى.
باس پروكۋراتۋرا مالىمەتىنشە، «قاڭتار وقيعاسىنا قاتىسى بار» دەگەن كۇدىكپەن 672 ادام ۋاقىتشا ۇستاۋ يزولياتورىنا جەتكىزىلگەن، 446-سى سوت سانكسياسىمەن قاماۋعا الىنعان. جۇزگە جۋىق ادام «ۇستاۋعا نەگىز بولماعاندىقتان» بوساتىلعان.
قازىرگى ۋاقىتتا وڭتۇستىك استاناداعى جاعداي تۇراقتالىپ، جەرگىلىكتى تۇرعىندار كۇندەلىكتى كۇيبەڭ تىرشىلىككە بەت بۇرا باستادى. الايدا سول كۇندەردىڭ سالقىنى ءالى دە سانادا ساقتالىپ تۇرعانداي ەلەس بەرەدى.
