ەرتىسبايەۆتىڭ ايتقان ءسوزى جالعان اقپارات تاراتۋ دەگەن باپقا ساي كەلەدى - دوس كوشىم

ساعىنىش سارداروۆا 21 ماۋ. 2024 16:35 3644

ساياساتكەر دوس كوشىم بەلگىلى لاۋازىمدى قىزمەتتەر اتقارعان ەرمۇحامەت ەرتىسبايەۆتىڭ ءتىل تۋراسىندا ايتقان مالىمدەمەسىنە جاۋاپ بەردى، - دەپ حابارلايدى Dalanews.kz.

دوس كوشىم ەرمۇحامەت ەرتىسبايەۆتىڭ ەكى اي بۇرىن ايتقان پىكىرىنە قاتىستى ۇندەۋ جاسادى.

"(ەرتىسبايەۆ - ەسك.) نازاربايەۆتىڭ كەڭەسشىسى بولعان، گرۋزياداعى قازاقستاننىڭ ەلشىسى قىزمەتىن اتقارعان، مادەنيەت جانە سپورت ءمينيسترى بولعان، مەملەكەتتىك تۇلعا دەپ ايتۋعا بولادى. سول كىسى ەكى اي بۇرىن وتە ىڭعايسىز، قىزىق ءسوز ايتتى. بۇل قازاقستانداعى ءتىل ماسەلەسىنە بايلانىستى، "قازاق ءتىلى مەن ورىس ءتىلى زاڭ بويىنشا دا، ءىس جۇزىندە دە بىردەي" دەگەن اسپاننان تۇسكەندەي ماسەلەنى جايىپ سالدى. ءىس جۇزىندە ورىس ءتىلى قازاق تىلىمەنەن قاتار ەمەس، قولدانىلۋى جونىنەن مەملەكەتتىك تىلدەن جوعارى تۇر. ءبىراق دە-يۋرە دەگەن ءسوزى - زاڭ جۇزىندە دەگەن ءسوز. زاڭ جۇزىندە قازاقستاندا ءبىر-اق مەملەكەتتىك ءتىل بار، ول - قازاق ءتىلى. ءالى ەسىمدە، 1989 جىلدىڭ الدىندا العاش رەت قازاقستاننىڭ مەملەكەتتىك ءتىلى نە بولادى دەگەن ۋاقىتتا وسى ماسەلە ەڭ ۇلكەن تالاسقا تۇسكەن. ءبىراق، قۇدايعا شۇكىر، قازاق ءتىلى مەملەكەتتىك ءتىل بولىپ قالىپتاستى، ورىس ءتىلى مەملەكەتتىك ءتىل ەمەس.

سوندىقتان ەرمۇحامەت دوسىمىزدىڭ ايتقانى شىلعي جالعان، وتىرىك. قازاقستاندا ءبىر عانا مەملەكەتتىك ءتىل بار، وسىنى ۇمىتپايىق. كونستيتۋسيادا جانە ءتىل زاڭىندا مىناداي ماسەلە جازىلعان: قازاق ءتىلى - مەملەكەتتىك ءتىل. سودان كەيىن ەكىنشى تارماعىندا ورىس ءتىلى قازاق تىلىمەنەن قاتار تەك مەملەكەتتىك ۇيىمدار مەن جەرگىلىكتى ءوزىن-وزى باسقارۋ ورگاندارىندا عانا رەسمي ءتىل ەسەبىندە قاتار قولدانىلادى (دەپ جازىلعان - ەسك.). باسقا جەرلەردە، تىلگە بايلانىستى كيكىلجىڭ بولىپ جاتقان دۇكەندەر بولسىن، بانكىلەر بولسىن، بۇلاردىڭ ءبارى مەملەكەتتىك ۇيىم ەمەس. سوندىقتان ەرمۇحامەت ەرتىسبايەۆتىڭ ايتقان ءسوزى، مەنىڭ ويىمشا، جالعان اقپارات تاراتۋ دەگەن باپقا ساي كەلەدى. بۇعان بايلانىستى ادامدار سوتتالادى"، - دەدى دوس كوشىم BARYS MEDIA ارناسىنا.


ۇسىنىلعان
سوڭعى جاڭالىقتار