Saiasatker Dos Kóshim belgili laýazymdy qyzmetter atqarǵan Ermuhamet Ertisbaevtyń til týrasynda aitqan málimdemesine jaýap berdi, - dep habarlaidy Dalanews.kz.
Dos Kóshim Ermuhamet Ertisbaevtyń eki ai buryn aitqan pikirine qatysty úndeý jasady.
"(Ertisbaev - esk.) Nazarbaevtyń keńesshisi bolǵan, Grýziiadaǵy Qazaqstannyń elshisi qyzmetin atqarǵan, mádeniet jáne sport ministri bolǵan, memlekettik tulǵa dep aitýǵa bolady. Sol kisi eki ai buryn óte yńǵaisyz, qyzyq sóz aitty. Bul Qazaqstandaǵy til máselesine bailanysty, "qazaq tili men orys tili zań boiynsha da, is júzinde de birdei" degen aspannan túskendei máseleni jaiyp saldy. Is júzinde orys tili qazaq tilimenen qatar emes, qoldanylýy jóninen memlekettik tilden joǵary tur. Biraq de-iýre degen sózi - zań júzinde degen sóz. Zań júzinde Qazaqstanda bir-aq memlekettik til bar, ol - qazaq tili. Áli esimde, 1989 jyldyń aldynda alǵash ret Qazaqstannyń memlekettik tili ne bolady degen ýaqytta osy másele eń úlken talasqa túsken. Biraq, Qudaiǵa shúkir, qazaq tili memlekettik til bolyp qalyptasty, orys tili memlekettik til emes.
Sondyqtan Ermuhamet dosymyzdyń aitqany shylǵi jalǵan, ótirik. Qazaqstanda bir ǵana memlekettik til bar, osyny umytpaiyq. Konstitýtsiiada jáne til zańynda mynadai másele jazylǵan: qazaq tili - memlekettik til. Sodan keiin ekinshi tarmaǵynda orys tili qazaq tilimenen qatar tek memlekettik uiymdar men jergilikti ózin-ózi basqarý organdarynda ǵana resmi til esebinde qatar qoldanylady (dep jazylǵan - esk.). Basqa jerlerde, tilge bailanysty kikiljiń bolyp jatqan dúkender bolsyn, bankiler bolsyn, bulardyń bári memlekettik uiym emes. Sondyqtan Ermuhamet Ertisbaevtyń aitqan sózi, meniń oiymsha, jalǵan aqparat taratý degen bapqa sai keledi. Buǵan bailanysty adamdar sottalady", - dedi Dos Kóshim BARYS MEDIA arnasyna.
