ەرتەڭنەن باستاپ جاڭا وزگەرىس ەنگىزىلەدى، وسىعان وراي ءىىم جۇرگىزۋشىلەرگە ۇندەۋ جاسادى، – دەپ حابارلايدى Dalanews.kz.
5 ساۋىردەن باستاپ تىركەلمەگەن موپەدتى باسقارۋعا تىيىم سالىنادى.
"قۇقىقبۇزۋشىلىقتاردىڭ الدىن الۋ ءۇشىن ەلىمىزدىڭ جولدارىندا پوليسەيلەر ازاماتتارعا جاڭا تالاپتار مەن ەرەجەلەردى بەلسەندى تۇردە ءتۇسىندىرىپ جاتىر. ءتارتىپ ساقشىلارى موپەد يەلەرىنە ارنايى حقكو-عا بارىپ، كولىك قۇرالدارىن تىركەۋ جانە ءتيىستى قۇجاتتاردى الۋ قاجەتتىگىن ەسكە سالادى"، - دەپ جازىلعان حابارلامادا.
بۇگىندە رەسپۋبليكا بويىنشا 23 مىڭنان اسا موپەد تىركەلگەن. زاڭعا سايكەس ولاردى تەك ا1، ا نەمەسە ۆ ساناتىنداعى جۇرگىزۋشى كۋالىگى بولعان جاعدايدا عانا باسقارۋعا بولادى.
"بۇل تالاپ جولدارداعى قاۋىپسىزدىكتى ارتتىرۋعا جانە جول اپاتتارىنىڭ سانىن ازايتۋعا كومەكتەسەدى"، - دەپ جازىلعان حابارلامادا.
ايتا كەتەيىك، مۇنداي قۇقىقبۇزۋشىلىق انىقتالعان جاعدايدا اكىمشىلىك كودەكستىڭ 590-بابىنىڭ 2-بولىگىنە سايكەس جاۋاپكەرشىلىك كوزدەلەدى.
ونى تىركەۋ ءۇشىن تۇرعىلىقتى جەرى بويىنشا ارنايى حالىققا قىزمەت كورسەتۋ ورتالىعىنا جۇگىنۋ قاجەت. مىنا قۇجاتتاردى الا بارۋ كەرەك: جەكە باستى كۋالاندىراتىن قۇجات، ەلەكترون ءتۇرى دە جارايدى، تەحنيكالىق قۇجات نەمەسە موپەدتىڭ تەحنيكالىق سيپاتتامالارى تۋرالى مالىمەتتەر.
