– استاناعا كوشۋىن كوشىپ الىپ، وي كەلىپ، الماتىعا كەلسەم جامان بولامىن. كەۋدەمدى ساعىنىش كەرنەپ. وسى جاقتا شابىت مىقتىراق ەكەن، ونى مويىندايمىن. اسىرەسە، شىعارماشىلىقتا جۇرگەن ادامدار وسى جاقتا اشىلادى. شابىت كەلەدى، ويلايسىڭ. استانادا ونداي ەمەس. “تەز-تەز شىعىپ بارا سالسام، تەز ۇيگە بارسام، توڭىپ قالدىم” دەيسىڭ، – دەگەن ەركە قايتادان الماتىعا كوشىپ كەلگىسى كەلەتىنىن جاسىرمادى.
ەركە Instagram جەلىسىندە ءجيى سىنعا ۇشىرايدى. سەبەبى جەلىدە ءانشىنى قازاقتىڭ قىلىقتى قىزى دەپ قابىلدامايتىندار كوپ. جاقسى قىلىقتارىنان جاساندىلىق كورەتىن كەيبىرەۋلەرگە ەسىمىمە بولمىسىم ساي دەپ جاۋاپ بەردى ءانشى.
– مەندە ەشقانداي دا جاساندىلىق جوق. مەنى ومىردە بىلەتىن نە بولماسا ءبىر رەت كورىپ تىلدەسكەن ادام ونداي ەمەس ەكەنىمدى تۇسىنەدى. “ومىردە دە سونداي ەكەنسىز عوي، قالجىڭباس ەكەنسىز عوي، ايتا سالاتىن، كۇلە سالاتىن” دەيتىن بولادى. ال بىلمەيتىن ادامدارعا ءقازىر، قۇدايعا شۇكىر، ەڭبەكتىڭ ارقاسىندا كوزىن جەتكىزىپ كەلە جاتىرمىن. ءوزىمنىڭ اندەرىم، ساحناداعى ءجۇرىس-تۇرىسىم، سويلەۋىم ارقىلى ءوزىمنىڭ تابيعاتىم وسىنداي ەكەنىن كورسەتىپ كەلە جاتىرمىن. مەنىڭ انام اتىمدى ەركە دەپ شاتاسپاي، قاتەلەسپەي اتاعان. سول ءۇشىن اناما العىس ايتامىن، – دەيدى ەركە.
بۇدان وزگە ەركە اسىرەسە نازىك جاندىلار قاۋىمىنا ۇناماي قالاتىنىن جەتكىزدى. وعان ەركەنىڭ ەلىمىزدىڭ ەڭ سىمباتتى جىگىتى – تاۋەكەل مۇسىلىممەن بىرگە تۇسكەن سۋرەتىن ءجيى جۇكتەۋى سەبەپ ەكەن.
“تاۋەكەلدى قاتتى ماقتاپ كەتتىم-اۋ دەيمىن، سول ءۇشىن مەنى قىزدار دا جەك كورەدى. سۋرەت سالعان سايىن مەنى جەردەن الىپ، جەرگە سالىپ جاتادى. “وسى جابىسادى دا جۇرەدى”، “ارمانداپسىڭ”، – دەپ. ونداي ەمەس. تاۋەكەلدى ارىپتەس، دوس رەتىندە قاتتى سىيلايمىن”، – دەپ ءتۇسىندىردى ەركە.
