ونىڭ ايتۋىنشا، رەسەي تۇل جالعىز. ەسى دۇرىس ەل اگرەسسوردان اۋلاق جۇرگەندى، ونىمەن الىستان سىيلاسقاندى ءجون كورەدى.
ال "جۇڭگو، ءۇندىستان، تۇركيا سەكىلدى ەلدەر ماسكەۋگە رياسىز كوڭىلمەن، دوستىق پەيىلمەن قارايدى" دەگەن رەسەيلىك ساياساتكەرلەر ساندىراعىنا سەنۋگە بولمايدى. مۇنى كەز-كەلگەن اقپاراتتى قورىتپاي قابىلداي بەرەتىن ورىس اۋديتورياسىن الداۋسىراتۋ ءۇشىن ايتادى دەيدى.
"رەسەيلىك شەنەۋنىكتەردىڭ ريتوريكاسىنا نازار اۋدارعان بولساڭىز، ولاردىڭ وتىرىكتى سۋداي ساپىراتىنىن اڭعارار ەدىڭىز.
ولاردىڭ پىكىرىنشە ىلگەرىدەگى ەلدەر رەسەيدىڭ باتىس پەن اقش-قا، ەڭ باستىسى كييەۆكە قاتىستى ۇستانىمىن تولىقتاي قولداپ، قۋاتتايدى، وككۋپانت دەپ اتاپ جەر-جەبىرىنە جەتپەيدى. ماسكەۋدىڭ استامشىل ساياساتىنا اسقان تۇسىنىستىكپەن قارايدى.
ورىس اۋديتوريا "سۋدىراحمەتتەردىڭ" قىرىق وتىرىگىنە يلانادى، جۇڭگو مەن تۇركياعا ارقا سۇيەيمىز دەپ سەنەدى. شىن مانىندە اتالعان مەملەكەتتەردىڭ ماسكەۋگە تۇكىرگەنى بار. رەسەيدىڭ سۇعاناق ساياساتىن قولداماق تۇگىل، ءبۇتىن ءبىر ەلدى قانعا بوكتىرگەن پۋتيننەن جانى تۇرشىگەدى"، – دەيدى ارىپتەسىمىز.
ونىڭ پىكىرىنشە بەيجىڭ بولسىن، انكارا بولسىن ءبىرىنشى كەزەكتە ءوز مۇددەسىن ويلايدى، ولاردىڭ پۋتينگە جانى اشىپ وتىرعانى شامالى.
ايتالىق، جۇڭگو مەن ءۇندىستان رەسەيدى "ساۋىن سيىر" رەتىندە پايدالانىپ وتىر. سۋ تەگىنگە ساتىلىپ جاتقان ارزان جانارمايدان ەشكىم دە باس تارتپاسى بەلگىلى.
ماسكەۋ جاساعان جاقسىلىعىنىڭ قايتىمى بولادى دەپ كۇتسە دە، جۇڭگو دا، ءۇندىستان دا باتىستىڭ كوزىن باقىرايتىپ قويىپ، جاڭا تەحنولوگيالاردىڭ قۇپياسىمەن بولىسۋگە نەمەسە ولاردى تاسىمالداۋعا دايىن ەمەس. باتىلى بارمايدى، ءداتى جەتپەيدى. اقش-تىڭ قاس-قاباعىنان قايمىعادى.
"ەردوعان كرەمل باسشىسىنىڭ ىرقىنا كونبەيدى، ىعىنا جىعىلمايدى. رەسەيلىك پروپاگاندا جازعانداي ول ءپۋتيننىڭ جاناشىرى ەمەس. رەسەيدىڭ قۇشاعىنا كىرىپ كەتەتىن قۇلدىق سانادان ادا.
جۋىردا سوچيگە ساپارلاپ كەلگەن تۇرىك پرەزيدەنتى كرەمل كوسەمىمەن كەزدەسۋ وتكىزدى. رەسەيلىك ماسس-مەديا "اراسىنان قىل وتپەيتىن دوس، سىيلاس پرەزيدەنتتەر سوڭعى 17 كۇندە ەكىنشى رەت ديدارلاستى" دەگەن سيپاتتا حابار تاراتتى. ەردوعاندى "رەسەيشىل"، "ءپۋتينشىل" ەتىپ جىبەردى.
كرەملدەن تارايتىن كەز-كەلگەن اقپاراتتى سىمىرە بەرەتىن ورىس اۋديتورياسى الگىنى ەستىپ شات-شادىمان بولدى. شامامەن ءتورت ساعاتقا تاقاۋ تىلدەسكەن ەكى ەل باسشىلارىنىڭ ديالوگىنا وتىرىك-شىنى ارالاس اقپاراتتى مولىنان ارالاستىرىپ، تەلەديدارعا تەلمىرىپ وتىرعان اۋديتوريانىڭ الدىنا توستى"، – دەيدى ارىپتەسىمىز.
يبراش نۇسىپبايەۆتىڭ ايتۋىنشا رەسەيلىك پروپاگانديستەر "ەردوعان ۋكراينانىڭ سوعىستان كەيىنگى كەسكىن- كەلبەتى جونىندە جانە "جاڭا رەسەيدىڭ" قابىرعاسىن قالاۋعا قاتىستى پىكىر ءبىلدىردى" دەگەن جالعان اقپار تاراتقان.
"پۋتين مەن ەردوعاننىڭ كەزدەسۋىندە ۋكراين ماسەلەسى، جاڭا رەسەيدىڭ جايى مۇلدە ءسوز بولعان جوق. كەلىسسوزدەرگە سيرياداعى احۋال ارقاۋ بولدى. تۇركيا سيريا تەرريتورياسىنىڭ ءبىر بولىگىن تارتىپ الۋعا تالاپتانىپ كورمەك. كرەمل كوسەمى بۇعان قارسى شىققان سىڭايلى، بۇل تۇركيا پرەزيدەنتى ۇناماي قالسا كەرەك.
ءتورت ساعاتقا سوزىلعان كەزدەسۋدەن ەردوعاننىڭ كوزى شاتىناپ، سىزدانىپ شىقتى. سوعىسقۇمار ءپۋتيننىڭ سازايىن بەرۋدى كوزدەپ، كەلەسى كۇنى-اق ۋكراينادا Bayraktar وندىرەتىن زاۋىتتىڭ قۇرىلىسىن باستاۋعا پارمەن بەردى"، – دەيدى يبراش نۇسىپبايەۆ.
"بايراقتار" رەسەيلىك باسقىنشىلاردى باۋداي ءتۇسىرىپ جاتقانى وتىرىك ەمەس. كۇندە نەبىر جان تۇرشىگەرلىك كادرلارعا كۋا بولامىز. جوق، ورىس وككۋپانتتارىنا جانىمىز اشىمايدى. كەرىسىنشە، كييەۆتىڭ شابۋىلى ۇدەي تۇسكەنىن قالايمىز.
ءسوي دەگەن يبراش نۇسىپبايەۆ تۇركيا رەسەيگە ەمەس، كەرىسىنشە رەسەي تۇركياعا تاۋەلدى دەيدى. "بايراقتاردىڭ" قۇرىلىسىنا رۇقسات بەرگەن ەردوعان بۇل ارەكەتى ءۇشىن ءپۋتيننىڭ قاھارى مەن بوپساسىنا ۇشىراۋدان قاۋىپتەنبەيدى. تۇرىك ليدەرى كرەمل كوسەمىنىڭ كەڭىستىگى تارىلىپ جاتقانىن، ەردوعانمەن ەرەگەسەر بولسا، ءوز قولىن ءوز شابارىن كورىپ، ءبىلىپ وتىر.
"تۇركيا ۋكراين جەرىندە "بايراقتاردىڭ" زاۋىتىن سالادى. ءپۋتيننىڭ بۇل زاۋىتتى بومبالاۋعا جۇرەگى داۋالامايدى. رەسەيدىڭ راكەتالارى بۇل ارادان اۋلاق ۇشادى. بۇعان دەيىن رەسەي بيلىگى ءوز اقشاسىنا تۇرىك جەرىندە اەس قۇرىلىسىن جۇرگىزەتىنىن حابارلاعان بولاتىن. ەردوعاننىڭ اشۋىنا تيەر بولسا، ءپۋتيننىڭ ەكى اياعىن ءبىر ەتىككە تىعادى، الگى قۇرىلىستى اپ-ساتتە توقتاتا سالادى، ال رەسەي قىپ-قىزىل شىعىنعا باتادى"، – دەيدى ارىپتەسىمىز.
ازىرلەگەن، دۋمان بىقاي
https://dalanews.kz/news/80363-assambleia-zhanynan-qurylgan-analar-ke
https://dalanews.kz/news/80375-freedom-holding-corp-i-toqsanda-227-mln-tabyspen-tuyindedi
