Onyń aitýynsha, Resei tul jalǵyz. Esi durys el agressordan aýlaq júrgendi, onymen alystan syilasqandy jón kóredi.
Al "Qytai, Úndistan, Túrkiia sekildi elder Máskeýge riiasyz kóńilmen, dostyq peiilmen qaraidy" degen reseilik saiasatkerler sandyraǵyna senýge bolmaidy. Muny kez-kelgen aqparatty qorytpai qabyldai beretin orys aýditoriiasyn aldaýsyratý úshin aitady deidi.
"Reseilik sheneýnikterdiń ritorikasyna nazar aýdarǵan bolsańyz, olardyń ótirikti sýdai sapyratynyn ańǵarar edińiz.
Olardyń pikirinshe ilgeridegi elder Reseidiń Batys pen AQSh-qa, eń bastysy Kievke qatysty ustanymyn tolyqtai qoldap, qýattaidy, okkýpant dep atap jer-jebirine jetpeidi. Máskeýdiń astamshyl saiasatyna asqan túsinistikpen qaraidy.
Orys aýditoriia "sýdyrahmetterdiń" qyryq ótirigine ilanady, Qytai men Túrkiiaǵa arqa súieimiz dep senedi. Shyn máninde atalǵan memleketterdiń Máskeýge túkirgeni bar. Reseidiń suǵanaq saiasatyn qoldamaq túgil, bútin bir eldi qanǵa bóktirgen Pýtinnen jany túrshigedi", – deidi áriptesimiz.
Onyń pikirinshe Beijiń bolsyn, Ankara bolsyn birinshi kezekte óz múddesin oilaidy, olardyń Pýtinge jany ashyp otyrǵany shamaly.
Aitalyq, Qytai men Úndistan Reseidi "saýyn siyr" retinde paidalanyp otyr. Sý teginge satylyp jatqan arzan janarmaidan eshkim de bas tartpasy belgili.
Máskeý jasaǵan jaqsylyǵynyń qaitymy bolady dep kútse de, Qytai da, Úndistan da Batystyń kózin baqyraityp qoiyp, jańa tehnologiialardyń qupiiasymen bólisýge nemese olardy tasymaldaýǵa daiyn emes. Batyly barmaidy, dáti jetpeidi. AQSh-tyń qas-qabaǵynan qaimyǵady.
"Erdoǵan Kreml basshysynyń yrqyna kónbeidi, yǵyna jyǵylmaidy. Reseilik propaganda jazǵandai ol Pýtinniń janashyry emes. Reseidiń qushaǵyna kirip ketetin quldyq sanadan ada.
Jýyrda Sochige saparlap kelgen Túrik prezidenti Kreml kósemimen kezdesý ótkizdi. Reseilik mass-media "arasynan qyl ótpeitin dos, syilas prezidentter sońǵy 17 kúnde ekinshi ret didarlasty" degen sipatta habar taratty. Erdoǵandy "reseishil", "pýtinshil" etip jiberdi.
Kremlden taraityn kez-kelgen aqparatty simire beretin orys aýditoriiasy álgini estip shat-shadyman boldy. Shamamen tórt saǵatqa taqaý tildesken eki el basshylarynyń dialogyna ótirik-shyny aralas aqparatty molynan aralastyryp, teledidarǵa telmirip otyrǵan aýditoriianyń aldyna tosty", – deidi áriptesimiz.
Ibrash Núsipbaevtyń aitýynsha reseilik propagandister "Erdoǵan Ýkrainanyń soǵystan keiingi keskin- kelbeti jóninde jáne "Jańa Reseidiń" qabyrǵasyn qalaýǵa qatysty pikir bildirdi" degen jalǵan aqpar taratqan.
"Pýtin men Erdoǵannyń kezdesýinde Ýkrain máselesi, Jańa Reseidiń jaiy múlde sóz bolǵan joq. Kelissózderge Siriiadaǵy ahýal arqaý boldy. Túrkiia Siriia territoriiasynyń bir bóligin tartyp alýǵa talaptanyp kórmek. Kreml kósemi buǵan qarsy shyqqan syńaily, bul Túrkiia prezidenti unamai qalsa kerek.
Tórt saǵatqa sozylǵan kezdesýden Erdoǵannyń kózi shatynap, syzdanyp shyqty. Soǵysqumar Pýtinniń sazaiyn berýdi kózdep, kelesi kúni-aq Ýkrainada Bayraktar óndiretin zaýyttyń qurylysyn bastaýǵa pármen berdi", – deidi Ibrash Núsipbaev.
"Bairaqtar" reseilik basqynshylardy baýdai túsirip jatqany ótirik emes. Kúnde nebir jan túrshigerlik kadrlarǵa kýá bolamyz. Joq, orys okkýpanttaryna janymyz ashymaidy. Kerisinshe, Kievtiń shabýyly údei túskenin qalaimyz.
Sói degen Ibrash Núsipbaev Túrkiia Reseige emes, kerisinshe Resei Túrkiiaǵa táýeldi deidi. "Bairaqtardyń" qurylysyna ruqsat bergen Erdoǵan bul áreketi úshin Pýtinniń qahary men bopsasyna ushyraýdan qaýiptenbeidi. Túrik lideri Kreml kóseminiń keńistigi tarylyp jatqanyn, Erdoǵanmen eregeser bolsa, óz qolyn óz shabaryn kórip, bilip otyr.
"Túrkiia Ýkrain jerinde "Bairaqtardyń" zaýytyn salady. Pýtinniń bul zaýytty bombalaýǵa júregi daýalamaidy. Reseidiń raketalary bul aradan aýlaq ushady. Buǵan deiin Resei biligi óz aqshasyna Túrik jerinde AES qurylysyn júrgizetinin habarlaǵan bolatyn. Erdoǵannyń ashýyna tier bolsa, Pýtinniń eki aiaǵyn bir etikke tyǵady, álgi qurylysty áp-sátte toqtata salady, al Resei qyp-qyzyl shyǵynǵa batady", – deidi áriptesimiz.
Ázirlegen, Dýman BYQAI
https://dalanews.kz/news/80363-assambleia-zhanynan-qurylgan-analar-ke
https://dalanews.kz/news/80375-freedom-holding-corp-i-toqsanda-227-mln-tabyspen-tuyindedi
