الماتىدا مۇعالىمدەر كۇنىنە ارنالعان سالتاناتتى ءىس-شارا ءوتتى. كاسىبي مەرەكەنى اتاپ وتۋگە پەداگوگيكالىق ەڭبەك ارداگەرلەرى، مۇعالىمدەر جانە ۇستازدار اۋلەتتەردىڭ وكىلدەرى جينالدى، – دەپ حابارلايدى Dalanews.kz الماتى قالاسى اكىمىنىڭ باسپا ءسوز قىزمەتىنە سىلتەمە جاساپ.
رەسپۋبليكا سارايىندا وتكەن سالتاناتتى جيىندا الماتى اكىمى ەربولات دوسايەۆ ۇستازدار قاۋىمىن قۇتتىقتاپ، جاس ۇرپاقتى تاربيەلەۋگە قوسقان ۇلەسى مەن ەڭبەگى ءۇشىن ريزاشىلىعىن ءبىلدىردى. بۇگىندەالماتىدا 24،1 مىڭ پەداگوگ جۇمىس ىستەيدى، ونىڭ 20 725ء-ى مەملەكەتتىك مەكتەپتەردە، 3 375ء-ى جەكە مەنشىك مەكتەپتەردە.
– سىزدەردىڭ كۇندەلىكتى جۇمىستارىڭىز تاڭعاجايىپ تابىستار مەن شابىتقا تولى وقيعالاردان تۇراتىنى انىق. سىزدەر بالالارىمىزدىڭ الەۋەتىن اشىپ، ءبىلىم مەن مۇمكىندىكتەر الەمىنە ەسىك اشاسىزدار. وسى تاماشا كۇنى سىزدەردىڭ بولاشاق ۇرپاققا دەگەن شىنايى قامقورلىقتارىڭىز ءۇشىن العىس ايتقىم كەلەدى. شاكىرتتەرىڭىزدىڭ جەتىستىكتەرىنەن قۋانا كورىپ، دەندەرىڭىزگە ساۋلىق، ىستەرىڭىزگە ساتتىلىك تىلەيمىن! – دەدى ەربولات دوسايەۆ.
قالا باسشىسىنىڭ ايتۋىنشا، اكىمدىك ءمۇعالىم مارتەبەسىن ارتتىرۋعا باعىتتالعان باستامالاردى قولداۋ جانە دامىتۋ جۇمىستارى جالعاستىرۋدا. 2022 جىلى باستالعان بىلىكتىلىكتى ارتتىرۋ باعدارلاماسى اياسىندا بيىل 440 پەداگوگ وقۋدان وتەدى. جىل سوڭىنا دەيىن 40 باسشى مەن ادىسكەر مالايزيا، جۇڭگو، گەرمانيا جانە پولشاداعى جەتەكشى ءبىلىم بەرۋ ۇيىمدارىندا تاعىلىمدامادان وتەدى.
سونداي-اق «الماتى مەكتەپتەرى» باعدارلاماسى اياسىندا 70 ءمۇعالىم Marshall Cavendish سەرتيفيكاتتالعان باعدارلامالارى بويىنشا ءبىلىم الۋدا، بۇل باعدارلامالار فۋنكسيونالدىق ساۋاتتىلىقتى، سيفرلىق قۇزىرەتتىلىكتەر مەن داعدىلاردى قالىپتاستىرۋعا باعىتتالعان.
ينكليۋزيۆتى ءبىلىم بەرۋدى دامىتۋعا ەرەكشە كوڭىل بولىنۋدە، بيىل 300 پەداگوگ بىلىكتىلىگىن ارتتىرعان. الداعى ۋاقىتتا تاعى 50 ءمۇعالىم وڭتۇستىك كورەيادا حالىقارالىق تاعىلىمدامادان وتەدى دەپ كۇتىلۋدە.
ءىس-شارا بارىسىندا قالا باسشىسى «الماتى ۇستازى» بايقاۋىنىڭ جەڭىمپازدارىن ماراپاتتادى. بايقاۋعا 2 مىڭ ادام قاتىسقان، بۇل رەكوردتىق كورسەتكىش.
جەڭىمپازدار قاتارىندا 7 پەداگوگ بار. ولار №173 مەكتەپ-ليسەيدىڭ تاريح ءپانى ءمۇعالىمى ەرنۇر بەيسەمبايەۆ، №140 مەكتەپ-گيمنازيانىڭ ينفورماتيكا ءپانى ءمۇعالىمى ەركەناز بايمۇرات، №92 مامانداندىرىلعان ليسەيدىڭ حيميا ءپانى ءمۇعالىمى سۋنناتۋللا قاۋىمبايەۆ، №178 مامانداندىرىلعان ليسەيدىڭ بيولوگيا ءپانى ءمۇعالىمى ايدانا ايداروۆا، №159 گيمنازيانىڭ ماتەماتيكا ءپانى ءمۇعالىمى ءازيزحان ءومىرالحانوۆ، №70 ورتا مەكتەپتىڭ ورىس ءتىلى مەن ادەبيەتى ءپانىنىڭ ءمۇعالىمى اناستاسيا بلاگوداتسكايا جانە №12 مامانداندىرىلعان مەكتەپتىڭ قازاق ءتىلى مەن ادەبيەتى ءپانى ءمۇعالىمى دۋلات سۇلتانبەك.
جەڭىمپازدار شەتەلدىك تاعىلىمدامادان وتۋگە سەرتيفيكات الدى. سونىمەن قاتار، باس جۇلدە يەگەرى ەرنۇر بەيسەمبايەۆ 5 ميلليون تەڭگە كولەمىندە سەرتيفيكاتپەن ماراپاتتالدى.
ءىس-شارا بارىسىندا «ۇزدىك ءبىلىم بەرۋ ۇيىمى» بايقاۋىنىڭ ناتيجەسى دە جاريالاندى. المالى اۋدانىنداعى №15 گيمنازيا ەڭ جوعارى ۇپاي جينادى. الماتى اكىمى مەكتەپ ديرەكتورىنا وقۋ ۇدەرىسىنىڭ ماتەريالدىق-تەحنيكالىق بازاسى مەن عىلىمي-ادىستەمەلىك قامتىلۋىن جاقسارتۋ ءۇشىن 68 ميلليون تەڭگە كولەمىندە گرانت تابىستادى.
بۇعان قوسا، 15 پەداگوگ-ارداگەر ءتۇرلى ناگراداعا يە بولدى: 5 ادام «ءبىلىم بەرۋ ءىسىنىڭ ارداگەرى» مەدالىمەن، 5 پەداگوگ «ى. التىنسارين» توسبەلگىسىمەن، تاعى 5 ادام «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسىمەن ماراپاتتالدى. تاعى 9 ادام ءبىلىم بەرۋدى دامىتۋعا قوسقان ۇلەسى ءۇشىن الماتى اكىمى اتىنان العىس حات الدى.
مەرەكەلىك اتموسفەرا وپەرا ساحناسىنىڭ جۇلدىزدارى مەن تانىمال ەسترادا ارتيستەرىنىڭ قويىلىمدارىمەن اجارلانا ءتۇستى. قازاقستاننىڭ ەڭبەك سىڭىرگەن ءارتيسى شاحيماردان ءابىلوۆ «تولىق ادام، وي تولعاۋ، حاكىم اباي» مونووپەراسىنان ءۇزىندى ورىندادى. سونداي-اق، تانىمال ەسترادا انشىلەرى بالۋان بەركەنوۆ، اسقار كۇلشارىپوۆ، انجەلا مەن ەۆگەنيي شاگاروۆ دۋەتى، ايگەرىم شارىپبەك، اياجان قۋانشالييەۆا، ب. بايقاداموۆ اتىنداعى مەملەكەتتىك حور كاپەللاسى، «Rise» شوۋ-بالەتى جانە «Mezzo» ۆوكالدىق توبى ونەر كورسەتتى.
