ەنەرگەتيكا مينيسترلىگى الەۋمەتتىك جەلىلەردە ەۋرازيالىق ەكونوميكالىق وداقتا (ەاەس) مۇناي مەن مۇناي ونىمدەرىنىڭ ورتاق نارىعى ىسكە قوسىلعاننان كەيىن بەنزين باعاسى وسەدى دەگەن پىكىرلەرگە جاۋاپ بەردى، دەپ حابارلايدى Dalanews.kz.
ۆەدومستۆو وكىلدەرى Tengrinews.kz اگەنتتىگىنە بەرگەن جاۋابىندا كورشىلەس ەلدەرمەن باعانى اۆتوماتتى تۇردە تەڭەستىرۋ جوسپارلانباعانىن، سوندىقتان جانارماي قۇنىنىڭ كۇرت قىمباتتاۋى كۇتىلمەيتىنىن مالىمدەدى.
مينيسترلىكتىڭ سوزىنشە، 2027 جىلدان باستاپ ىسكە اسىرىلاتىن ورتاق نارىق باعانى ءبىر ساتتە وزگەرتۋ ەمەس، سالالىق ەرەجەلەر مەن زاڭنامانى كەزەڭ-كەزەڭىمەن ۇيلەستىرۋدى كوزدەيدى. ياعني، جانارماي قۇيۋ بەكەتتەرىندەگى باعالار بىردەن وزگەرمەيدى.
سونىمەن بىرگە بيلىك كورشىلەس ەلدەرمەن باعا ايىرماشىلىعى تىم ۇلكەن بولسا، جانارمايدىڭ زاڭسىز سىرتقا اكەتىلۋى مۇمكىن ەكەنىن جانە بۇل ىشكى نارىقتا تاپشىلىققا اكەلۋى ىقتيمال ەكەنىن اتاپ ءوتتى. وسى سەبەپتى مەملەكەت جاعدايدى باقىلاۋدا ۇستايتىنىن مالىمدەدى.
