وقۋ-اعارتۋ مينيسترلىگى مەكتەپتەردە تاماقتاندىرۋ قىزمەتتەرىن ۇيىمداستىرۋ كەزىندە ءونىم بەرۋشىلەردى ىرىكتەۋ تالاپتارىن بۇزعان شەنەۋنىكتەردى اكىمشىلىك جاۋاپكەرشىلىككە تارتۋ ماسەلەسىن قاراستىرۋدا. بۇل تۋرالى مينيستر عاني بەيسەمبايەۆ ءمالىم ەتتى، دەپ حابارلايدى Dalanews.kz.
قىركۇيەك پەن قازان ايلارىندا مەكتەپ اسحانالارىنىڭ سانيتارلىق-ەپيدەميولوگيالىق تالاپتارعا سايكەستىگىنە مونيتورينگ جۇرگىزىلگەن.
«رەسپۋبليكالىق تەكسەرۋ ناتيجەلەرى مەكتەپتەگى تاماقتانۋ ساپاسىنا جەرگىلىكتى اتقارۋشى ورگانداردىڭ باقىلاۋىنىڭ ءالى دە جەتكىلىكسىز ەكەنىن كورسەتتى. بۇل زاڭناما تالاپتارىنىڭ ءجيى بۇزىلۋىنان بايقالادى. مونيتورينگ بارىسىندا 771 ءتۇرلى بۇزۋشىلىق انىقتالعانىن ەرەكشە اتاپ وتكىم كەلەدى»، – دەدى مينيستر ۇكىمەت وتىرىسىندا.
مينيسترلىك سونىمەن قاتار جەرگىلىكتى اكىمدىكتەردىڭ مەكتەپتە تاماقتانۋدى ۇيىمداستىرۋ جۇمىستارىنا كەشەندى باعالاۋ جۇرگىزگەن. بۇل رەتتە بىرنەشە فاكتورلار ەسكەرىلگەن:
- تاماقتانۋ ساپاسىنا قاتىستى مونيتورينگ ناتيجەلەرى؛
- اسحانالاردىڭ ماتەريالدىق-تەحنيكالىق بازاسى؛
- 1 وقۋشىعا شاققانداعى تاماقتانۋ قۇنى؛
- اتا-انالار اراسىندا جۇرگىزىلگەن ساۋالنامالاردىڭ قورىتىندىلارى.
«مىسالى، جامبىل، ماڭعىستاۋ، الماتى، اتىراۋ وبلىستارى مەن شىمكەنت قالاسى اكىمدىكتەرى مەكتەپتەردە ساپالى تاماقتانۋدى ۇيىمداستىرۋعا جەتكىلىكتى كوڭىل بولمەي وتىرعانى انىقتالدى. بۇل وڭىرلەردە باقىلاۋدى كۇشەيتۋ قاجەتتىگى ايقىن كورىنىپ وتىر. وسىعان بايلانىستى مينيسترلىك ءونىم بەرۋشىلەردى ىرىكتەۋ تالاپتارىن بۇزعان لاۋازىمدى تۇلعالاردى اكىمشىلىك جاۋاپقا تارتۋ جونىندەگى ۇسىنىستى پىسىقتاپ جاتىر»، – دەدى عاني بەيسەمبايەۆ.
