ەندى جزق-دان ەرىكتى زەينەتاقى جارنالار ەسەبىنەن قالىپتاسقان جيناقتاردى الۋ ءۇشىن ءوتىنىش تولتىرىپ جاتۋدىڭ قاجەتى جوق، زەينەت جاسقا جەتكەندە ول اۆتوماتتى تۇردە وزدىگىنەن ەسەپتەلەتىن بولادى، دەپ حابارلايدى Dalanews.kz.
قارجى نارىعىن رەتتەۋ جانە دامىتۋ اگەنتتىگى "ەرىكتى زەينەتاقى جارنالارى ەسەبىنەن زەينەتاقىمەن قامسىزداندىرۋ تۋرالى شارتتى جاساسۋ قاعيدالارىن جانە ونىڭ ۇلگىلىك نىسانىن بەكىتۋ تۋرالى" 2023 جىلعى 26 مامىرداعى № 27 قاۋلىسىنا وزگەرىستەر ەنگىزۋ تۋرالى" اگەنتتىك باسقارماسى قاۋلىسىنىڭ جوباسىن ازىرلەدى.
"جوبادا ەرىكتى زەينەتاقى جارنالارى (ەزج) ەسەبىنەن زەينەتاقىمەن قامسىزداندىرۋ شارتىنىڭ ۇلگىلىك نىسانىنا، ونىڭ ىشىندە "ءبىرىڭعاي جيناقتاۋشى زەينەتاقى قورى" اق-تان (بجزق) تولەمدەر تارتىبىنە قاتىستى بولىگىندە وزگەرىستەر ەنگىزۋ ۇسىنىلادى. اتاپ ايتقاندا، زەينەتكەرلىك جاسقا جەتكەن، ءبىراق ەرىكتى زەينەتاقى جارنالارى (ەزج) ەسەبىنەن قالىپتاسقان جيناقتارىن الۋ ءۇشىن جۇگىنبەگەن ازاماتتار ءۇشىن بجزق-دان زەينەتاقى تولەمدەرىن اۆتوماتتى (ءوتىنىشسىز) تارتىپپەن جۇزەگە اسىرۋ جوسپارلانىپ وتىر"، دەلىنگەن قۇجاتتا.
وسى تەتىكتى ىسكە اسىرۋ ەزج بويىنشا تالاپ ەتىلمەگەن زەينەتاقى جيناقتارىنىڭ الدىن الىپ، زەينەتاقى تولەمدەرىنىڭ بارلىق تۇرىنە بىردەي كوزقاراستى قامتاماسىز ەتۋگە مۇمكىندىك بەرەدى.
بۇعان دەيىن ەل ازاماتتارىنىڭ بجزق-داعى جيناعىن ەم-دومعا ءجيى پايدالانا باستاعانىن جازعانبىز.
