قازاقستاندىق انالار بالا كۇتىمىنە بايلانىستى تولەمدەر كەشىككەنىن جارىسا جازدى، دەپ حابارلايدى Dalanews.kz.
انالار Threads جەلىسىندە تولەم كەشىگىپ جاتقانىن جازدى. تولەمدى ءبىرى السا، بىرىنە ءالى تۇسپەگەن.
ەڭبەك جانە حالىقتى الەۋمەتتىك قورعاۋ مينيسترلىگى بۇل كىدىرىس قارجى تاپشىلىعىنان ەمەس، دەمالىس كۇندەرىندەگى بانكتىك وپەراسيالاردىڭ ەرەكشەلىكتەرىمەن بايلانىستى ەكەنىن مالىمدەدى.
ۆەدومستۆونىڭ حابارلاۋىنشا، 10 ءساۋىر، جۇما كۇنى اۋدارىلعان قاراجات «ازاماتتارعا ارنالعان ۇكىمەت» مەملەكەتتىك كورپوراسياسىنىڭ شوتتارىنا تەك 13 ءساۋىر، دۇيسەنبىدە تۇسكەن. سوعان سايكەس، الۋشىلاردىڭ بانك كارتالارىنا قاراجاتتى كەزەڭ-كەزەڭىمەن اۋدارۋ پروسەسى سول كەزدە باستالعان.
مينيسترلىك بارلىق تولەمدەر تولىق كولەمدە قارجىلاندىرىلعانىن جانە ەشقانداي قارىز جوق ەكەنىن اتاپ ءوتتى. قازىرگى تاڭدا تەحنيكالىق كىدىرىستەر رەتتەلىپ جاتىر، ال قاراجات جاقىن ۋاقىتتا بارلىق الۋشىلارعا تولىق جەتكىزىلەدى.
ەسكە سالايىق، قازاقستاندا بالا كۇتىمىنە ارنالعان مەملەكەتتىك جاردەماقىلار مەن الەۋمەتتىك تولەمدەر اي سايىن تۇراقتى تۇردە تولەنەدى. ادەتتە ولار ايدىڭ العاشقى ونكۇندىگىندە اۋدارىلادى، ءبىراق مەرەكە نەمەسە دەمالىس كۇندەرىنە سايكەس كەلگەن جاعدايدا تولەم مەرزىمى وزگەرۋى مۇمكىن.
