كاسىپ اشىپ، ەڭبەكتىڭ كوزىن تابامىن دەگەن جانعا الىنباس قامال جوق. ەگىن ەگۋ، گۇل ءوسىرۋ ماشاقاتىمەن قاتار جۇرەتىن جۇمىس بولسا دا، جايقالىپ وسكەننەن كەيىنگى ناتيجە ەڭبەك ادامىنىڭ ءوزىن عانا ەمەس، وزگەلەردى دە قۋانىشقا بولەيدى. گۇل ەگىپ، كاسىپ اشقان جەتىسۋ وبلىسىنىڭ تۇرعىنى – cونىڭ ايعاعى. ونىڭ كۇن سايىنعى تىنىمسىز ەڭبەگى – كەز كەلگەن ادامعا ۇلگى-ونەگە. كوكتەم كەلسە، گۇل شوقتارى ەرىكسىز ەسكە تۇسەدى.

بۇگىندە جەتىسۋ وبلىسىنىڭ تۇرعىنى باۋىرجان بولەگەنوۆ ارۋلار مەن قىزداردىڭ ءتول مەرەكەسى سانالاتىن 8 ناۋرىز حالىقارالىق ايەلدەر كۇنىنە وراي 30 مىڭعا تارتا قىزعالداق ءوسىرىپ وتىر. ونىڭ باقشاسىندا گوللانديا قىزعالداعىنىڭ 14 ءتۇرى بار.

باۋىرجان بولەگەنوۆتىڭ نەگىزگى ماماندىعى – ونەركاسىپ ءالپينيسى. سارقان اۋدانىنىڭ تۇرعىنى بوس ۋاقىتىن قالت جىبەرگىسى كەلمەيدى. ەڭبەكقور ازامات ونىڭ ورنىنا ءوز باقشاسىندا قىزعالداقتىڭ ءار ءتۇرىن ءوسىرۋدى ۇيعارعان. ءقازىر ونىڭ باقشاسىندا الۋان ءتۇستى، ءتۇرلى قىزعالداق ءوسىپ جاتىر. جەتىسۋ وبلىسىنىڭ تۇرعىنى بۇل كاسىپكە بەكەر كەلمەگەن. ونىڭ سوزىنشە، ەلدە دە وسەتىن قىزعالداق نەگە شەتەلدەن تاسىمالدانادى دەگەن وي بولعان. بۇل گۇلدىڭ شارىقتاپ وسكەن باعاسىنا، ودان قالدى ساپاسىنىڭ ناشارلاۋىنا اكەپ سوعادى ەكەن. ەسەسىنە باۋىرجاننىڭ باقشاسىندا وسكەن گۇل شوقتارى باعاسى جاعىنان دا، ساپاسى جاعىنان دا شەتەلدەن اكەلىنگەننەن اسىپ تۇسپەسە، كەم تۇسپەيدى. وسى ورايدا ءوڭىردىڭ ەڭبەكقور ازاماتىمەن تىلدەسىپ، بۇل كاسىپكە قالاي كەلگەنىن سۇراۋدىڭ ءساتى ءتۇستى.

– باۋىرجان، نەگە ءدال وسى گۇل ءوسىرۋ كاسىبىن تاڭدادىڭىز، نەگە كوكونىس، جەمىس-جيدەك ەمەس، گۇل وسىرەمىن دەپ شەشتىڭىز؟

– گۇل ءوسىرۋ – بەلگىلى ءبىر ماۋسىمعا سوزىلاتىن، ماۋسىمدىق جۇمىس. كوكونىس ەمەس قىزعالداق وسىرۋمەن اينالىسقانىمنىڭ سەبەبى cول – كوكونىس ءوسىرۋ قيىنىراق بولار ەدى. باقشامنان جىلىجاي جاساپ الدىم، اۋدانى 110 شارشى مەتر بولادى. كەيىن گوللاند قىزعالداقتارىنىڭ تامىرلارىن ساتىپ الىپ، ىسكە كىرىسىپ كەتتىم.

– ءقازىر باقشاڭىزدا قانشا گۇل بار؟ ولار قانداي دا ءبىر ەرەكشەلىكتەرى بويىنشا بولىنە مە الدە ءبارى بىردەي مە؟

– گوللاند قىزعالداعىنىڭ 14 تۇرىنەن 30 مىڭعا تارتا گۇل وتىرعىزدىم. ءقازىردىڭ وزىندە گۇلدەگەندەرى دە بار، ويتكەنى كەيبىر سورتتارى ەرتە گۇلدەيتىندەر قاتارىنا جاتادى.

– گۇلدەر قانداي دا ءبىر ارنايى كۇتىمدى قاجەت ەتە مە؟ قالاي باپتايسىز؟

– گۇلدەر ارنايى تەحنولوگيالىق ستاندارت بويىنشا ساقتالادى. ول ءۇشىن جازعى اس ءۇيدى دە پايدالاندىم. ودان بولەك گۇل ەرەكشە كۇتىمدى، قامقورلىقتى تالاپ ەتەدى. ءتىپتى تەمپەراتۋرانىڭ قالىپتى بولۋى، ىلعال دەڭگەيى، كوزگە كورىنبەيتىن باسقا دا ۇساق-تۇيەك نارسەلەر جەتىپ ارتىلادى. الدا وسى قىزعالداقتارعا سۇرانىس ارتادى دەگەن سەنىمىم بار.

– گۇل وسىرۋگە سىزگە كىمدەر قولعابىس ەتەدى؟ الدە تەك ءوزىڭىز اينالىساسىز با؟

– گۇل باپتاۋعا جۇبايىم رانيا دا كومەكتەسەدى.

– باقشاڭىزدا ءقازىر قانداي گۇلدەر بار؟

– 14 ءتۇرلى سۇرىپتاعى قىزىل، قىزعىلت، اق، جالپى الۋان ءتۇستى گۇلدەر بار، ونىڭ ءىشىندى پيون ءتارىزدى سورتى دا بار.

– ال بۇل كاسىپپەن قاشاننان باستاپ اينالىساسىز؟ بۇرىننان گۇل وسىرەسىز بە؟

– گۇلمەن اينالىسقانىما بيىل – ءبىرىنشى جىل. ءار جۇمىستىڭ قيىندىعى مەن قىزىعى بار شىعار. گۇل شىققان كەزدە ادەمىلىگى كوزدىڭ جاۋىن الادى. وزىنە ساي قيىندىعى دا بار.

– كاسىپتى باستاۋعا قانشا قارجى قۇيدىڭىز، بولاشاققا جوسپارىڭىز قانداي؟

– بۇل كاسىپتى باستاۋعا 6 ميلليونداي قاراجات كەتتى. بولاشاقتا كاسىپتى ودان ءارى كەڭەيتۋدى جوسپارلايمىن. ءتىپتى 100-150 مىڭعا جەتكىزسەم دەگەن ويىم بار.

– بۇل كاسىپتى باستاعانىڭىزعا وراي مەملەكەتتەن قولداۋ بار ما جانە وسى تۇستا ءوز ءىسىن اشقىسى كەلەتىندەرگە، ەڭبەكپەن اينالىسقىسى كەلەتىندەرگە نە ايتاسىز؟

– مەملەكەتتەن سۋبسيديا المادىم، ءبىراق قولداۋ بار، جاۋاپتى ورگاندار جاعدايدى سۇراپ جاتىر. قانداي كومەك كەرەگىن دە سۇراپ جاتىر. ال ەڭبەك ەتكىسى كەلەتىن ادامدارعا ۋاقىتتى بوسقا وتكىزبەي، كاسىپ اشقاندارى ءجون دەپ ويلايمىن.