پارتيالىق ۇستانىمى مەن ءوز كوزقاراستارىنا توقتالماستان بۇرىن، امانگەلدى تىلەۋبەردى ۇلى الدىمەن ءوز ءومىربايانىنا از-كەم توقتالدى.
- مەن تالعار اۋدانىنا 1986 جىلى شىعىس قازاقستان وبلىسى اقسۋات اۋدانىنان كوشىپ كەلدىم. ارمانىمىز - اۋىلدى كوركەيتۋ بولعان سوڭ اگرونوم ماماندىعىن تاڭداپ، تالعار قالاسىنىڭ اۋىلشارۋاشىلىق تەحنيكۋمىنا وقۋعا ءتۇسىپ، ونى 1990-شى جىلى ءتامامدادىم. ونىڭ الدىندا سوۆەتتىك اسكەر قاتارىندا بولدىم. تەحنيكۋمدى بىتىرگەلى تالعار قالاسىندا اكە-شەشەممەن، بالا-شاعاممەن تۇرىپ جاتقان جايىم بار. 1991 جىلدان باستاپ تالعار قالاسىندا ءارتۇرلى قىزمەتتە جۇمىس ىستەدىم. قازىرگى ۋاقىتتا اۋىلشارۋاشىلىعىمەن اينالىسامىن. اكەمنىڭ اتىنان «تىلەۋبەردى» دەپ اشىلعان شارۋا قوجالىعى بار. مال بورداقىلايمىز، ءسۇت ونىمدەرىن شىعارامىز. ودان بولەك قۇرىلىس سالاسىندا دا اتقارىپ جاتقان تىرلىگىمىز بار. 2015 جىلى ەلىمىزدەگى بىرەگەي پارتيا – «Nur Otan»-دى قالاپ، مۇشەلىككە ءوتتىم. سول پارتياسى اتىنان VI شاقىرىلىمداعى اۋداندىق ءماسليحات دەپۋتاتتىعىنا سايلاۋعا ءتۇستىم. مىنە، بۇگىندە جاڭا سايلاۋعا بايلانىستى الماتى وبلىستىق ءماسليحات سايلاۋىنا ءوزىمدى ۇسىنىپ، دەپۋتاتتىققا ءتۇسىپ جاتىرمىن، - دەيدى ول.
ول اۋدان دەڭگەيىندەگى ماسەلەلەرگە ارالاسىپ، كورگەن-بىلگەنى، ويلاپ-تۇيگەنى ، «Nur Otan» پارتياسى شەڭبەرىندە جيناعان تالىم-تاجىريبەسى وبلىستىق دەڭگەيدەگى ءماسليحاتتا ءوز تيىمدىلىگىن تانىتاتىندىعىنا سەنىمدى.
- وبلىس دەڭگەيىندە قاراستىرىلۋى ءتيىس اۋىلدىڭ ماسەلەلەرى بار. كەيبىر جەردە وبلىستىڭ ەلدى-مەكەن پروبلەمالارى ۇقساس بولىپ كەلەدى. مىنە، سول ماسەلەلەردىڭ شەشىمىنە ات سالىسىپ، ءوز تاجىريبەممەن بولىسە وتىرىپ، پارتيامىزدىڭ حالىق الدىندا العان جاۋاپكەرشىلىگى مەن مىندەتتەمەلەرىن ورىنداۋعا، ونى ناسيحاتتاۋعا ات سالىسىپ، وعان ءبىر كىسىدەي ءوز ۇلەسىمدى قوسسام با دەگەن مەندە تىلەك بار. ارينە، دەپۋتاتتىققا وتسەم، ەڭ ءبىرىنشى كەزەكتە قولعا السام دەگەن جانىمدا بىرنەشە ماسەلە بار. سونىڭ ءبىرى – دەنساۋلىق ماسەلەسى. وزدەرىڭىز بىلەسىزدەر، پاندەميادان سوڭ بۇل سالانىڭ تومپاق تۇستارى وزدىگىنەن ءبىلىنىپ قالىپ جاتتى. وسىعان بايلانىستى اكىمدىككە ۇسىنىس جاساۋ ءۇشىن جيناقتالعان ءبىرتالاي قۇجاتتار بار. ول جۇيەلىك، زاڭنامالىق ماسەلەلەردى قامتيدى. تەحنيكۋمنان سوڭ ەكى جوعارى ءبىلىم الىپ، زاڭگەر جانە ەكونوميست ماماندىعىنا يە بولدىم. وسى بىلىمدەرىم ماسەلە شەشىمىندە تولىقتاي قولدانۋعا مۇمكىندىك بولادى دەپ سەنەمىن، - دەيدى ول.
ونىڭ ايتۋىنشا، اگروبيزنەسكە ءقازىر مەملەكەت تاراپىنان ۇلكەن قارجى ءبولىنىپ جاتىر. تەك سول مۇمكىندىكتى كوپ ادام بىلمەستىكتەن، پايدالانا الماي ءجۇر.
- اتا-بابامىز مال باققان، سونىمەن تىرشىلىك كەشكەن. سوندىقتان بۇل اتا كاسىپ قازاققا مايداي جاعۋى ءتيىس. اگروونەركاسىپ سالاسى بويىنشا اقىل-كەڭەس سۇرايتىندار بولسا، مەن كومەكتەسۋگە ءارقاشان دايىنمىن. بۇل جاعىمنان بىلىگىم دە، ءبىلىمىم دە جەتەرلىك.
دەپۋتات ايتسا، ماسەلە وزدىگىنەن شەشىلەدى دەگەن، ارينە بولمايدى. ءار دەپۋتاتتىڭ ارتىندا مىندەتتى تۇردە قولدايتىن قالىڭ جۇرتى بولۋى ءتيىس.
- مەملەكەت باسشىسى قاسىم-جومارت توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمىنا سايكەس، بيلىك پەن قاراپايىم حالىق اراسىنداعى التىن كوپىر ءارى حالىق ءۇنىن مەملەكەتكە جەتكىزۋشى دەپۋتاتتار دەپ بىلەمىن. قازىرگى اقپاراتتىق تەحنولوگيا دامىعان زاماندا بۇل ابدەن مۇمكىن نارسە. مەنىڭ الەۋمەتتىك جەلىلەردە پاراقشالارىم بار، ءوز ەلەكتوراتىما ساي وعان جازىلۋشىلار دا جەتەرلىك. سول ارادا جەكەگە جازىلعان وزەكتى ماسەلەلەردى بيلىك الدىنا جەتكىزىپ، ونىڭ شەشىمىنە ات سالىسۋعا، ارينە دايىنمىن. ازاماتتىق قوعامنىڭ اشىق ادامى رەتىندە سايلاۋشىلارىما ەسىگىم دە، جەلىدەگى پاراقشالارىمنىڭ دايرەگى دە ءاردايىم اشىق، - دەيدى ول.
