وتىرىستى ەلوردا اكىمىنىڭ ورىنباسارى باقتيار ماكەن جۇرگىزدى. ءوزىنىڭ قۇتتىقتاۋ سوزىندە ول ق ر تۇڭعىش پرەزيدەنتى – ەلباسى نۇرسۇلتان نازاربايەۆ بەلگىلەگەن العىس ايتۋ كۇنى – ەلىمىزدىڭ جالپى تاريحىنا دەگەن قۇرمەت ەكەنىن اتاپ ءوتتى. «مەملەكەت باسشىسى قاسىم-جومارت كەمەل ۇلى توقايەۆ تاۋەلسىزدىگىمىزدىڭ بارلىق جەتىستىگى قوعامىمىزدىڭ بىرلىگىنىڭ ارقاسىندا مۇمكىن بولعانىن ەرەكشە اتاپ ءوتتى. بۇل – قازاقستاننىڭ باعا جەتپەس قازىناسى». سوندىقتان بۇل مەرەكەنىڭ نەگىزگى مىندەتى – جاس ۇرپاققا عاسىرلار بويى قالىپتاسقان قۇندىلىقتاردى ءسىڭىرۋ.
– بۇگىن دوستىق ۇيىندە ءتۇرلى ەتنوس وكىلدەرى جينالىپ، وزدەرىنىڭ دوستىعىن، ورتاق ءۇيى – قازاقستان رەسپۋبليكاسىن گۇلدەنگەن، تاۋەلسىز جانە ەركىن ءومىر سۇرۋگە دەگەن ۇمتىلىسىن تاعى ءبىر رەت كورسەتتى. 2021 جىل قازاقستان رەسپۋبليكاسى تاۋەلسىزدىگىنىڭ 30 جىلدىعى تاريحىمىزدىڭ ماڭىزدى كەزەڭى بولىپ سانالادى.
ۆولونتەرلىك، قايىرىمدىلىق قاعيداتتارى العىس ايتۋ كۇنىنىڭ يدەيالارىنا جاقىن. بۇل – ءوز ەركىمەن جاسالىپ، قوعامعا جانە قولداۋعا مۇقتاج ازاماتتاردىڭ ءتۇرلى الەۋمەتتىك ساناتتارىنا كومەك كورسەتۋگە باعىتتالعان قىزمەت، – دەپ اتاپ ءوتتى قالا اكىمىنىڭ ورىنباسارى.
ول سونداي-اق قالانىڭ بارلىق مەكەمەلەرى مەن ۇيىمدارى، ەتنومادەني بىرلەستىكتەرى «30 يگى ءىس» قايىرىمدىلىق اكسياسىنا بەلسەندى ارالاسىپ جاتقانىن اتاپ ءوتتى. ال ەلوردالىق قحا «العىس مارافونى» قايىرىمدىلىق اكسياسىن باستادى.
دوڭگەلەك ۇستەل بارىسىندا ق ر پارلامەنتى ءماجىلىسىنىڭ VII شاقىرىلىمىنىڭ دەپۋتاتى، زاڭناما جانە سوت-قۇقىقتىق رەفورما كوميتەتىنىڭ مۇشەسى ۆاكيل نابييەۆ تۇتاس حالىقتار قازاق دالاسىنا قالاي جانە قانداي جاعدايدا جەر اۋدارىلعانىن ەسكە سالدى.
– سان قيلى قيىندىقتاردان امان قالعاندار وسى جەردە وتانىن تاۋىپ، بەيبىتشىلىك پەن كەلىسىمدە ءومىر ءسۇرىپ كەلەدى. باستارىندا باسپاناسى بار، بالالارىن وقىتىپ، تاربيەلەپ جاتىر. ولاردىڭ ءبارى قازاقستاندا بەيبىت ءومىر ءسۇرىپ ءجۇر. بۇل جەردە بۇكىل رەسپۋبليكا حالقىنىڭ زور ەڭبەگى بار. ەڭ باستىسى ق ر تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ ىشكى جانە سىرتقى ساياساتى بارىنەن ەرەك.
مەن ءوزىم دەپورتاسيالانعان وتباسىنىڭ ۇرپاعىمىن. قاريالارىمىز ول زامانداعى ءومىر قيىن بولعانىن ءالى كۇنگە دەيىن اڭگىمەلەپ وتىرادى. كوز الدىڭىزعا ەلەستەتىپ كورىڭىزشى، قازاق حالقى 30-جىلدارعى اشتىقتان ەستەرىن جيا الماي جاتىپ، وزگە ۇلتتاردى جىلى قابىلدادى. وسىلايشا، قازاق حالقى مەيىرىمىن ءبولىپ، جاناشىرلىعىن كورسەتتى، – دەدى ول.
ونىڭ ايتۋىنشا، العىس ايتۋ كۇنىن مەرەكەلەۋدەگى نەگىزگى ماقساتتىڭ ءبىرى – وسكەلەڭ ۇرپاقتىڭ بويىندا توزىمدىلىك، بىر-بىرىنە دەگەن قۇرمەت پەن دوستىق قاسيەتتەرىن تاربيەلەۋ، سونداي-اق قازاقستاندا ەتنوسارالىق جانە ۇلتارالىق كەلىسىمدى نىعايتۋ.
وتىرىس بارىسىندا قازاقستان حالقى اسسامبلەياسى جانىنان قۇرىلعان انالار كەڭەسىنىڭ جۇمىسى جايلى ونىڭ ءتورايىمى التىناي تاڭىربەرگەنوۆا قوزعاپ ءوتتى.
وسىلايشا، كەڭەس دوستىق ءۇيىنىڭ بازاسىندا الەۋمەتتىك كاسىپكەرلىكتى دامىتۋ بويىنشا «Ana Time» جوباسىن ىسكە اسىرۋدا.
– جوبا نۇر-سۇلتان قالاسىنىڭ قازاقستان حالقى اسسامبلەياسىنىڭ قولداۋىمەن جانە «Aidyn Nury قايىرىمدىلىق قورى» جق-نىڭ دەمەۋشىلىگىمەن جۇزەگە اسىرىلۋدا. وقىتۋ ءۇش مودۋلدەن تۇرادى. وندا ايەلدەر پسيحولوگيالىق مودۋلدەن وتەدى. ارى قاراي باستان-اياق ءوزىمىزدىڭ الەۋمەتتىك بيزنەستى قالاي اشۋعا بولاتىنىن ۇيرەتەمىز. ال قورىتىندى كەزەڭ – پراكتيكالىق مودۋل. وندا ءبىز ANA TIME جوباسىنا قاتىسۋشىلارمەن بىرگە جۇمىس ىستەپ تۇرعان الەۋمەتتىك كاسىپكەرلەردىڭ وندىرىستەرىنە بارامىز. قاتىسۋشىلارمەن تىعىز قارىم-قاتىناس ورناتۋ جانە شارتتار جاساسۋ ءۇشىن ناقتى ءبىر ورىندى نەمەسە بەلگىلى ءبىر نەتۆوركتى ۇيىمداستىرامىز. اي سايىن جوبادان 20 ايەل وتەدى. وعان 6 ايدا جالپى سانى 120 ادام قاتىسادى، – دەدى ا.تاڭىربەرگەنوۆا.
ءىس-شارا سوڭىندا قاتىسۋشىلارعا نۇر-سۇلتان قالاسى اكىمىنىڭ العىس حاتتارى تاپسىرىلدى.
