استانادا ۇلەسكەر وتباسىلاردىڭ 90%-عا جۋىعىنىڭ پروبلەماسى شەشىلگەن. وسىلايشا، جىل سوڭىنا قاراي ۇلەسكەرلەر سانى شامامەن 16 مىڭنان 2 مىڭ وتباسىعا دەيىن قىسقارادى. ماسەلەن 2019 جىلدىڭ جازىندا قۇرىلىسى ۇزاققا سوزىلعان 150 كوپپاتەرلى تۇرعىن ءۇي بولاتىن، بۇگىنگە دەيىن 120 ءۇيدىڭ پروبلەماسى شەشىلدى.

قۇرىلىسى ۇزاققا سوزىلعان قالعان 30 ءۇي بويىنشا قادامدىق ءىس-شارالار جوسپارى بار. وندا 2 مىڭعا جۋىق وتباسى باسپاناسىن كۇتىپ ءجۇر. مۇنداي پروبلەمالى ۇيلەردىڭ اياقتالۋى مەملەكەت باسشىسىنىڭ تىكەلەي باقىلاۋىندا.

قۇرىلىسى ۇزاققا سوزىلعان ءاربىر ءۇيدىڭ پروبلەماسى ءارتۇرلى بولاتىن. بىرىندە تەك شۇڭقىرى عانا قازىلعان، ەندى بىرىندە قارجىلىق اۋديت، جوبالىق-سمەتالىق سەكىلدى قۇجاتتاماسى جوق ەدى، سول سياقتى ءبىر پاتەردى ەكى-ۇش وتباسىعا ساتقان جايتتار دا بولدى، تاعى بىرىندە قاڭقاسى تۇرعىزىلعان ءۇي اپاتتى كۇيدە بولاتىن.

مىسالى «تەرريتوريا كومفورتا-1» تۇرعىن ءۇي كەشەنىنىڭ قۇرىلىسى 2004 جىلى باستالعان. ءۇيدى تەحنيكالىق تەكسەرۋ بارىسىندا عيماراتتىڭ اپاتتى جاعدايدا ەكەنى بەلگىلى بولدى.

بۇرىنعى قۇرىلىس سالۋشى تەحنيكالىق نورمالارعا ساي كەلمەيتىن بەتون ماركاسىن قولدانعان، پليتالار اراسىندا سايكەستىك بولماعان. قۇرىلىسشىلاردىڭ ايتۋىنشا بۇل ءۇي پايدالانۋعا بەرىلگەندە ۇزاققا بارماي قيراپ، تۇرعىندار ءۇيىندىنىڭ استىندا قالار ەدى. وسىدان كەيىن ونىڭ بلوكتارى بۇزىلىپ، ورنىنا جاڭا تۇرعىن ءۇي كەشەنى سالىندى، ناتيجەسىندە تۇرعىندار كوپتەن كۇتكەن باسپاناسىنا يە بولدى.