ەلوردادا «زاڭ جانە ءتارتىپ» قاعيداتى اياسىندا ناشاقورلىقتىڭ الدىن الۋ ماقساتىندا 30 كۇندىك كەشەندى شارالار باستالدى،- دەپ حابارلايدى Dalanews.kz
پوليسيا دەپارتامەنتىندە پروكۋراتۋرا، پوليسيا جانە ناشاقورلىقتىڭ الدىن الۋ مەن ەسىرتكى قىلمىسىنا قارسى ءىس-قيمىل جونىندەگى ۆەدومستۆوارالىق شتاب مۇشەلەرىنىڭ قاتىسۋىمەن كەڭەس ءوتتى.
«ناشاقورلىق پەن ەسىرتكى قىلمىسىنا قارسى كۇرەس – قۇقىق قورعاۋ ورگاندارىنىڭ باستى مىندەتتەرىنىڭ ءبىرى. بۇل بارلىق قۇرىلىمنىڭ بەلسەندى ءوزارا ءىس-قيمىلىن تالاپ ەتەدى. ءبىز جۇيەلى پروفيلاكتيكاعا باسىمدىق بەرىپ وتىرمىز جانە تەك قوعاممەن بىرلەسكەن جۇمىس قانا جاستاردى قورعاۋعا ءارى ازاماتتاردىڭ قاۋىپسىزدىگىن قامتاماسىز ەتۋگە مۇمكىندىك بەرەتىنىنە سەنىمدىمىز»، - دەپ اتاپ ءوتتى پوليسيا دەپارتامەنتى باستىعىنىڭ ءبىرىنشى ورىنباسارى قۋانىش ورىنبەتوۆ.
كەشەندى شارالار اياسىندا بىرلەسكەن رەيدتەر، وقۋ ورىندارىندا پروفيلاكتيكالىق كەزدەسۋلەر وتكىزۋ، سونداي-اق تىيىم سالىنعان زاتتاردى تاراتاتىن ينتەرنەت-رەسۋرستاردى انىقتاپ، جويۋ جۇمىسى كوزدەلگەن.
ەرەكشە نازار جاستارمەن ءوزارا بايلانىسقا جانە حالىقتىڭ قۇقىقتىق ساۋاتتىلىعىن ارتتىرۋعا اۋدارىلادى.
قابىلدانعان شارالار ازاماتتاردىڭ دەنساۋلىعىن قورعاۋعا، قوعامدىق قاۋىپسىزدىكتى نىعايتۋعا جانە ەسىرتكى قاتەرىنە ءتيىمدى تۇردە قارسى تۇرۋعا باعىتتالعان.
