جەلىگە 52 جەدەل جاردەم كولىگى شىقتى، جاڭا جىلدان باستاپ تاعى 22 جەدەل جاردەم كولىگى الىنادى. كولىك سانى 64-تەن 138-گە دەيىن، ەكى ەسە ارتادى.
پرەزيدەنت مەديسينانىڭ دامۋىنا، مەديسينالىق قىزمەتتەردىڭ قولجەتىمدىلىگىن قامتاماسىز ەتۋگە جانە ساپاسىن جاقسارتۋعا، جەدەل جاردەم قىزمەتىن جاڭعىرتۋعا ەرەكشە كوڭىل بولگەن بولاتىن.
شجق «قالالىق جەدەل مەديسينالىق جاردەم ستانسياسى» مكك ديرەكتورى مۇرات ورازبايەۆتىڭ ايتۋىنشا، ماشينالاردىڭ باسىم بولىگى قارقىندى تەراپيا، مونيتورينگ جانە شۇعىل مەديسينالىق كومەكتى قاجەت ەتەتىن پاسيەنتتەردى تاسىمالداۋ مۇمكىندىگى بار رەانيموبيلدەر.
بۇل كولىك دەفيبريلياتورلارمەن جانە جۇرەك ىرعاعىنا تولىق مونيتورينگ جاسايتىن جۇيەمەن جابدىقتالعان. سونداي-اق ءار كولىكتە وكپەنى جاساندى جەلدەتۋ اپپاراتى، وتتەگى باللونى، جاساندى قاناينالىم اپپاراتى بار.
– مەديسينالىق كومەك كورسەتۋ ساپاسىن ارتتىرۋ مەن ەڭبەك جاعدايىن جاقسارتۋ بويىنشا ءبىرقاتار جۇمىستار اتقارىلدى. بىرىنشىدەن، اۆتوكولىكتەر سانىن ەكى ەسەگە ارتتىرۋ ناتيجەسىندە جەدەل جاردەم بريگاداسىنىڭ كەلۋ ۋاقىتى – 10 مينۋت بولدى. جەدەل جاردەم بريگادالاردىڭ سانى 20-عا دەيىن ارتتى.
ەكىنشىدەن، دەنساۋلىق ساقتاۋ باسقارماسىمەن جانە ikomek109 بايلانىس ورتالىعىمەن بىرلەسە مەملەكەتتىك مەديسينالىق مەكەمەلەردىڭ جۇمىسىنا تالداۋ جاسادىق. تۇرعىنداردى تولعاندىراتىن 4 باستى ماسەلە انىقتالدى. ولار دارىگەردىڭ قابىلداۋىنا جازىلۋ، ەمحانالارداعى كەزەك، مەديسينا قىزمەتكەرلەرىنىڭ ادەپتىلىك نورمالارى مەن مىنەز-قۇلىق قاعيدالارىن ۇستانباۋى مەن بىلىكسىزدىگى.
قازان ايىنان باستاپ مەديسينالىق ۇيىمداردىڭ ءبىرىنشى باسشىلارىنىڭ ۇيالى تەلەفوندارىنا موبيلدىك قوسىمشالار ورناتىلدى. بۇل 3 اي ىشىندە تۇرعىنداردىڭ وتىنىشتەرىن ورىنداۋ ۋاقىتىن 5-6 كۇننەن 1-2 كۇنگە دەيىن قىسقارتۋعا مۇمكىندىك بەردى.
ۇشىنشىدەن، پاسيەنتتەردىڭ وتىنىشىنە سايكەس 2، 6 جانە 9 ەمحانالاردا ەلەكتروندىق كەزەك جۇيەسى ەنگىزىلدى. جاڭا جىلدان باستاپ اتالمىش جۇيەنى بارلىق مەديسينالىق مەكەمەلەردە ەنگىزىپ باستايمىز.
تورتىنشىدەن، كەلەسى جىلدان باستاپ مەملەكەتتىك-جەكەمەنشىك ارىپتەستىك اياسىندا سارىارقا اۋدانىندا ورنالاساتىن جاڭا مەديسينالىق مەكەمەنىڭ قۇرىلىسى باستالادى.
بەسىنشىدەن، ەلىمىزدى سيفرلاندىرۋ اياسىندا 2019 جىلدىڭ ءساۋىر ايىندا "iKOMEK" ورتالىعى بازاسىندا "iKOMEK112" ءبىرىڭعاي كەزەكشى-ديسپەچەرلىك قىزمەتى پيلوتتىق جوباسى ىسكە قوسىلدى. بۇل جوبا 101، 102، 103 قىزمەتتەرىنە كەلىپ تۇسەتىن قوڭىراۋلار جۇكتەمەسىن 81%-عا جەڭىلدەتۋگە مۇمكىندىك بەرەدى، – دەدى ەلوردا اكىمى التاي كولگىنوۆ.
جاڭادان سالىنىپ جاتقان تۇرعىن ۇيلەر بارلىق جاعىنان ىڭعايلى بولۋى قاجەت. العاشقى مەديسينالىق-سانيتارلىق كومەك كابينەتتەرى حالىققا 20 مينۋتتىق ۋاقىت ىشىندە قولجەتىمدى بولۋى كەرەك. جاڭا تۇرعىن ءۇي كەشەندەرىنىڭ ءبىرىنشى قاباتتارىندا ەمحانا، بالاباقشا، وڭالتۋ ورتالىقتارى، پوليسيا پۋنكتى سياقتى الەۋمەتتىك نىساندار اشىلادى. وسى جىلى حالىقارالىق ستاندارتتارعا ساي رەانيماسيا جانە ءقاۋىپسىز جۇرگىزۋ بويىنشا 700 قىزمەتكەر وقۋدان ءوتتى.
