– ەلوردادا كەزەكتى بىرەگەي ورتالىق اشىلدى! ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار ءۇشىن «باقىتتى شاڭىراق» ورتالىعى (ر.قوشقاربايەۆ داڭعىلى، 60) ءوز ەسىگىن ايقارا اشىپ وتىر. بۇل – قالامىزداعى ءتورتىنشى ورتالىق. ونىڭ ەرەكشەلىگى – مۇمكىندىگى شەكتەۋلى بالالارعا عانا ەمەس، ولاردىڭ انالارىنا دا قاجەت كومەك تۇرلەرى كورسەتىلەدى، – دەدى قالا باسشىسى.
ورتالىقتا ەرەكشە كۇتىمدى قاجەتسىنەتىن بالالاردىڭ انالارىنا قايتا ءبىلىم الۋ، بىلىكتىلىگىن ارتتىرۋ كۋرستارىنان ءوتۋ، جۇمىسقا ورنالاسۋ بويىنشا جەردەم بەرىلەدى. بۇدان باسقا پسيحولوگيالىق كومەك تە كورسەتىلەتىنىن اتا كەتۋىمىز كەرەك. «باقىتتى شاڭىراق» ورتالىعى مۇمكىندىگى شەكتەۋلى 600-دەن استام بالانى قامتيدى.
– مەملەكەت باسشىسىنىڭ تاپسىرماسى بويىنشا ەرەكشە قاجەتتىلىكتەرى بار بالالارعا جان-جاقتى جاعداي جاساۋ ىسىنە ەرەكشە كوڭىل ءبولىپ كەلەمىز. سوڭعى جىلدارى ەلوردادا وڭالتۋ ورتالىقتارىنىڭ جەلىسى ايتارلىقتاي ارتتى. بۇگىندە قالامىزدا 15-تەن استام ورتالىق اشىلىپ، 4 مىڭعا جۋىق مۇمكىندىگى شەكتەۋلى بالاعا قولداۋ كورسەتىلۋدە. وڭالتۋ ورتالىقتارى مەن كومەك كورسەتۋ ورتالىقتارى ەرەكشە بالالاردىڭ اتا-انالارى ءۇشىن اۋاداي قاجەت. سەبەبى مۇنداي ورتالىقتار بالانىڭ دەنساۋلىعىن جاقسارتۋعا جانە ولاردى الەۋمەتتەندىرۋگە كومەكتەسەدى، – دەپ التاي كولگىنوۆ الەۋمەتتىك نىساننىڭ ماڭىزى جايىندا ايتىپ بەردى.
ەلوردادا وسىعان دەيىن «اسىل ميراس»، «وردا»، «بالام-اي» وڭالتۋ ورتالىقتارى اشىلعان بولاتىن. ال №1 قالالىق بالالار اۋرۋحاناسى بازاسىندا «قامقورلىق» وڭالتۋ ورتالىعى اشىلعان-دى. اتالعان الەۋمەتتىك ورتالىقتار دسپ، اۋتيزم، داۋن سيندرومى جانە جۇرەك تالماسى سەكىلدى دياگنوزى بار بالالاردى وڭالتۋمەن اينالىسادى.
سونىمەن قاتار باس قالادا بىلىكتىلىكتى ارتتىرۋ جانە جۇمىسقا ورنالاستىرۋ ماسەلەسىنە ارنالعان ورتالىقتار، بەلسەندى ۇزاق ءومىر ءسۇرۋ ورتالىعى (ارداگەرلەر ءۇيى)، الەۋمەتتىك ورتالىقتار («جانۇيا» وتباسى ينستيتۋتىن قولداۋ ورتالىعى)، كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا (سارىارقا اۋدانى، كەنەسارى كوشەسى 9/1) اشىلعانىن ايتا كەتۋىمىز كەرەك.
