استانادا بالالاردىڭ تەرەزەدەن قۇلاۋىنىڭ الدىن الۋعا ءارى بولدىرماۋعا باعىتتالعان اۋقىمدى پروفيلاكتيكالىق اكسيا باستالدى،- دەپ حابارلايدى Dalanews.kz
ءىس-شارا باستالعان ورىن – №5 ءورت ءبولىمى، وندا قالالىق توتەنشە جاعدايلار دەپارتامەنتىنىڭ، جاسوسپىرىمدەر پوليسياسىنىڭ، اكىمدىكتىڭ وكىلدەرى، سونداي-اق ەرىكتىلەر مەن ىزدەستىرۋ-قۇتقارۋ جاساقتارى جينالدى. اكسيانىڭ باستى ماقساتى – تەرەزەلەرگە قورعانىس مەحانيزمدەرىن ورناتۋ جانە حالىققا ءتۇسىندىرۋ جۇمىستارىن جۇرگىزۋ ارقىلى بالالار اراسىنداعى اپاتتىق جاعدايلاردىڭ سانىن ازايتۋ.
«جىل باسىنان بەرى استانادا بالالاردىڭ تەرەزەدەن قۇلاۋىنىڭ 50-دەن استام جاعدايى تىركەلدى. 39 بالا ءارتۇرلى جاراقات الدى. بۇل الاڭداتاتىن ستاتيستيكا، ءبىز كوز جازىپ قالا المايمىز. بۇگىن ەرىكتىلەر مەن قالالىق قىزمەتتەردىڭ قولداۋىمەن الەۋمەتتىك وسال وتباسىلاردىڭ پاتەرلەرىندە بلوكاتورلار ورناتامىز»، – دەدى استانا تجد-نىڭ ازاماتتىق قورعاۋ پولكوۆنيگى، ورىنباسارى قانات التىنبەكوۆ.
ۇيىمداستىرۋشىلاردىڭ ايتۋىنشا، رەيد بارىسىندا 600-دەن استام وتباسىنىڭ پاتەرىنە شامامەن مىڭ بلوكاتور ورناتىلادى. ارتىقشىلىق – كوپبالالى وتباسىلارعا، جالعىزباستى انالارعا جانە تاۋەكەل ايماعىندا ورنالاسقان باسقا ساناتتارعا بەرىلەدى.
بەلسەندىلەر قۇرىلعىلاردى ورناتۋمەن عانا شەكتەلمەي، پروفيلاكتيكالىق اڭگىمەلەر وتكىزەدى، اتا-انالارعا بالانى ۇيدە قاۋىپسىزدىكپەن قامتاماسىز ەتۋ جولدارىن تۇسىندىرەدى.
«بلوكاتور – ۇيدە كىشكەنتاي بالاسى بار ءاربىر پاتەردە بولۋى ءتيىس زات. ونى ورناتۋ بىرنەشە مينۋتتى عانا الادى، ەسەسىنە ادام ءومىرىن ساقتاپ قالادى»، – دەدى قۇرىلعى ورناتقان جەرگىلىكتى تۇرعىن.
شاراعا شامامەن 600 ادام قاتىسۋدا – توتەنشە قىزمەتتەردىڭ ماماندارى، جەرگىلىكتى اتقارۋشى ورگانداردىڭ وكىلدەرى جانە ەرىكتىلەر.
«اتا-انالار اباي بولعانى ءجون. بالالاردى قاراۋسىز قالدىرماڭىزدار، مىندەتتى تۇردە بلوكاتور ورناتىڭىزدار. مۇنداي قاراپايىم شەشىم ءبىر ءومىردى ساقتاپ قالۋى مۇمكىن»، – دەپ قوستى التىنبەكوۆ.
