استانا قالاسىندا سەكۋندىنا 10 گبيت/س دەيىنگى (10G) سىمدىق ينتەرنەتتى سىناۋعا ارنالعان پيلوتتىق جوبا ىسكە قوسىلدى،- دەپ حابارلايدى Dalanews.kz
ءىس-شاراعا قالا اكىمى ورىنباسارى ەۆگەنيي گلوتوۆ، مەملەكەتتىك ورگاندار وكىلدەرى جانە جوبانىڭ تەحنولوگيالىق سەرىكتەستەرى قاتىستى.
جوبا Huawei Technologies Kazakhstan پەن «استانا Innovations» اق اراسىندا سيفرلىق شەشىمدەر مەن تەلەكوممۋنيكاسيالىق ينفراقۇرىلىمدى بىرلەسىپ دامىتۋ تۋرالى مەموراندۋم اياسىندا جۇزەگە اسىرىلۋدا. باستامانى استانا اكىمدىگى قولداپ، تەحنولوگيالىق سەرىكتەس رەتىندە Beeline كومپانياسى اتسالىسۋدا.
كورسەتىلىم الاڭىنىڭ ينفراقۇرىلىمدىق سەرىكتەسى رەتىندە Forte كومپانياسى قىزمەت ەتەدى.
تانىستىرۋ بارىسىندا قاتىسۋشىلارعا 10G PON تەحنولوگياسىنىڭ ەرەكشەلىكتەرى مەن ارتىقشىلىقتارى تانىستىرىلىپ، جاڭا بۋىنداعى وپتيكالىق تەرمينالدار، زاماناۋي OLT جانە Wi-Fi 7 ستاندارتى كورسەتىلدى. دەمونستراسيالىق ايماقتا قوناقتار ينتەرنەتتى جەكە سىناپ، قوسىلۋ جىلدامدىعىن ولشەپ، سەرۆيستەردىڭ تۇراقتىلىعىن باعالاي الدى. جەلىلىك سىناقتار 9490 مبيت/س دەيىنگى جۇكتەۋ جانە جۇكتەپ سالۋ جىلدامدىعىن كورسەتتى، بۇل رەسۋرستى قاجەت ەتەتىن سەرۆيستەردىڭ، 8K بەينەدەن بۇلتتىق ويىنعا دەيىن، تۇراقتى جۇمىس ىستەۋى ءۇشىن جەتكىلىكتى.
«استانادا 10G تەحنولوگياسىن ىسكە قوسۋ – جاڭا بۋىن سيفرلىق ينفراقۇرىلىمىن قالىپتاستىرۋعا ستراتەگيالىق قادام. ءبىز ءۇشىن يننوۆاسيالاردىڭ سىناقتان پراكتيكالىق قولدانۋعا تەز اۋىسۋى جانە قالا تۇرعىندارى مەن بيزنەستەرگە ناقتى پايدا اكەلۋى ماڭىزدى. بۇل جوبا استانادا زاماناۋي سەرۆيستەردى ەنگىزۋدىڭ نەگىزى بولادى دەپ سەنەمىن، ولار قالانىڭ ينفراقۇرىلىمىن جاڭا دەڭگەيگە كوتەرەدى»، — دەدى «استانا Innovations» اق باسقارما ءتوراعاسى عيزات ءامىرعالي.
«Huawei ازىرلەگەن 10G PON تەحنولوگياسىنىڭ ەلىمىزدە العاش رەت اشىق جوبانىڭ اياسىندا قولجەتىمدى بولۋى ءبىز ءۇشىن ماقتانىش. سۋپەرجوعارى جىلدامدىقتى سىمدىق ينتەرنەت قالالىق ورتادا سيفرلاندىرۋدى، بيزنەستىڭ، ءبىلىم بەرۋ مەن دەنساۋلىق ساقتاۋدىڭ دامۋىن جاڭا دەڭگەيگە كوتەرەدى.
سەرىكتەستەرىمىزگە سەنىم بىلدىرگەندەرى ءۇشىن العىسىمىزدى ايتامىز جانە بۇل جوبا ەلىمىز بويىنشا وزىق سيفرلىق شەشىمدەردى ماسشتابتاۋدىڭ نەگىزى بولادى دەپ سەنەمىز»، — دەدى Huawei Technologies Kazakhstan كومپانياسىنىڭ باس ديرەكتورى سۋن ياسيۋي.
«سيفرلىق وپەراتور رەتىندە ءبىزدىڭ باستى ماقساتىمىز – ەڭ وزىق تەحنولوگيالاردى پايدالانا وتىرىپ، كليەنتتەرگە ۇزدىك تاجىريبە ۇسىنۋ. مۇنداي ماڭىزدى شارادا تەحنولوگيالىق سەرىكتەس بولىپ قاتىسقانىما قۋانىشتىمىز، بۇل ەلىمىزدىڭ سيفرلىق ەكوجۇيەسىندە جاڭا كەزەڭنىڭ باستاۋى. Beeline تەستتىڭ مۇمكىندىگىنشە تەزىرەك كۇندەلىكتى ءومىردىڭ ءبىر بولىگىنە اينالۋىنا كۇش سالاتىن بولادى»، — دەدى CEO Enterprise CO Beeline راۋان كادبراحيموۆ.
پيلوتتىق جوباعا قالا تۇرعىندارى 2025 جىلدىڭ 19 قىركۇيەگىنە دەيىن قاتىسا الادى. 10G ينتەرنەتتى سىناۋ دوستىق ك-سى، 8/1 مەكەنجايى بويىنشا Forte كوۆوركينگىندە دۇيسەنبىدەن جۇماعا دەيىن، ساعات 9:00-دەن 18:00-گە دەيىن جۇزەگە اسىرىلادى.
ايتا كەتەيىك، 10G PON – بۇل سەكۋندىنا 10 گيگابيت جىلدامدىققا دەيىنگى سىمدىق ينتەرنەت. 4G جانە 5G ۇيالى بايلانىس ستاندارتتارىنان ايىرماشىلىعى، «10» سانى تەحنولوگيانىڭ بۋىنىن ەمەس، دەرەكتەردى تاسىمالداۋ جىلدامدىعىن بىلدىرەدى.
