قازاقستاندا شاعىن جانە ورتا بيزنەس سۋبەكتىلەرىنىڭ سانى 2،1 ميلليوننان استى، دەپ حابارلايدى Dalanews.kz.
ق ر ۇكىمەتى باسپا ءسوز قىزمەتىنىڭ حابارلاۋىنشا، 2021 جىلدان باستاپ قازاقستاندا كاسىپكەرلىك قىزمەت سالاسىندا جاڭا رەتتەۋشىلىك ساياساتتى كەزەڭ-كەزەڭىمەن ەنگىزۋ بويىنشا جۇمىس جۇرگىزىلۋدە. 2024 جىلعى 6 ساۋىردە مەملەكەتتىك قاداعالاۋدى جەتىلدىرگەن جانە 10 مىڭنان استام ارتىق تالاپتاردىڭ كۇشىن جويعان بيزنەستى جۇرگىزۋ تۋرالى زاڭ قابىلداندى.
باس پروكۋراتۋرانىڭ مالىمەتىنشە، 2024 جىلى بيزنەسكە قاداعالاۋ جۇكتەمەسى 2019 جىلمەن سالىستىرعاندا 58%-عا تومەندەگەن. وعان قوسىمشا 2024 جىلعى 30 جەلتوقساندا بيرجالىق ساۋدا جانە كاسىپكەرلىك ماسەلەلەرى جونىندەگى زاڭمەن ينۆەستورلارعا قاداعالاۋ جۇكتەمەسىن ازايتۋ ماقساتىندا كەز كەلگەن شەكتەۋ جانە تىيىم سالۋ شارالارىن پروكۋرورلاردىڭ ماقۇلداۋىن تالاپ ەتەتىن "پروكۋرورلىق سۇزگى" تەتىگى ەنگىزىلدى.
وتاندىق كاسىپورىنداردىڭ جۇكتەمەسىن ارتتىرۋ ماقساتىندا ۇكىمەت رەتتەلەتىن ساتىپ الۋ قۇرالدارىن كەڭەيتىپ، ۇزاقمەرزىمدى كەلىسىمشارتتار مەن وفتەيك-كەلىسىمشارتتاردى ەنگىزدى.
مەملەكەتتىك ساتىپ الۋلار اياسىندا ۇلتتىق رەجيمنەن 4 834 تاۋار پوزيسياسىن الىپ تاستاۋ بەلگىلەنگەن. 2025 جىلدىڭ التى ايىنىڭ قورىتىندىسى بويىنشا 333،4 ملرد تەڭگەگە 106 مىڭنان استام كەلىسىمشارت جاسالدى. بۇل 2024 جىلدىڭ سايكەس كەزەڭىمەن سالىستىرعاندا ەكى ەسەدەن استام ءوسىم كورسەتەدى.
سونىمەن قاتار وتاندىق تاۋار وندىرۋشىلەردىڭ ءبىرىڭعاي ءتىزىلىمىن قالىپتاستىرۋ جۇمىسى جۇرگىزىلۋدە. ول كومپانيالاردىڭ ساتىپ الۋلار مەن مەملەكەتتىك قولداۋ شارالارىنا باسىمدىقپەن قول جەتكىزۋىن قامتاماسىز ەتىپ، "جالعان وندىرۋشىلەردى" نارىقتان شىعارىپ تاستاۋعا مۇمكىندىك بەرەدى.
وتاندىق تاۋار وندىرۋشىلەر ءتىزىلىمى: سيفرلىق ۆەريفيكاسيا جانە نارىقتى قورعاۋ
پرەزيدەنتتىڭ تاپسىرمالارىن ورىنداۋ ماقساتىندا قازاقستاندىق تاۋارلار ءتىزىلىمىن قالىپتاستىرۋ جۇمىسى اياقتالۋدا. بۇل پلاتفورما ست-KZ جانە يندۋستريالىق سەرتيفيكاتتاردى الماستىرىپ، مەملەكەتتىك دەرەكقورلار ارقىلى مالىمەتتەردىڭ اۆتوماتتى ۆەريفيكاسياسىن قامتاماسىز ەتەدى، سىبايلاس جەمقورلىق تاۋەكەلدەرىن تومەندەتەدى جانە ناقتى ءوندىرىستى راستاۋعا مۇمكىندىك بەرەدى.
كومپانيالار QR-كودى بار تەگىن ونلاين-انىقتاما الا الادى. بۇل تىزىلىمگە ەنگىزۋ تەك راستالعان ءوندىرىس بولعان جاعدايدا عانا جۇزەگە اسىرىلادى. تولىققاندى ىسكە قوسۋ 2026 جىلعى 1 قاڭتارعا جوسپارلانعان.
"سونىمەن قاتار، ليسەنزيالاۋدىڭ قولجەتىمدىلىگى مەن بولجامدىلىعى ارتادى: 2025 جىلدىڭ سوڭىنا دەيىن بيزنەستىڭ ءارتۇرلى ليسەنزيالار مەن رۇقساتتاردى الۋى ءۇشىن بىلىكتىلىك تالاپتارى قايتا قارالادى، سونداي-اق ولاردى الۋ راسىمدەرى مەن مەرزىمدەرى وڭتايلاندىرىلادى. بيزنەس ءبىرقاتار ەسەپتەردى تاپسىرۋدان بوساتىلدى. كاسىپكەرلىك قىزمەتتىڭ 58 سالاسىندا بار 381 اقپاراتتىق قۇرال 49%-عا وڭتايلاندىرىلدى جانە 37%-عا اۆتوماتتاندىرىلدى. قابىلدانعان شارالار ناتيجەسىندە شاعىن جانە ورتا بيزنەس سانى 2024 جىلمەن سالىستىرعاندا 4،7%-عا نەمەسە 96 209 كاسىپورىنعا ءوسىپ، 2 125 003 كاسىپورىندى قۇرادى. ەكونوميكاداعى شوب ۇلەسى دە 0،9 پايىزدىق تارماقشاعا ءوسىپ، 38،6%-عا جەتتى. شاعىن جانە ورتا بيزنەس سۋبەكتىلەرىنىڭ ءونىم شىعارۋ كولەمى 18،7 ترلن تەڭگەنى قۇراپ، 11،4%-عا ۇلعايدى"، دەلىنگەن ۇكىمەت حابارلاماسىندا.
پرەزيدەنتتىڭ تاپسىرماسىنا سايكەس، مەملەكەتتىڭ بيزنەسپەن ءوزارا ءىس-قيمىل جاساۋ تاسىلدەرى قاداعالاۋدان سەرىكتەستىككە قاراي وزگەرۋدە.
"2025 جىلدىڭ 1 ساۋىرىندە كاسىپكەرلەردى قولداۋ ءۇشىن ارنايى جاسالعان زاماناۋي سيفرلىق كومەكشى – eGov Business ءموبيلدى قوسىمشاسى جاڭارتىلدى. بۇل قوسىمشا موبيلدىك بايلانىس قۇرىلعىلارىن پايدالانا وتىرىپ شوب-قا ارنالعان مەملەكەتتىك قىزمەتتەردى كورسەتۋ پروسەستەرىن، مەملەكەتتىك قولداۋ شارالارى مەن "ەلەكتروندىق ۇكىمەت" سەرۆيستەرىن اۆتوماتتاندىرۋعا ارنالعان"، دەپ ناقتىلانادى.
جاڭا قىزمەتتەر اراسىندا كاسىپورىندى تىركەۋ، سالىق كۇنتىزبەسى، ەلەكتروندى سەرتيفيكاتتار الۋ جانە قۇجاتتارعا سيفرلىق قول قويۋ سياقتى سەرۆيستەر قولجەتىمدى.
