دەنساۋلىق ساقتاۋ ۆيسە-مينيسترى تيمۋر مۇراتوۆ 2025 جىلعى 11 قاراشا كۇنى ۇكىمەتتەگى باسپا ءسوز ءماسليحاتىندا بالالاردىڭ ونكولوگيالىق اۋرۋلارىن ەمدەۋگە قانداي دارىلەر ساتىپ الىنعانى تۋرالى مالىمدەدى دەپ حابارلايدى Dalanews.kz.
ونكولوگيامەن اۋىراتىن بالالاردىڭ اتا-انالارى 2026 جىلى العاشقى نۇسقاداعى دارىلەردەن ايىرىلىپ قالامىز دەپ الاڭداۋدا. جۋرناليستەر اتاپ وتكەندەي، اتا-انالار ءۇندىستان مەن بەلارۋسسيادا وندىرىلگەن گەنەريك نۇسقاسىن قالامايدى، ويتكەنى ولاردى قابىلداۋ بالالارعا اۋىر تيەدى.
«ءقازىر ۇلكەن جۇمىس جۇرگىزىلىپ جاتىر، «سك-فارماسيا» ارقىلى ءتىپتى جاقىن شەت ەلدەردەن دە بالامالار تابىلۋدا. مەتوترەكساتقا قاتىستى – ول، ارينە، بولادى»، – دەپ جاۋاپ بەردى تيمۋر مۇراتوۆ.
جالپى العاندا، سپيكەردىڭ سوزىنشە، قازاقستان زاڭدى تىركەۋدەن وتكەن، ياعني دارى-دارمەكتەردى ساراپتاۋ ۇلتتىق ورتالىعى جۇرگىزەتىن تەكسەرۋدەن نەمەسە ەكسپەرتتىك باعالاۋدان وتكەن دارىلىك زاتتاردى ساتىپ الادى.
«سىزدەر نەگە 30% ارزان ىستەيسىزدەر دەپ سۇرايسىزدار. بۇل – سول العاشقى نۇسقاداعى دارىلەردى جاساۋعا جۇمسالعان قاراجات كولەمى. ال گەنەريك نۇسقاسىن وندىرۋشىگە بۇل قاجەت ەمەس، ول تەك سول تەحنولوگيانى قولدانىپ قايتا وندىرەدى. سوندىقتان ءبىز ونىڭ 30% ارزان بولۋى كەرەك دەپ ەسەپتەيمىز. ءبىراق بۇل گەنەريك نۇسقانىڭ ساپاسى العاشقى نۇسقاداعى دارىلەردەن تومەن دەگەندى بىلدىرمەيدى. ولار قاۋىپسىزدىك پەن تيىمدىلىك جاعىنان بىردەي»، – دەپ قوستى ۆيسە-مينيستر.
