ەنەرگەتيكا ۆيسە-مينيسترى سۇڭعات ەسىمحانوۆ جەكە ۇيلەردىڭ يەلەرى كۇن باتارەيالارىنان اقشا تابۋىنا بولاتىنىن ايتادى. الايدا ولار بۇل تۋرالى ءالى كوپ بىلە بەرمەيدى نەمەسە وعان دەگەن قاتتى قىزىعۋشىلىعى جوق. ويتكەنى مۇنداي ءتاسىلدى قولدانۋشىلار ەلىمىزدە ءالى از ەكەن، دەپ حابارلايدى Dalanews.kz.
ۆيسە-مينيستر قازاقستانداعى جەكە ۇيلەردىڭ تۇرعىندارى مەن كاسىپكەرلەر شاتىرعا نەمەسە جەر ۋچاسكەسىنە كۇن باتارەيالارىن ورناتا الاتىنىن جەتكىزدى.
"وتكەن جىلى ءبىز زاڭنامانى جاڭارتتىق. قاراپايىم تىلمەن ايتقاندا: جەكە ءۇيدىڭ تۇرعىنى شاتىرىنا 200 كيلوۆاتتىق كۇن باتارەياسىن ورناتا الادى. ونىڭ 100ء-ىن ءوزى تۇتىنىپ، ال قالعان 100ء-ىن جەلىگە ساتا الادى جانە ەنەرگيا تاسىمالداۋشى كومپانيا ونى وسى سالاداعى ورتاشا تاريف بويىنشا ساتىپ الۋعا مىندەتتى. بۇل وتە ءتيىمدى تەتىك"، - دەدى سۇڭعات ەسىمحانوۆ.
ول جەكە ۇيلەردە ورناتىلعان وسىنداي باتارەيالار سانى ءالى از ەكەنىن ايتادى. مۇنىمەن شاعىن بيزنەس وكىلدەرى الدەقايدا بەلسەندى اينالىسادى. وتكەن جىلى حالىق پەن شاعىن بيزنەستىڭ ورناتقان كۇن پانەلدەرىنىڭ قۋاتى ەكى ەسەدەن استامعا ءوستى. بيلىك اكىمدىكتەردىڭ كومەگىمەن وسىنداي قولداۋدى ودان ءارى دامىتىپ، كەڭەيتۋدى جوسپارلاپ وتىر.
2024 جىلدىڭ سوڭىنداعى جاعداي بويىنشا، قازاقستاندا جالپى قۋاتى 3 032 مۆت بولاتىن 153 جەك وبەكتىسى جۇمىس ىستەيدى، بۇل ەلدەگى ەلەكتر ەنەرگياسىن ءوندىرۋدىڭ جالپى كولەمىنىڭ 6،43%-ىن قامتاماسىز ەتۋگە مۇمكىندىك بەرۋدە.
