بيىل اۋا رايىنىڭ قولايسىزدىعىنا بايلانىستى اتىراۋ، قىزىلوردا، ماڭعىستاۋ، تۇركىستان جانە ءىشىنارا الماتى وبلىستارىندا مالدى ازىقپەن قامتاماسىز ەتۋ جاعدايى قيىندادى.
قۇرعاقشىلىق سالدارىنان مال ءولىمى ماڭعىستاۋ وبلىسىندا جانە قىزىلوردا وبلىسىنىڭ ارال اۋدانىندا تىركەلگەنى بەلگىلى.
ماڭعىستاۋ وبلىسى بويىنشا – 1 147 اۋىل شارۋاشىلىعى جانۋارى نەمەسە وبلىستىڭ جالپى مال باسىنىڭ 0،13%، قىزىلوردا وبلىسى بويىنشا – 492 نەمەسە وبلىستىڭ اۋىل شارۋاشىلىعى جانۋارىنىڭ جالپى مال باسىنىڭ 0،03% ءولدى.
ق ر اۋىل شارۋاشىلىعى مينيسترلىگى جانىنان جەم-شوپ دايىنداۋ ماسەلەلەرى بويىنشا جەرگىلىكتى اتقارۋشى ورگانداردىڭ ءىس-قيمىلىن ۇيلەستىرۋ ءۇشىن رەسپۋبليكالىق جەدەل شتاب قۇرىلدى. شتاب وتىرىسى ۇنەمى وتكىزىلىپ تۇرادى. وبلىس اكىمدىكتەرىنىڭ جانىناندا ازىق دايىنداۋ ماسەلەلەرىن تۇراقتى تۇردە مونيتورينگىلەۋ جانە جەدەل شەشۋ ءۇشىن جەدەل شتابتار قۇرىلدى.
بارلىق وبلىستا الداعى قىسقا ارنالعان اۋىل شارۋاشىلىعى مالىنا جەم دايىنداۋ جوسپارى انىقتالدى. قۇرعاقشىلىقتان زارداپ شەككەن وڭىرلەردىڭ فەرمەرلەرى ءۇشىن مال جايۋعا جايىلىمداردى بەرۋ جانە ءشوپ شابۋدى ۇيىمداستىرۋ بويىنشا ءوڭىرارالىق ءوزارا ءىس-قيمىل ۇيىمداستىرىلۋدا.
ءشوپ شابۋ ءۇشىن پايدالانىلمايتىن جانە جايىلمالى شالعىنداردى ءبولۋ بويىنشا جۇمىستار جۇرگىزىلۋدە. حالىققا ورمان شارۋاشىلىعى اۋماقتارىندا جانە تابيعي رەزەرۆاتتاردا ءشوپ دايىنداۋ مۇمكىندىگى بەرىلەدى.
اۋىل تۇرعىندارىنا ەگىن جيناۋ جۇمىسىنان كەيىن القاپتاردان سابان جيناۋ مۇمكىندىگى بەرىلەدى. وبلىس اكىمدىكتەرىنىڭ جەدەل دەرەكتەرىنە سايكەس، 7 شىلدەدەگى جاعداي بويىنشا وڭىرلەردە 6،5 ملن توننا ءشوپ دايىندالعان. ماڭعىستاۋ وبلىسىنا 13 مىڭ ءتۇپ جانە 92 ورام ءشوپ اكەلىندى، اپتا سايىن 5 ۆاگون كەبەك جەتكىزىلۋدە.
كورشىلەس وبلىستار اۋماعىندا ءشوپ شابۋ ۇيىمداستىرىلدى. باسقا وڭىرلەرگە ۋاقىتشا 6 470 باس مال تاسىمالداندى. ازىق-تۇلىك كەلىسىمشارت كورپوراسياسى 637 توننا ارزانداتىلعان ارپا جەتكىزدى.
ازىق دايىنداۋ ءۇشىن ق ر ۇكىمەتىنىڭ رەزەرۆىنەن 1،9 ملرد تەڭگە بولىنەدى. ارال اۋدانىنا 1 مىڭ توننادان استام ءشوپ جانە 40 توننا قۇنارلى جەم جەتكىزىلدى. ازىق-تۇلىك كەلىسىمشارت كورپوراسياسى 600 توننا ارپا جەتكىزەدى. 12 شابىندىق بريگادا قۇرىلىپ، جەم-شوپ تاسۋعا 127 اۆتوماشينا جۇمىلدىرىلدى.
كورشىلەس اقتوبە وبلىسىنان ءىرى جەمشوپ جەتكىزىلدى. مال ازىعىن دايىنداۋ جانە قامتاماسىز ەتۋ ماسەلەلەرى اۋىل شارۋاشىلىعى مينيسترلىگى مەن وبلىس اكىمدىكتەرىنىڭ تۇراقتى باقىلاۋىندا.
