– اسكەري جانە ارناۋلى اتاقتار، سىنىپتىق شەندەر رەسپۋبليكا كۇنىنە وراي العاش رەت تاپسىرىلماق. بۇل وتە ورىندى دەپ سانايمىن. ءبىز – اق بىلەكتىڭ كۇشىمەن، اق نايزانىڭ ۇشىمەن ەل قورعاعان باتىرلار ەلىمىز. ەرلەرىمىز جەر شەتىنە جاۋ تيمەسىن دەپ ءارقاشان بەس قارۋىن ساي ۇستاعان. ەل باسىنا كۇن تۋسا، تۋ تۇبىنەن تابىلعان. سىزدەر سول بابالار جولىن لايىقتى جالعاستىرىپ كەلەسىزدەر. ەگەمەندىكتىڭ بۇكىل قادىر-قاسيەتى – جەردىڭ تۇتاستىعىندا جانە ەلدىڭ تىنىشتىعىندا. وسى اسىل قۇندىلىقتاردى وزدەرىڭىز قاس قاقپاي كۇزەتىپ تۇرسىزدار. ايبىندى ارميامىز جانە باسقا دا قاۋىپسىزدىك قۇرىلىمدارى – مەملەكەتىمىزدىڭ بەرىك قالقانى، – دەدى قاسىم-جومارت توقايەۆ.
مەملەكەت باسشىسى قازىرگى زاماننىڭ قانشالىقتى كۇردەلى ەكەنىنە توقتالىپ، ەل قاۋىپسىزدىگىن ساقتاۋ اسا ماڭىزدى مىندەت ەكەنىنە نازار اۋداردى.
– ءبىز ارقانى كەڭگە سالماي، بارلىق سالادا تەمىردەي ءتارتىپتى ساقتاۋىمىز كەرەك. ەلگە قاتەر تونسە، كەز-كەلگەن ساتتە تويتارىس بەرۋگە دايىن بولۋىمىز قاجەت. تۋعان جەردىڭ شەبىن كۇزەتىپ، تۇتاستىقتى ساقتاۋ – ءار ازاماتتىڭ مىندەتى. مۇنى جەتە تۇسىنۋگە ءتيىسپىز. ەلىمىزدىڭ قاۋىپسىزدىگىن قامتاماسىز ەتۋ – قاسيەتتى بورىش، جوعارى جاۋاپكەرشىلىك. سىزدەر وسى جاۋاپكەرشىلىكتى تەرەڭ سەزىنىپ، ەلدىگىمىزدىڭ تۇعىرىن نىعايتۋعا زور ۇلەس قوسىپ جۇرسىزدەر. وتانىمىزدى قورعاۋ ءۇشىن كۇندىز-تۇنى قىزمەت ەتىپ كەلەسىزدەر. جاس ساربازدار، ەڭ الدىمەن، سىزدەرگە قاراپ بوي تۇزەيدى، ۇلگى-ونەگە تۇتادى. سوندىقتان، گەنەرال دەگەن ايبىندى اتقا داق تۇسىرمەي، وفيسەردىڭ ار-نامىسىن بيىك ۇستاۋ اسا ماڭىزدى، – دەدى پرەزيدەنت.
قازاقستاننىڭ قارۋلى كۇشتەرىنىڭ جوعارعى باس قولباسشىسى اسكەريلەر مەن ارناۋلى جانە قۇقىق قورعاۋ ورگاندارىنىڭ قىزمەتكەرلەرىن ماراپاتتاۋ ولاردىڭ وتان قورعاۋ جولىنداعى ءمىنسىز قىزمەتىنە بەرىلگەن جوعارى باعا دەپ اتاپ ءوتتى.
– ءبىز ازاماتتارىمىزدىڭ بەيبىت ءومىرى مەن تىنىشتىعىن قورعاپ جۇرگەن ءاربىرىڭىزدى قۇرمەت تۇتامىز. ءورشىپ كەلە جاتقان گەوستراتەگيالىق شيەلەنىس جاعدايىندا كۇشتىك قۇرىلىمداردىڭ ماڭىزى بىرنەشە ەسە ارتادى. ارميا، قۇقىق قورعاۋ جانە ارناۋلى ورگاندار – ەلىمىزدىڭ ەگەمەندىگى مەن اۋماقتىق تۇتاستىعىنىڭ سەنىمدى تىرەگى، قوعامدىق ءتارتىپ پەن ازاماتتاردىڭ قاۋىپسىزدىگىنىڭ كەپىلى، – دەدى مەملەكەت باسشىسى.
قاسىم-جومارت توقايەۆ مەملەكەت قارۋلى كۇشتەردىڭ جاۋىنگەرلىك ازىرلىگىن ارتتىرۋعا، ولاردى زاماناۋي قارۋ-جاراقپەن جانە تەحنيكامەن جاراقتاندىرۋعا ەرەكشە كوڭىل ءبولىپ وتىرعانىن جەتكىزدى. سونداي-اق قاسيەتتى تاۋەلسىزدىگىمىزدى، ەلدەگى بەيبىتشىلىك پەن كەلىسىمدى ساقتاۋ ءۇشىن قورعانىس الەۋەتىمىزدى دايەكتى تۇردە نىعايتىپ، بۇكىل كۇشتىك قۇرىلىمداردىڭ قىزمەتىن جەتىلدىرە بەرەتىنىن ايتتى.
– ۇلتتىق مۇددەمىز بەن قوعامداعى تۇراقتىلىقتى قورعايتىن بارلىق ازاماتتى الەۋمەتتىك تۇرعىدا كەشەندى قولداۋ قاشان دا مەملەكەتتىك ساياساتتىڭ باسىم باعىتى بولىپ قالا بەرەدى. كۇشتىك قۇرىلىمداردىڭ تيىمدىلىگى، ەڭ الدىمەن، باسشىلىقتىڭ، ياعني، گەنەرالداردىڭ كاسىبيلىگىنە نەگىزدەلگەن. ادامداردىڭ ءومىرى مەن تاعدىرى، قوعامدىق ءتارتىپ، ەلدىڭ يگىلىگى مەن تۇراقتى دامۋى سىزدەردىڭ كاسىبي شەبەرلىكتەرىڭىزگە بايلانىستى، – دەدى پرەزيدەنت.
سالتاناتتى راسىمنەن كەيىن مەملەكەت باسشىسى جاڭا اتاق-شەن العانداردىڭ بارشاسىن قۇتتىقتاپ، ەر-ازامات ءۇشىن حالقىنا قالتقىسىز قىزمەت ەتۋدەن اسقان باقىت جوق ەكەنىن اتاپ ءوتتى.
– قاستەرلى وتانىمىزدى، قاسيەتتى تاۋەلسىزدىگىمىزدى قورعاۋ – ءار ازاماتتىڭ پەرزەنتتىك پارىزى. بارشاڭىزعا زور دەنساۋلىق، وتباسىلارىڭىزعا باق-بەرەكە تىلەيمىن! رەسپۋبليكا كۇنى قۇتتى بولسىن! كوك بايراعىمىز ءارقاشان بيىكتە جەلبىرەسىن! – دەدى قاسىم-جومارت توقايەۆ.
