– Áskeri jáne arnaýly ataqtar, synyptyq shender Respýblika kúnine orai alǵash ret tapsyrylmaq. Bul óte oryndy dep sanaimyn. Biz – aq bilektiń kúshimen, aq naizanyń ushymen el qorǵaǵan batyrlar elimiz. Erlerimiz jer shetine jaý timesin dep árqashan bes qarýyn sai ustaǵan. El basyna kún týsa, tý túbinen tabylǵan. Sizder sol babalar jolyn laiyqty jalǵastyryp kelesizder. Egemendiktiń búkil qadir-qasieti – jerdiń tutastyǵynda jáne eldiń tynyshtyǵynda. Osy asyl qundylyqtardy ózderińiz qas qaqpai kúzetip tursyzdar. Aibyndy armiiamyz jáne basqa da qaýipsizdik qurylymdary – memleketimizdiń berik qalqany, – dedi Qasym-Jomart Toqaev.
Memleket basshysy qazirgi zamannyń qanshalyqty kúrdeli ekenine toqtalyp, el qaýipsizdigin saqtaý asa mańyzdy mindet ekenine nazar aýdardy.
– Biz arqany keńge salmai, barlyq salada temirdei tártipti saqtaýymyz kerek. Elge qater tónse, kez-kelgen sátte toitarys berýge daiyn bolýymyz qajet. Týǵan jerdiń shebin kúzetip, tutastyqty saqtaý – ár azamattyń mindeti. Muny jete túsinýge tiispiz. Elimizdiń qaýipsizdigin qamtamasyz etý – qasietti borysh, joǵary jaýapkershilik. Sizder osy jaýapkershilikti tereń sezinip, eldigimizdiń tuǵyryn nyǵaitýǵa zor úles qosyp júrsizder. Otanymyzdy qorǵaý úshin kúndiz-túni qyzmet etip kelesizder. Jas sarbazdar, eń aldymen, sizderge qarap boi túzeidi, úlgi-ónege tutady. Sondyqtan, general degen aibyndy atqa daq túsirmei, ofitserdiń ar-namysyn biik ustaý asa mańyzdy, – dedi Prezident.
Qazaqstannyń Qarýly Kúshteriniń Joǵarǵy Bas qolbasshysy áskeriler men arnaýly jáne quqyq qorǵaý organdarynyń qyzmetkerlerin marapattaý olardyń Otan qorǵaý jolyndaǵy minsiz qyzmetine berilgen joǵary baǵa dep atap ótti.
– Biz azamattarymyzdyń beibit ómiri men tynyshtyǵyn qorǵap júrgen árbirińizdi qurmet tutamyz. Órship kele jatqan geostrategiialyq shielenis jaǵdaiynda kúshtik qurylymdardyń mańyzy birneshe ese artady. Armiia, quqyq qorǵaý jáne arnaýly organdar – elimizdiń egemendigi men aýmaqtyq tutastyǵynyń senimdi tiregi, qoǵamdyq tártip pen azamattardyń qaýipsizdiginiń kepili, – dedi Memleket basshysy.
– Ulttyq múddemiz ben qoǵamdaǵy turaqtylyqty qorǵaityn barlyq azamatty áleýmettik turǵyda keshendi qoldaý qashan da memlekettik saiasattyń basym baǵyty bolyp qala beredi. Kúshtik qurylymdardyń tiimdiligi, eń aldymen, basshylyqtyń, iaǵni, generaldardyń kásibiligine negizdelgen. Adamdardyń ómiri men taǵdyry, qoǵamdyq tártip, eldiń igiligi men turaqty damýy sizderdiń kásibi sheberlikterińizge bailanysty, – dedi Prezident.
Saltanatty rásimnen keiin Memleket basshysy jańa ataq-shen alǵandardyń barshasyn quttyqtap, er-azamat úshin halqyna qaltqysyz qyzmet etýden asqan baqyt joq ekenin atap ótti.
– Qasterli Otanymyzdy, qasietti táýelsizdigimizdi qorǵaý – ár azamattyń perzenttik paryzy. Barshańyzǵa zor densaýlyq, otbasylaryńyzǵa baq-bereke tileimin! Respýblika kúni qutty bolsyn! Kók bairaǵymyz árqashan biikte jelbiresin! – dedi Qasym-Jomart Toqaev.
