قازاقستانداعى "ەلەكتروندى قارجى ورتالىعى" اق-نىڭ (سەف) قىزمەتىنە جۇرگىزىلگەن مەملەكەتتىك اۋديت قورىتىندىسى بويىنشا 566 ملن تەڭگە كولەمىندە قارجىلاي بۇزۋشىلىقتار انىقتالدى. بۇل تۋرالى جوعارى اۋديتورلىق پالاتا مالىمدەدى، دەپ حابارلايدى Dalanews.kz.
جاپ مالىمەتىنشە، اۋديت بارىسىندا مەملەكەتتىك قارجى سالاسىنداعى اقپاراتتىق جۇيەلەردى دامىتۋ جانە سۇيەمەلدەۋ جۇمىستارىنىڭ تيىمدىلىگى باعالانعان.
سونىمەن قاتار 13،5 ملرد تەڭگە كولەمىندە قاراجاتتى ءتيىمسىز جوسپارلاۋ جانە پايدالانۋ فاكتىلەرى تىركەلدى.
اۋديت ناتيجەسىندە جەدەل نازار اۋدارۋدى جانە تۇزەتۋ شارالارىن قاجەت ەتەتىن ءبىرقاتار ەلەۋلى كەمشىلىكتەر مەن پروبلەمالى تۇستار انىقتالدى. اتاپ ايتقاندا، ستراتەگيالىق باسقارۋ سالاسىندا ولقىلىقتار بار: 2023–2024 جىلدارعا ارنالعان دامۋ جوسپارلارىنىڭ ورىندالۋى تۋرالى ەسەپتەر جوق، كەيبىر نىسانالى كورسەتكىشتەرگە قول جەتكىزىلمەگەن، ال ىشكى اۋديت قىزمەتىنىڭ ءىس-شارالارى ءىشىنارا نەمەسە مەرزىمىنەن كەش جۇزەگە اسىرىلعان.
بيۋدجەت پروسەسىنىڭ ينتەگراتورى رەتىندەگى سەف قىزمەتى جالپى العاندا قاناعاتتانارلىق دەپ تانىلعانىمەن، ۇيىمنىڭ ىشكى نورماتيۆتىك قۇجاتتارىنىڭ جاڭارتىلماۋى ونىڭ جۇمىس تيىمدىلىگىن تومەندەتەتىنى اتاپ ءوتىلدى.
اۋديت بارىسىندا سەف قىزمەت قۇنىن قالىپتاستىرۋدا ءارتۇرلى تاسىلدەردى قولداناتىنى انىقتالدى. اۋديتورلار باعا ساراپتاماسىن جۇرگىزۋدى جانە جۇمىستار مەن قىزمەتتەردى بولەك ەسەپكە الۋ جۇيەسىن ەنگىزۋدى ۇسىنىپ وتىر. بۇل قاتە باعا بەلگىلەۋ تاۋەكەلدەرىن ازايتۋعا مۇمكىندىك بەرەدى.
اقپاراتتىق قاۋىپسىزدىك ماسەلەلەرىنە دە ەرەكشە نازار اۋدارىلعان. جاپ مالىمەتىنشە، سۇيەمەلدەۋدە جانە سەنىمگەرلىك باسقارۋدا تۇرعان اقپاراتتىق جۇيەلەردە، سونداي-اق "ەلەكتروندىق كوممەرسيالىق ساتىپ الۋلار" جۇيەسىندە اقپاراتتىق قاۋىپسىزدىكتىڭ نەگىزگى تالاپتارى بۇزىلعان. كەيبىر جۇيەلەر رەسمي تۇردە تاجىريبەلىك پايدالانۋ كەزەڭىندە بولا تۇرا، تولىققاندى جۇمىس رەجيمىندە قولدانىلىپ كەلەدى.
سونىمەن قاتار قولدانىستاعى كەيبىر سيفرلىق پلاتفورمالارعا رۇقساتسىز ارالاسۋ ءقاۋپىنىڭ العىشارتتارى انىقتالعان. اۋديت بارىسىندا "ەلەكتروندىق مەملەكەتتىك ساتىپ الۋلار" جۇيەسىنە 600-دەن استام تەحنيكالىق تۇزەتۋ ەنگىزىلگەنى تىركەلدى. ونىڭ ىشىندە جۇمىس تاجىريبەسى مەن رۇقسات قۇجاتتارىن تەكسەرۋدى وشىرگەن وزگەرىستەر دە بار. وسى باعىتتاعى سەف تاسىلدەرى جەتىلدىرۋدى جانە باقىلاۋدى كۇشەيتۋدى قاجەت ەتەدى.
مەملەكەتتىك اقپاراتتىق جۇيەلەردىڭ تۇراقتى ءارى ءقاۋىپسىز جۇمىسىن قامتاماسىز ەتۋ ءۇشىن قارجى مينيسترلىگىنە سەف قىزمەتىنە باقىلاۋدى كۇشەيتۋ ۇسىنىلدى.
"بارلىق پروبلەمالى ماسەلەلەر بويىنشا جوعارى اۋديتورلىق پالاتا ءتيىستى ۇسىنىمدار مەن تاپسىرمالار ازىرلەدى. ولاردىڭ ورىندالۋى تولىق اياقتالعانعا دەيىن باقىلاۋدا بولادى"، – دەپ قورىتىندىلادى اۋديتورلار.
