2025 جىلعا ارنالعان ءومىر ءسۇرۋ قۇنى بويىنشا رەيتينگتە قازاقستان 139 ەلدىڭ ىشىندە 114-ورىنعا يە بولدى. Finprom ساراپشىلارى وسى باعىتتا ساراپتاما جاسادى، دەپ حابارلايدى Dalanews.kz.

بۇل يندەكسكە نە جاتادى؟

بۇل يندەكستە تۇتىنۋ تاۋارلارى مەن قىزمەتتەردىڭ باعالارى سالىستىرىلادى، وعان ازىق-تۇلىك، كولىك، كوممۋنالدىق قىزمەتتەر كىرەدى، ءبىراق باسپانا شىعىندارى (جالعا الۋ نەمەسە يپوتەكا) ەسەپكە الىنبايدى. نەگىزگى ولشەم رەتىندە نيۋ-يورك الىنعان، ونىڭ يندەكسى - 100%. ەگەر ەلدىڭ يندەكسى 120 بولسا، بۇل ونداعى كۇندەلىكتى ءومىر ءسۇرۋ شىعىنى نيۋ-يوركتەن 20%-عا جوعارى دەگەندى بىلدىرەدى.

"قازاقستاننىڭ يندەكسى - 26،6. بۇل ەلدەگى باعا نيۋ-يوركپەن سالىستىرعاندا 73،4% تومەن ەكەنىن كورسەتەدى. ازىق-تۇلىك باعاسىنىڭ يندەكسى - 27،4، قوعامدىق تاماقتانۋ ورىندارىنداعى باعالار - 28. ال ساتىپ الۋ يندەكسى - 50،8. بۇل - ورتاشا جالاقىعا ءومىر سۇرەتىن قازاقستاندىقتار نيۋ-يورك تۇرعىندارىمەن سالىستىرعاندا 49،2%-عا از تاۋار مەن قىزمەت ساتىپ الا الادى دەگەن ءسوز"، - دەيدى ساراپشىلار.

باسقا مەملەكەتتەر قاي ورىندا؟

تمد ەلدەرى اراسىندا قازاقستاننان جوعارى ورىندا ارمەنيا، مولدوۆا جانە ازەربايجان تۇر (ولاردا قىمباتىراق)، ال تومەنگى ورىندا قىرعىزستان، بەلارۋس، وزبەكستان جانە رەسەي تۇر.

الەم بويىنشا ەڭ جوعارى ءومىر ءسۇرۋ قۇنى شۆەيساريا جانە يسلانديادا تىركەلگەن. ەڭ تومەن كورسەتكىشتەر پاكىستان، ليۆيا جانە مىسىردا.

ەلدەگى باعا بويىنشا احۋال قانداي؟

قازاقستانداعى باعاعا كەلسەك، 2025 جىلدىڭ ساۋىرىندە ەلدەگى تاۋارلار مەن قىزمەتتەر ءبىر ايدا 1،2%-عا، ءبىر جىلدا 10،7%-عا قىمباتتاعان.

ناقتى ساناتتار بويىنشا:

• ازىق-تۇلىك پەن الكوگولسىز سۋسىندار 8،3%-عا؛

• كيىم مەن اياق كيىم 11%-عا؛

• تۇرعىن ءۇي قىزمەتتەرى، سۋ، ەلەكتر، گاز جانە وتىن تۇرلەرى 15،8%-عا؛

• دەنساۋلىق ساقتاۋ قىزمەتتەرى 14،8%-عا؛

• كولىك قىزمەتتەرى 7%-عا؛

• بايلانىس 17،3%-عا؛

• مادەنيەت پەن دەمالىس 16،8%-عا؛

• تۇرعىن ءۇيدى جالعا الۋ 15،3%-عا؛

• قوعامدىق تاماقتانۋ مەن ءقوناقۇي قىزمەتتەرى 12،6%-عا قىمباتتادى.

2025 جىلى ءبىرىنشى توقساندا قازاقستاندىقتاردىڭ ورتاشا ايلىق جالاقىسى 423،1 مىڭ تەڭگە بولدى، بۇل 2024 جىلمەن سالىستىرعاندا 10،7%-عا جوعارى. 

وڭىرلەر بويىنشا ەڭ جوعارى جالاقى اتىراۋ، ماڭعىستاۋ جانە ۇلىتاۋ وبلىستارىندا تىركەلدى. ەڭ تومەنگى جالاقى سولتۇستىك قازاقستان، جەتىسۋ جانە جامبىل وبلىستارىندا.