ەكسپەديسيا مۇشەلەرى مىڭجىلدىق وركەنيەتتەردىڭ تورابى بولعان تۇركىستان قالاسىنا كەلىپ، 14-29 جاس ارالىعىنداعى «ەلباسى مەدالى» جوباسىنىڭ قاتىسۋشىلارىمەن كەزدەستى.
جاس كوشباسشىلار مەن ءبىلىمدى ورەندەر ءوزارا پىكىر الماسىپ، عىلىم، ءبىلىم، مادەنيەت جانە وزگە دە سالالاردا جەتىستىككە جەتۋ جولىن سارالادى. تۇركىستاننىڭ دامىپ كەلە جاتقانىن تىلگە تيەك ەتىپ، بۇنىڭ ءبارى تاۋەلسىزدىكتىڭ جەمىسى ەكەنىنە توقتالدى.
ايتا كەتەيىك، تۇركىستان وبلىسى بويىنشا 276 ءبىلىمدى جاس «ەلباسى مەدالى» جوباسىنان قولا مەدال الدى. بيىل 54 مەدال يەگەرىنە مەملەكەتتىك ءبىلىم گرانتى بەرىلدى. ءقازىر وڭىردە 565 جاس جوباعا قاتىسىپ جاتىر. ولاردىڭ 222ء-ى قولا دەڭگەيدى، 17ء-ى كۇمىس دەڭگەيدى اياقتاۋعا ۇمىتكەر بولىپ تۇر. ءوڭىر بويىنشا باعدارلامانى جۇزەگە اسىرۋدا 19 تالىمگەر، 1 وڭىرلىك ۇيلەستىرۋشى جانە 1 ساراپشى قىزمەت ەتىپ جاتىر.
بۇدان كەيىن ەكسپەديسيا مۇشەلەرى «قوجا احمەت ياساۋي» كەسەنەسىنىڭ تاريحىنا قانىعىپ، بابالار رۋحىنا زيارات جاسادى. يۋنەسكو-نىڭ تىزىمىندە تۇرعان تاريحي ەسكەرتكىشتەردى تاماشالادى. تۇركىستاندا جاڭادان بوي كوتەرگەن عيماراتتاردى، مادەني-الەۋمەتتىك نىسانداردى ارالادى. «كەرۋەن-ساراي» تۋريستىك كەشەنىندە سەرۋەندەپ، جاڭارعان تۇركىستانداعى وزگەرىستەرگە ريزاشىلىقتارىن ءبىلدىردى.
ەلباسى اكادەمياسىنىڭ رەسمي وكىلى مارجان يمانعالييەۆانىڭ ايتۋىنشا، «ەل ءۇمىتى» باستاماسى مەن «ەلباسى مەدالى» جوباسىنا قاتىسۋشىلاردىڭ كوڭىل-كۇيلەرى وتە جاقسى. بۇل ەكسپەديسيا ارقىلى جاستاردىڭ شىعارماشىلىق بايلانىستارى نىعايىپ، وي-ورىستەرى كەڭەيەدى. ەكسپەديسيا تۇركىستان وبلىسى مەن شىمكەنت قالالارىندا كەزدەسۋلەرگە قاتىسقان سوڭ تەمىرتاۋ مەن نۇر-سۇلتان قالالارىنا جولعا شىعادى.
