«ەكسپو-2017» حالىقارالىق مامانداندىرىلعان كورمەسى اياسىندا تۇساۋى كەسىلگەن شىعارما تۋعان ەلگە دەگەن سۇيىسپەنشىلىكتى ارتتىرۋ، ءوڭىردىڭ اسەم تابيعاتى مەن كيەلى جەرلەرىن جانە تاريحي ۇلى تۇلعالاردىڭ ءومىرىن ناسيحاتتاۋ باعىتىندا تۇسىرىلگەن. ءفيلمنىڭ ماقساتى – وسكەلەڭ ۇرپاققا قازاق حالقىنىڭ تاريحىنداعى تۇڭعىش كاسىپقوي بالۋان، كۇش اتاسى قاجىمۇقاندى ناسيحاتتاۋ ارقىلى سالاۋاتتى ءومىر سالتىن ۇستانۋعا، قازاقشا كۇرەسكە، سپورتقا دەگەن قىزىعۋشىلىقتارىن ارتتىرۋعا، ءوز وتانىن قورعاۋ مەن ادال قىزمەت ەتۋگە، اتامەكەنىنە دەگەن تەرەڭ سۇيىسپەنشىلىك پەن پاتريوتتىق سەزىمىن وياتۋعا شاقىرادى. بۇل انيماسيالىق ءفيلمنىڭ بالالارعا بەرەتىن تالىم-تاربيەسى دە مول.
تاربيەلىك، تانىمدىق ماعىناسى مول ءتۇسىرىلىم ەلباسى ن.نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا كورسەتىلگەن «تۋعان جەر» باعدارلاماسىن جۇزەگە اسىرۋ ماقساتىندا وبلىس اكىمى ج.تۇيمەبايەۆتىڭ تاپسىرىسى نەگىزىندە قولعا الىندى.
انيماسيالىق فيلم جاستارعا ونەگە، ۇلگى سانالاتىن ۇلى تۇلعالاردىڭ ءومىرىن ناسيحاتتايتىن قازاق حالقىنىڭ ماقتانىشىنا اينالعان بالۋان بابامىز قاجىمۇقان مۇڭايتپاسوۆتىڭ ەرلىكتەرىن پاش ەتەدى. فيلم مۇقاننىڭ جاستىق شاعىنان باستالىپ، ونىڭ كىشكەنتاي بالاعا ساي ەرلىكتەرىن كورسەتە وتىرىپ، الەمدىك دەڭگەيدەگى بەدەلدى جارىستارعا، سونىڭ ىشىندە جاپون بالۋانى ساراكيكيمەن كۇرەسىن سۋرەتتەيدى. سونىمەن قاتار، بالۋان بابامىز حالقى ءۇشىن، ەل ارالاپ، ونەر كورسەتىپ، سودان تۇسكەن قارجىعا اسكەري ۇشاق جاساتىپ، ءىى دۇنيە جۇزىلىك سوعىس مايدانىنا جىبەرگەنى كەڭىنەن ناسيحاتتالادى.
2D فورماتىنداعى تۋىندىنى شىمكەنتتەگى «ساق» كينوستۋدياسى تۇسىرگەن. كورسەتىلىم رەجيسسەرى باتىرحان داۋرەنبەكوۆ بولسا، سەناريي اۆتورى جانە پروديۋسەرى باقىتجان قۇلجابايەۆ. ال انيماسيالىق ءفيلمنىڭ باس وپەراتورى فۋرحات سايپوۆ، كومپوزيتورى رۋسلان شىنىقۇلوۆ.
