الماتىدا بۇرىنعى سۋديا سۆەتلانا جولمانوۆاعا قاتىستى ءىس بويىنشا سوت جالعاسىپ جاتىر، دەپ حابارلايدى Dalanews.kz.

Tengrinews.kz مالىمەتىنشە، بۇگىن ايىپتالۋشى سۆەتلانا جولمانوۆا دەنساۋلىعىنا بايلانىستى سوت وتىرىسىنا قاتىسۋدان باس تارتقان. الايدا تەرگەۋ يزولياتورىنىڭ باسشىلىعى ايىپتالۋشىنىڭ دەنساۋلىعى جاقسى ەكەنىن ايتقان. ول ءتارتىپ بۇزعانى ءۇشىن تارتىپتىك يزولياتورعا اۋىستىرىلعان.

پروسەسس ايىپتالۋشىنىڭ قاتىسۋىنسىز جالعاسىپ جاتىر.

بۇگىن سوت بارىسىندا جابىرلەنۋشىلەردىڭ ءبىرى بۇعان دەيىن جولمانوۆا ودان 170 مىڭ تەڭگە قارىز الىپ، قايتارماعانىن ايتتى. دەگەنمەن جابىرلەنۋشى جولمانوۆاعا قارسى شاعىمداردان باس تارتتى.

"سۆەتلانا جولمانوۆاعا قارىزعا اقشا بەردىم. وعان 170 مىڭ تەڭگە بەردىم. كەيىن ءبارى ارىز جازا باستاعاندا، مەن دە جازدىم. جاي قارىزعا سۇرادى، ماعان ەشتەڭە ۋادە ەتپەدى. 170 مىڭ تەڭگە، ول اقشانى ءالى قايتارعان جوق. بۇل سومانى ءوندىرىپ الۋدان جانە بۇدان ءارى سوتقا قاتىسۋدان باس تارتامىن. جولمانوۆاعا ەشقانداي شاعىمىم جوق. ازاماتتىق تالاپ قويۋدان باس تارتامىن"، - دەدى جابىرلەنۋشى قازبەك نۇراحمەتوۆ.

تاعى ءبىر كۋاگەر ەراسىل كاكەنوۆ سۆەتلانا جولمانوۆا وعان پاتەر ساتىپ الۋدى ۇسىنعانىن ايتتى.

"باسىندا جولمانوۆانىڭ اناسىن ەمدەپ ءجۇردىم، سيستەما قويدىم. كەيىن سۆەتلانا جولمانوۆامەن تانىستىم، وعان دا سيستەما قويا باستادىم. ول مەدەۋ اۋدانىنىڭ سوتىندا جۇمىس ىستەيتىنىن ايتتى. مەن پاتەر ساتىپ العىم كەلەتىنىن ءبىلدى. ول پاتەر ساتاتىنىن ايتتى. تۇگەل دەگەن اپايدىڭ پاتەرىن ساتىپ الدىم. ونىڭ تەگىن ۇمىتىپ قالدىم. بارلىعى نوتاريۋس ارقىلى، ورنىمەن. 16 ميلليون تەڭگەگە ساتىپ الدىم. ءوزىم يپوتەكا تولەدىم، جاقىندا قارىزىما بايلانىستى پاتەردى ساتتىم. اقشا تۇگەل تاتەگە بەرىلدى. جولمانوۆاعا اقشا بەرىلمەدى"، - دەدى كۋاگەر.

تاعى ءبىر كۋاگەر جولمانوۆامەن 20 جىلعا جۋىق دوس بولعانىن ايتتى. ايەلدىڭ سوزىنشە، ءسىڭىلىسى 20 ميلليون تەڭگە نەسيە الىپ، ايىپتالۋشى جولمانوۆاعا بەرگەن.

"سۆەتلانا نەسيەنى جاپپادى، ءسىڭىلىم مەنەن سۇرادى. سۆەتلانا ءبارىن قايتاراتىنىن ايتتى، ءسال كۇتۋ كەرەگىن جەتكىزدى. ...سوماسى 20 ميلليون تەڭگەدەن اسادى"، - دەدى كۋاگەر.

ءوز كەزەگىندە كۋاگەر ەردان تاعايەۆ سۆەتلانا جولمانوۆا ودان 137،6 ميلليون تەڭگە قارىز الىپ، قايتارماعانىن مالىمدەدى. ول اقشانى ەكى اي ىشىندە قايتارۋعا ۋادە بەرگەن.

"2021 جىلى ول مەنەن 137 ميلليون 600 مىڭ تەڭگە قارىزعا الدى. ول ماعان تانىستارىم ارقىلى كەلدى، تانىسىم اقشا بەرۋىمدى ءوتىندى. ول ەكى ايعا دەپ الدى. ...ول ەكى اي ىشىندە بارلىق اقشانى قايتاراتىنىن سەنىمدى تۇردە ايتتى"، - دەدى ەر ادام.

بۇل ءىس بويىنشا تەرگەۋ بارىسىندا قىلمىستىق ارەكەتتىڭ 48 ەپيزودى انىقتالىپ، ولار ءبىر ىسكە بىرىكتىرىلگەن.